1. ¿Bin ya yakʼ jmaliytik te Jehová?

 TE Jehová ay bin tʼujbil ya yakʼ jmaliytik, jaʼ te kuxlejalil ta sbajtelkʼinal. Ay chaʼoxtul j-abatetik yuʼun yakik ta smaliyel te ya xkuxinik ta sbajtelkʼinal ta chʼulchan jich bitʼil chʼul-abatetik te ma xlajike (1 Cor. 15:50, 53). Pero jaʼ bayalxan te machʼatik ya xkuxinik ta sbajtelkʼinal ta Balumilal, te tseʼelnax yoʼtanik sok ma stsakotikix ta chamel (Apoc. 21:3, 4). Jpisiltik mukʼ skʼoplal ta koʼtantik te bin yakotik ta smaliyel, chikan teme ya xkuxinotik ta sbajtelkʼinal ta chʼulchan o liʼ ta Balumilal.

2. ¿Bin yuʼun ay smukʼul koʼtantik?

² Kʼalal te Biblia ya yalbey skʼoplal te mukʼul oʼtanil, ya yakʼ ta naʼel te ay bintik lek ya xkʼot ta pasele. Schʼuunoj koʼtantik te ya xkʼot ta pasel te bin yakotik ta smaliyel, melel jaʼ talem ta stojol te Jehová (Rom. 15:13). Ya jnaʼtik te bin jamal yaloj sok ya jnaʼtik te spisil-ora ya skʼotes ta pasele (Núm. 23:19). Schʼuunoj koʼtantik te ya skʼan Jehová sok ya xjuʼ yuʼun skʼotesel ta pasel te bin ya yale. Jaʼ yuʼun te smukʼul koʼtantik ma stsakoj yip ta swentanax te bin ya jmulantik o te bin ya jkʼantik, melel ay pruebaetik te ya yakʼ ta ilel te yuʼun-nix ya xkʼot ta pasel-ae.

3. ¿Bin ya kilbeytik skʼoplal ta artículo ini? (Salmo 27:14).

³ Te jTatik ta chʼulchan kʼuxotik ta yoʼtan sok ya skʼan te ya kakʼ smukʼul koʼtantik ta stojol (kʼopona Salmo 27:14). Teme stsakoj yip te smukʼul koʼtantik ta stojol te Jehová, ya xkujch kuʼuntik te jwokoltik sok ma jxiʼtik te bin ya xtal ta jtojoltik. Ta artículo ini ya kiltik bin-utʼil ya skoltayotik te smukʼul koʼtantik. Ta nail ya kiltik bin yuʼun te smukʼul koʼtantik jich kʼoem te bin-utʼil jun ancla sok jich te bin-utʼil smajkil jolal. Ta patil ya kiltik bin-utʼil ya xjuʼ ya stsakxan yip te smukʼul koʼtantike.

4. ¿Bin yuʼun te smukʼul koʼtantik jich kʼoem te bin-utʼil jun ancla? (Hebreos 6:19).

⁴ Te Carta te la stsʼibay te jpuk-kʼop Pablo ta stojol te Hebreoetik, la spajbey skʼoplal te mukʼul oʼtanil jich te bin-utʼil jun ancla (kʼopona Hebreos 6:19). Melel jteb ma spisil-ora been ta barco, jaʼ yuʼun snaʼoj te tey ya stsak yip-a te barco ta ancla. Ta jun buelta te kʼalal yak ta beel ta barco-ae, tal tulan yikʼal jaʼal. Ta yorail-abi te jtijbarcoetik la schʼojik koel te ancla ta yutil jaʼ swenta maba ya sta sba te barco sok te mukʼul tonetik (Hech. 27:29, 39-41). Te smukʼul koʼtantik jich kʼoem te bin-utʼil jun ancla, melel ya skoltayotik yuʼun maba ya kijkitaytik te Jehová te kʼalal ya jsitintaytik wokoliletik te jich kʼoemik te bitʼil tulan yikʼal jaʼal. Snaʼel te yuʼun-nix ay bin lek ya xkʼot ta pasel ta pajel chaʼbej, ya skoltayotik ta sitintayel te jwokoltike. Juluk ta koʼtantik te la yal te Jesús te ya kichʼtik kontrainele (Juan 15:20). Jaʼ yuʼun teme ya jnopilan ta koʼtantik te majtanil ya yakʼbotik te Jehová ya skoltayotik yuʼun ma jkom jbatik ta abatinel ta stojol.

5. ¿Bin-utʼil koltayot te smukʼul yoʼtan te Jesús te kʼalal la sitintay te lajele?

⁵ Kiltik bin-utʼil koltayot te Jesús te smukʼul yoʼtan swenta jun yoʼtan la yakʼ sba manchukme snaʼoj te ya yichʼ milele. Ta skʼajkʼalel te Pentecostés ta jaʼbil 33, te jpuk-kʼop Pedro la yal jun albilkʼop te ay ta Salmo te ya scholbey skʼoplal te lamalnax yoʼtan sok ay smukʼul yoʼtan te Jesús: «Ay smukʼul koʼtan te ay bin ya jmaliye, melel maba ya awijkitayon ta Mukenal, sok maba ya awakʼ te ya xkʼaʼ sbakʼetal te j-abat awuʼun te jun yoʼtane […]. Ya awakʼbon bayal stseʼelil koʼtan te kʼalal ayonix ta atojol-ae» (Hech. 2:25-28; Sal. 16:8-11). Manchukme snaʼoj te Jesús te ya xlaje, ya xkʼot ta yoʼtan te ya xkuxajtesot yuʼun te Dios sok te ya xchaʼsujt bael ta chʼulchan sok te sTate (Heb. 12:2, 3).

6. ¿Bin la yal jtul hermano ta swenta te mukʼul oʼtanil?

⁶ Ta swenta te smukʼul yoʼtan te hermanoetik, kujch yuʼunik te swokolike. Kiltik te ejemplo yuʼun te hermano Leonard Chinn, jtul hermano te yak ta kuxinel ta Inglaterra. Ta yorail te Primera Guerra Mundial, la yichʼ otsesel ta cárcel ta swenta te maba la skʼan och ta soldado. Cheb u ma juʼ la skʼopon te yantik sok akʼbot spas tulan aʼtelil. Ta patil jich la yal: «Te bin kʼax ta jtojol la kil te mukʼ skʼoplal te ayuk smukʼul koʼtantik swenta ya xkujch kuʼuntik te wokolile. Te ejemplo yuʼun te Jesús, te jpuk-kʼopetik sok te j-alwanejetik, soknix te bintik tʼujbil ya yal te Biblia ya yakʼ smukʼul koʼtantik ta swenta te pajel chaʼbej sok kiptik swenta ya xkujch kuʼuntik». Te mukʼul oʼtanil jich kʼot te bin-utʼil jun ancla ta stojol te Leonard, jaʼnix jich ya xjuʼ ya xkʼot ta jtojoltik.

7. ¿Bin-utʼil ya stsakxan yip te smukʼul koʼtantik kʼalal ya jsitintaytik wokoliletik? (Romanos 5:3-5; Santiago 1:12).

⁷ Te smukʼul koʼtantik ya stsak yip kʼalal ya xkujch kuʼuntik te wokoliletik, kʼalal ya skoltayotik te Jehová sok te lek ya yilotike (kʼopona Romanos 5:3-5; Santiago 1:12). Ta ora ini stsakojxan yip te smukʼul koʼtantik ma jichukix te bin-utʼil ta nailale. Te Satanás ya skʼan te ya xchebaj koʼtantik kʼalal ya xkʼax jwokoltik, pero ta swenta te koltayel yuʼun Jehová ya xjuʼ kuʼuntik sitintayel.

8. ¿Bin yuʼun te smukʼul koʼtantik jich kʼoem te bin-utʼil smajkil jolal? (1 Tesalonicenses 5:8).

⁸ Te Biblia ya yal te jich kʼoem te bin-utʼil smajkil jolal te smukʼul koʼtantike (kʼopona 1 Tesalonicenses 5:8). Jtul soldado ya slap te smajkil sjol yuʼun ma x-ejchentesot yuʼun-a te skontrae. Jaʼ pajal sok ta swenta  te schʼuunel koʼtantik, ya skʼan ya jkanantaytik te snopojibal kuʼuntik yuʼun maba ya stsalotik te Satanás. Melel bayal bintik ya yakʼ te ya xyalotik ta mulil yuʼun o ay bin ya yakʼ ta nopel te ya yutsʼin te jpensartik. Jich bitʼil te smajkil jolal te ya skanantaybey sjol te soldado, jaʼnix jich te smukʼul koʼtantik ya skanantay te snopojibal kuʼuntik, yuʼun jun koʼtan ya kakʼ jbatik ta stojol te Jehová.

9. ¿Bin ya spasik te ants winiketik kʼalal maʼyuk smukʼul yoʼtanik?

⁹ Te smukʼul koʼtantik ya skoltayotik yuʼun lek te bin ya jtatik ta nopel spasel. Pero ya xjuʼ ya xpejkʼaj yip te smukʼul koʼtantik kʼalal jaʼ ya xbajt ta koʼtantik te bin ya skʼan koʼtantike. Jnop kaʼiytik te bin kʼax ta stojolik te j-abatetik yuʼun Dios ta Corinto. Chʼay te schʼuunel yoʼtanik ta swenta te bin mukʼ skʼoplal yaloj te Jehová, te jaʼ te chaʼkuxajel (1 Cor. 15:12). Te Pablo la yal te maba ya schʼuunik te nojptesel-abi sok jaʼnax baem ta yoʼtanik te bin yak ta kʼaxel ta stojolike (1 Cor. 15:32). Ta kʼajkʼal ini, bayal ants winiketik maba ya yakʼ smukʼul yoʼtanik ta swenta te bin jamal yaloj te Diose, jaʼ yuʼun jaʼnax baem ta yoʼtanik te bin yak ta kʼaxel ta stojolik sok jaʼnax ya spasik te bin ya skʼan yoʼtanik. Yan stukel te joʼotik, ya kakʼ smukʼul koʼtantik ta swenta te bin ya spas ta pajel chaʼbej te Jehová. Te smukʼul koʼtantik, jich kʼoem te bin-utʼil smajkil jolal te ya skanantay te snopojibal kuʼuntik sok ya skoltayotik yuʼun ma jaʼuk ya xbajt ta koʼtantik spasel te bin ya skʼan koʼtantik, te ya yutsʼin te bitʼil kamigoinejtik te Jehová (1 Cor. 15:33, 34).

10. ¿Bin-utʼil ya skoltayotik te smukʼul koʼtantik yuʼun ya jsitintaytik te lotiletik ya yakʼik ta nopele?

¹⁰ Te smajkil jolal yuʼun te mukʼul oʼtanil jaʼnix jich ya skoltayotik yuʼun maba ya jnoptik te maʼyuk skʼoplal te ya jpastik tulan ta spasel te bin ya smulan te Jehová. Ayniwan te ay machʼa jich ya xjuʼ ya snop: «Maʼyuk bin-ora ya jta te kuxlejalil ta sbajtelkʼinal, melel ma kʼax lek jtalel sok maʼyuk bin-ora ya xjuʼ kuʼun spasel te bin ya skʼan te Dios ta stojol te j-abatetik yuʼune». Jnop kaʼiytik te jaʼnix jich la yal te Elifaz: «¿Bin a te winic, te lec ya xhuʼ ya xcʼoht […]. Teme Dios ma ba ya smucʼulin yoʼtan te chʼul aʼbatetic yuʼun, ni haʼuc cʼax lec ya yil te chʼulchan» (Job 15:14, 15). ¡Jaʼ jun mukʼul lotil! Melel jnaʼojtik te Satanás jaʼme ya skʼan te jichuk ya jnoptike. Snaʼoj teme jich ya jnopilan ta koʼtantik, ya xchʼay bael te smukʼul koʼtantike. Jaʼ yuʼun ya jkʼan ya jpastik tulan yuʼun ma xkakʼ jbatik ta tsalel ta swenta te lotil ini, sok te jaʼuk ya xbajt ta koʼtantik snopel te bintik sjapbeyojotik te Jehová. Ayuk ta koʼtantik te jaʼ ya skʼan te jpisiltik ya xkuxinotik ta sbajtelkʼinal sok ya skoltayotik yuʼun ya jkʼotestik ta pasel te bin jnopojtik spasel ta stojole (1 Tim. 2:3, 4).

11. ¿Bin yuʼun ya skʼan ya jnaʼtik smaliyel te kʼalal mato xkʼot yorail te bin smukʼulinej koʼtantike?

¹¹ Aynix wokol ya kaʼiytik te spisil-ora stsakojuk yip te smukʼul koʼtantik. Ay baeltik ya jkʼantikix te ya xkʼot ta pasel te bin jamal yaloj te Diose, pero te Jehová sbajtelkʼinal ay stukel sok ma jichuk ya yil te tiempo te bin-utʼil ya kiltik te joʼotike (2 Ped. 3:8, 9). Ya skʼotes ta pasel te bin jamal yaloje, pero maniwan jaʼuk ya spas te bin-ora ya jkʼantik te joʼotike. ¿Bin ya skoltayotik yuʼun ma xpejkʼaj yip te smukʼul koʼtantik sok te yakuk jmaliytik te ya xkʼot skʼajkʼalel te ya spas Dios te bin jamal yaloje? (Sant. 5:7, 8).

12. Jich bitʼil ya yal Hebreos 11:1, 6, ¿bin-utʼil snitojbey sba skʼoplal te mukʼul oʼtanil sok te chʼuunel oʼtanil?

¹² Ya stsak yip te smukʼul koʼtantik teme nopol ayotik ta stojol te Jehová, melel yakʼoj jnaʼtik te ya spas te bin yaloje. Te Biblia  ya snitbey sba skʼoplal te mukʼul oʼtanil sok te schʼuunel koʼtantik te bitʼil aynix-a te Jehová sok «ya yakʼbey smajtan te machʼatik sok spisil yoʼtanik ya xleot yuʼune» (kʼopona Hebreos 11:1, 6). Teme jchʼuunojtik te yuʼun-nix ay-a te Diose, ya kakʼxan smukʼul koʼtantik te yuʼun-nix ya skʼotes ta pasel-a te bintik yaloje. Kiltik bin ya xjuʼ ya jpastik yuʼun ya kamigointikxan sok yuʼun jich stsakojxan yip te smukʼul koʼtantik ta stojol.

13. ¿Bin-utʼil ya xjuʼ ya kamigointik te Diose?

¹³ Jkʼopontik te Jehová sok jkʼopontik te Biblia. Melelnix-a te ma xjuʼ ya kiltik te Jehová, pero ya xjuʼ ya kamigointik, ya xjuʼ ya jkʼopontik sok ya jnaʼtik te ya schʼam yaʼiyik te bin ya kalbeytike (Jer. 29:11, 12). Sok jaʼnix jich ya xjuʼ ya kaʼiytik te bin ya yalbotik te kʼalal ya jkʼopontik te Biblia sok ya jnopilantik ta koʼtantik. Te kʼalal ya jkʼopontik bin-utʼil te Jehová la skanantay te j-abatetik yuʼun ta namey te jun yoʼtanik ta stojol, ya stsakxan yip te smukʼul koʼtantik. Spisil te bin ya yal te Biblia «la yichʼ tsʼibayel swenta ay bin ya yakʼ jnoptik, ay bin ya jmaliytik ta skaj te ya xkujch kuʼuntik sok te smukʼul koʼtantik te ya yakʼbotik te sJun Diose» (Rom. 15:4).

14. ¿Bin yuʼun jaʼ lek te ya jnop kaʼiytik te bin spasoj te Jehová ta jtojoltik?

¹⁴ Jnop kaʼiytik bin-utʼil skʼotesoj ta pasel te Jehová te bin jamal yaloje. Jnop kaʼiytik te bin la spas te Abrahán sok te Sara. Te bitʼil ayix yaʼbilalik, ma xjuʼ ya sta yal snichʼnabik, pero te Dios la yalbey ta jamal te ya x-ayin jtul skeremik (Gén. 18:10). ¿Bin la spas te Abrahán? Te Biblia ya yal te aynanix bin ya smaliy-a sok «la yakʼ schʼuunel yoʼtan te tatil ya xkʼot yuʼun bayal ta pam nacionetik» (Rom. 4:18). Ta sit jtul ants winik, ma xjuʼ te jich ya xkʼot ta pasel yilele, pero te Abrahán la schʼuun yoʼtan te ya skʼotes ta pasel te Jehová te bin jamal la yale sok kʼot ta pasel (Rom. 4:19-21). Te bin la kiltikixe ya yakʼ jnoptik te spisil-ora ya smukʼulin koʼtantik te Jehová te ya skʼotes ta pasel te bin ya yale, manchukme jkʼaxel ma xkʼot ta pasel yilel.

15. ¿Bin yuʼun ya skʼan te ya jnop kaʼiytik te bin spasoj te Jehová ta jtojoltik?

 ¹⁵ Jnop kaʼiytik ta swenta te bin spasoj ta jtojoltik te Jehová. ¿Aybal jnopoj kaʼiytik bin-utʼil kʼoem ta pasel ta jtojoltik te bin jamal yaloj te Diose? Te Jesús la yal te ya yakʼbotik te Jehová te bintik ya xtuun kuʼuntik ta jujun kʼajkʼal (Mat. 6:32, 33). Te Jesús jaʼnix jich la yal te ya yakʼbotik Jehová te schʼul espíritu teme ya jkʼanbeytike (Luc. 11:13). Te Jehová skʼotesoj ta pasel te bin jamal yaloje. Ayniwan ma xtal ta koʼtantik yantikxan te bintik jamal yaloj te kʼoem ta pasel ta jtojoltik, jich bitʼil te ya spasbotik perdón, ya yakʼbotik yip koʼtantik sok ya yakʼbotik te bin ya xtuun kuʼuntik ta swenta schʼuunel koʼtantik (Mat. 6:14; 24:45; 2 Cor. 1:3). Teme ya jnopilan ta koʼtantik te bin spasoj te Dios ta jtojoltik, ya stsakxan yip te smukʼul koʼtantik ta swenta te bin ya spas ta pajel chaʼbej.

16. ¿Bin yuʼun jaʼ mukʼul majtanil te bin ya jmaliytik?

¹⁶ Te yakotik ta smaliyel te kuxlejalil ta sbajtelkʼinal, jaʼ jun mukʼul majtanil yakʼojbotik te Diose. Ya jkʼantikix te ya xkʼot ta pasel sok ay ta koʼtantik te jichnix ya xkʼot ta pasel-ae. Te bin ya jmaliytik jich kʼoem te bin-utʼil jun ancla, melel ya skoltayotik ta sitintayel te wokoliletik, te kontrainel sok te lajel. Jichnix kʼoem-euk te bin-utʼil smajkil jolal, melel ya skanantay te snopojibal kuʼuntik, ya skoltayotik ta spʼajel te bin ma lek sok jaʼ ya xbajt ta koʼtantik spasel te bin leke. Te bin ya yal te Biblia ya yakʼ xnoptsajotikxan ta stojol te Dios sok ya yakʼ kiltik te kʼuxotik ta yoʼtan. Bayal ya skoltayotik teme stsakoj yip ta koʼtantik te bin ya jmaliytike.

17. ¿Bin yuʼun tseʼel koʼtantik ta swenta te bin ya jmaliytik?

¹⁷ Ta carta te la stsʼibay te Pablo ta stojol te jchʼuunjeletik ta Roma, jich la yaltiklanbey: «Tseʼelukme awoʼtanik yuʼun te bin yakex ta smaliyele» (Rom. 12:12). Te Pablo tseʼel yoʼtan, melel schʼuunoj yoʼtan te ya yichʼ te kuxlejalil ta sbajtelkʼinal ta chʼulchan teme jun yoʼtan ta stojol te Jehová. Jaʼnix jich te joʼotik ya xjuʼ ya jtatik stseʼelil koʼtantik ta swenta te bin yakotik ta smaliyel, melel schʼuunoj koʼtantik te ya skʼotes ta pasel te bin jamal yaloj te Jehová. Jich te bin-utʼil la yal jtul salmista: «Bayel me yutsil te machʼa […] ha smucʼulinej yoʼtan te Jehová te Dios yuʼun, […] te stalel melel bin ya yal» (Sal. 146:5, 6).