1. ¿Bin ya jtatik teme ya jkʼantik sleel te koltayel yuʼun te Diose?

 TE SMELELIL tseʼel oʼtanil ma jkʼaxeluknax. Ya xjuʼ ya xjalaj sbajtelkʼinal. Kʼalal pʼijubteswan ta wits te Jesús, la yal te bin-utʼil ya jtatike. Jich la yal: «Tseʼelnaxme yoʼtanik te machʼatik ya snaʼik te ya skʼan ya sleik te koltayel yuʼun te Diose» (Mat. 5:3). Snaʼoj te pasbilotik yuʼun ya jkʼan ya jnaʼbeytik sba sok ya kichʼtik ta mukʼ te Jehová, te Jpaswanej kuʼuntik. Te bitʼil te Jehová jaʼ «te Dios te tseʼel yoʼtane», te j-abatotik yuʼune jaʼnix jich ya xjuʼ ya jta stseʼelil koʼtantik (1 Tim. 1:11).

2, 3. 1) ¿Machʼatikxan la yal te Jesús te ya xjuʼ ya sta stseʼelil yoʼtanike? 2) ¿Bin ya kiltik ta artículo ini sok bin yuʼun mukʼ skʼoplal te ya kilbeytik skʼoplale?

² ¿Jaʼnaxbal ya xjuʼ tseʼel koʼtantik teme maʼyuk jwokoltike? Maʼuk. Te kʼalal pʼijubteswan ta wits te Jesús ay bin mukʼ skʼoplal la yal, jaʼ te ya xjuʼ ya sta stseʼelil yoʼtanik te «machʼatik ya x-okʼik yuʼun mel-oʼtan», manchukme kʼax bayal smul ya yaʼiyik o yakik ta kʼaxel ta tulan wokolil. Jaʼnix jich la yal te ya xjuʼ tseʼel yoʼtanik «te machʼatik yichʼojik kontrainel ta swenta te ya spasik te bin toj ta pasele» o ya yichʼik kontrainel ta skaj te jaʼik jnopojel yuʼune (Mat. 5:4, 10, 11). Pero ¿yanixbal xjuʼ tseʼel koʼtantik-a te kʼalal ay jich ya xkʼax ta jtojoltike?

³ Te Jesús la yakʼ ta nopel te ma jaʼuknax tseʼel koʼtantik teme maʼyuk jwokoltike, jaʼ ya skʼan te ya jletik te koltayel yuʼun te Diose sok te ya xnoptsajotik ta stojol (Sant. 4:8). ¿Bin-utʼil ya jpastik-abi? Ta artículo ini ya kiltik oxchajp te mukʼ skʼoplal te ya skoltayotik yuʼun tseʼeluk koʼtantik.

4. ¿Bin-a te sbabial ya skʼan ya jpastik yuʼun tseʼeluk koʼtantik? (Salmo 1:1-3).

⁴ SBABIAL: Yuʼun ayuk stseʼelil koʼtantik, ya skʼan ya jkʼopontik sok ya jnopbeytik skʼoplal te Biblia. Te Jesús la spajaltaybey skʼoplal te skʼop Dios sok te weʼelil, te ants winiketik sok te chambalametik ya skʼan ya xweʼik yuʼun ma xlajik. Pero jaʼnax te ants winiketik ya xjuʼ ya skʼoponik te Biblia sok jich ya skʼan ya spasik. Te Jesús jich la yal: «Mame jaʼuknax ta pan ya xkuxin te winike, jaʼ ya xkuxin ta swenta schʼuunbeyel skʼop te Jehovae» (Mat. 4:4). Jaʼ yuʼun ya skʼan te spisiluk ora ya jkʼopontik te sKʼop Diose. Jtul salmista jich la yal: «Bayel me yutsil te machʼa […] ha ya smulan te ley yuʼun Jehová, soc ya snaʼulan ta cʼahcʼal ahcʼabal» (kʼopona Salmo 1:1-3).

5, 6. 1) ¿Bin ya xjuʼ ya jnoptik ta Biblia? 2) ¿Bin-utʼil ya skoltayotik skʼoponel te Bibliae?

⁵ Te bitʼil kʼuxotik ta yoʼtan te Jehová, ya yalbotik ta Biblia te bin ya xjuʼ ya jpastik yuʼun ya jtatik te tseʼel oʼtanile. Ya yalbotik te bin yuʼun la yakʼbotik te jkuxlejaltik, bin-utʼil ya xjuʼ ya kamigointik sok bin ya skʼan ya jpastik yuʼun ya spasbotik perdón ta swenta te jmultike. Jaʼnix jich ya yalbotik bin lekilal ya yakʼbotik ta pajel chaʼbej (Jer. 29:11). Te kʼalal ya jnoptik ta Biblia spisil-abi ya yakʼbotik stseʼelil koʼtantik.

⁶ Jich te bin-utʼil ya jnaʼtik, te Biblia yichʼoj bayal tojobteseletik te ya skoltayotik ta jkuxlejaltik. Tseʼelnax koʼtantik teme ya jchʼuuntik spasel, jaʼ yuʼun teme ya jmel koʼtantik ta swenta te jwokoltike, akʼa jlokʼestikxan tiempo ta skʼoponel te Biblia sok ta snopilanel ta koʼtantik. Te Jesús jich la yal:  «¡Bin-nax yutsil te machʼa ya yaʼiy stojol te skʼop Dios sok te ya spas ta skuxlejale!» (Luc. 11:28).

7. ¿Bin ya xjuʼ ya jpastik yuʼun ya jmulantikxan ta lek te skʼoponel te Bibliae?

⁷ Te kʼalal ya jkʼopontik te Biblia, jlokʼestik tiempo «ta smulanel». ¿Bin ya skʼan ya yal-abi? Kakʼtik jun ejemplo. Jnop kaʼiytik te ay machʼa ya schajpanbotik te weʼelil te bayal ya jmulantike. Pero maʼyuk bayal jtiempotik yuʼun ya jweʼtik o yan ban baem koʼtantik-a te oranax ya jweʼtik te ma jtabeytik sbujtsʼe. Te kʼalal ya xlaj koʼtantik ta weʼel la kiltik te oranax weʼotik sok ya jnoptik te jaʼ lek te kʼunuk weʼotik sok te lajuk jmulantik te weʼelile. Jaʼnixme jich ya xjuʼ ya xkʼot ta pasel teme oranax ya jkʼopontik te Bibliae. Oraniwan ya jkʼopontik te ma xkakʼtik tiempo yuʼun «ya jmulantik» te bin ya snojptesotik te Jehová. Jlokʼestik tiempo ta smulanel te bin ya jkʼopontik, ta snopel te bin yak ta kʼoel ta pasel, te jich yaʼiyel te ya kaʼiytik te kʼopetik sok ta snopilanel ta koʼtantik. Teme jich ya jpastike, tseʼelxan koʼtantik.

8. ¿Bin-utʼil yak ta spasel te bin ay ta swenta «te j-abat te jun yoʼtan sok pʼij»? (Jaʼnix jich ilawil te nota).

⁸ Te Jesús yakʼojbey ta swenta «te j-abat te jun yoʼtan sok pʼij» te ya yakʼbotik te bintik ya xtuun kuʼuntik ta swenta schʼuunel koʼtantik sok leknax chajpanbil yuʼun (Mat. 24:45). * Jaʼ lokʼem tal ta sJun Dios spisil te bintik ya schajpan te j-abat te jun yoʼtan sok pʼij (1 Tes. 2:13). Spisil-abi ya skoltayotik yuʼun ya jnaʼtik te bin ya snop te Jehová, jich te bin-utʼil ya yal te Biblia. Jaʼ yuʼun ya jkʼopontik Te J-ilkʼinal ta toyol sok te ¡Wikʼame asit!, soknix articuloetik te ay ta jw.org. Jaʼnix jich ya jchajpan jbatik ta tsoblejetik yuʼun olil semana sok tsoblejetik yuʼun slajibal semana, soknix ya kiltik te programaetik JW Broadcasting^® teme ayix ta jkʼoptike. Teme ya jpastik tulan ta stuuntesel te bintik ya yakʼbotik te Jehová, jaʼme ya skoltayotik yuʼun ya jtatikxan te stseʼelil koʼtantik.

9. ¿Bin-a te schebal ya skʼan ya jpastik yuʼun tseʼelxan koʼtantik?

⁹ SCHEBAL: Yuʼun ayuk stseʼelil koʼtantik, ya skʼan ya jchʼuuntik te mantaliletik yuʼun te Jehová. Jtul salmista jich la yal: «Bayel yutsil spisil machʼatic ya yichʼic ta mucʼ te Jehová, te ya xbehenic ta behetic yuʼune» (Sal. 128:1). Te xiʼel te Jehová ya skʼan ya yal te ya kichʼtik ta mukʼ, jaʼ yuʼun ma jpastik te bin ma smulane (Prov. 16:6). Jaʼ yuʼun ya jpastik tulan ta spasel te bin ya yal te Biblia ta swenta te bin lek sok te bin maba leke (2 Cor. 7:1). Teme ya jpastik te bin ya smulan te Jehová sok ya jpʼajtik te bin ya yilaye, tseʼelxan koʼtantik (Sal. 37:27; 97:10; Rom. 12:9).

10. Te bitʼil jnaʼojtikix bin-a te skʼanojel yoʼtan te Diose, ¿bin ay ta jwentatik spasel? (Romanos 12:2).

¹⁰ (Kʼopona Romanos 12:2). Ayniwan machʼa snaʼoj te jaʼ ay ta swenta te Jehová yalel te bin lek sok te bin ma lekuke, pero jaʼnix jich ya skʼan ya schʼuunbey te smantale. Kakʼtik jun ejemplo. Ayniwan machʼa ya snaʼ te jaʼ ay ta swenta te ajwaliletik yalel teme tulan o ma tulan ya yichʼ tijel te carroe, pero maniwan skʼan ya schʼuun te mantaliletike. Jich yuʼun tulanxan ya stij te bin-utʼil ma skʼan pasele. Jaʼnix jich te joʼotike ya kakʼtik ta ilel ta jtaleltik te jaʼ lek te schʼuunel te mantaliletik yuʼun Jehová (Prov. 12:28). Jich schʼuunoj-a te David,  melel jich la yalbey te Jehová: «Yac awaʼbon quil te sbehlal cuxlejal; ay bayel tseʼel-oʼtanil ta atojol, ta awaʼel ay bintic mulantic sba sbahtel qʼuinal» (Sal. 16:11).

11, 12. 1) ¿Bin yuʼun ya skʼan ya jtsajtay jbatik te kʼalal ay jwokoltik o chebajem koʼtantik? 2) ¿Bin-utʼil ya skoltayotik te bin ya yal Filipenses 4:8 swenta ya jtsatik ta lek te bin ya jkʼasestik kʼajkʼal-ae?

¹¹ Te kʼalal yakotik ta mel-oʼtan o chebajem koʼtantik, yaniwan jle bin ya jpastik yuʼun ya xchʼay ta koʼtantik-a te jwokoltik sok ma chopoluk te jich ya jpastike. Pero ya skʼan ya jtsajtay jbatik swenta ma jpastik te bin ya yilay te Jehová (Efes. 5:10-12, 15-17).

¹² Ta carta te la stsʼibay te jpuk-kʼop Pablo ta stojol te jchʼuunjeletik ta Filipos, la yalbey te akʼa spasik te bintik stojil ta pasel, spisil te bintik ma kapaluk ta mulil, te ya yakʼik ta ilel kʼuxul oʼtanil sok lekil taleliletik (kʼopona Filipenses 4:8). Manchukme ma jaʼuk yak ta yalbeyel skʼoplal ta swenta te bin ya yichʼ kʼasesel kʼajkʼal-ae, ya xjuʼ ya skoltayotik. ¿Bin yuʼun ma jichuk ya jpastik ini? Te kʼalal ya jkʼopontik te versículo-abi jnop kaʼiytik teme lek te «kʼayojetik», «peliculaetik», «libroetik» o «videojuegoetik» te ya kaʼiytik o ya kiltik. Jaʼme ya skoltayotik ta stael ta nopel bintik-a te lek ya yil te Dios sok bintik-a te maʼuke. Ya jkʼan ya jchʼuuntik spasel spisil te mantaliletik yuʼun te Jehová (Sal. 119:1-3). Jich maʼyuk bin ya yalbotik koʼtantik, sok ya skoltayotik yuʼun ya jtatik te stseʼelil koʼtantik (Hech. 23:1).

13. ¿Bin-a te yoxebal te ya skoltayotik ta stael te stseʼelil koʼtantike? (Juan 4:23, 24).

¹³ YOXEBAL: Ya skʼan te jaʼ nail ya kakʼ ta jkuxlejaltik te yichʼel ta mukʼ te Jehová. Te Jehová jaʼ Jpaswanej kuʼuntik, jaʼ yuʼun ya skʼan ya kichʼtik ta mukʼ (Apoc. 4:11; 14:6, 7). Te bin mukʼxan skʼoplal ta jkuxlejaltike, jaʼ te ya kichʼtik ta mukʼ te bin-utʼil ya skʼan stukele, «ta swenta espíritu sok smelelil» (kʼopona Juan 4:23, 24). Ya jkʼantik te jaʼ ya stojobtesotik te schʼul espíritu te Dios ta yichʼel ta mukʼ jich te bin-utʼil ya yal te Biblia. Te abatinel ta stojol ya skʼan te jaʼ mukʼxan skʼoplal ta jkuxlejaltik manchukme makbil te kaʼteltike. Ta ora ini kʼaxem ta 100 ta tul hermanoetik sok hermanaetik yichʼojik chukel ta skaj te testigoik yuʼun Jehová. * Manchukme jich-abi, tseʼel yoʼtanik sok ya spasik tulan yuʼun ya skʼoponik Dios, ya snopik te Biblia sok ya scholik skʼop Dios. Tseʼel koʼtantik manchukme ya kichʼtik utsʼinel o kontrainel, melel jnaʼojtik te jaʼ ya skoltayotik te Jehová sok ya smajtantesotik (Sant. 1:12; 1 Ped. 4:14).

14. ¿Bin kʼax ta stojol jtul kerem yuʼun Tayikistán, sok bin yuʼun?

¹⁴ Ay experienciaetik ta jkʼajkʼaleltik te ya yakʼ ta ilel te tseʼelxan koʼtantik teme ya jpastik te oxchajp te bin la kalbeytikix skʼoplal, manchukme yanyantik-a te bin ya xkʼax ta jkuxlejaltik. Kiltik te bin kʼax ta stojol te Yovidón Boboyónov, jtul kerem te 19 yaʼbilal te yak ta kuxinel ta Tayikistán. Ta 4 yuʼun octubre 2019 tal ta ikʼel lokʼel ta sna, ta skaj te ma la skʼan la yakʼ te servicio militar. Bayal u la yichʼ otsesel ta cárcel sok jich la yichʼ ilel te tulan te smule. Ta bayal nacionetik lokʼ ta noticia te ma stojiluk te bin la yichʼ pasbeyele. La yichʼ alel te la yichʼ majel yuʼun ya yal te juramento militar sok te ya slap skʼuʼ soldado. Ta patil jun tribunal la yal te ay smule sok la yichʼ tikunel bael ta  tulan aʼtel jaʼto te kʼalal te ajwalil yuʼun te nación-abi la yal te maʼyuk smule sok la yal ta mantal te ya yichʼ lokʼesele. Te Yovidón jun yoʼtan la yakʼ sba ta stojol te Jehová sok tseʼel yoʼtan te kʼalal yak ta kʼaxel-a te wokole. ¿Bin-utʼil kujch yuʼun? Jaʼ te la snaʼ te ya skʼan ya sle te koltayel yuʼun te Diose.

15. ¿Bin-utʼil la sle koltayel yuʼun Dios te Yovidón te kʼalal ay ta chukel-ae?

¹⁵ Kʼalal ay ta cárcel-a te Yovidón, la sle te koltayel yuʼun te Dios manchukme maʼyuk yuʼun-a te Biblia ni jaʼuk te publicacionetike. ¿Bin la spasix-a? Te kʼalal te hermanoetik ya yichʼbeyik bael te sweʼele, ya stsʼibaybeyik bael te texto yuʼun te jujun kʼajkʼal. Jaʼ yuʼun te Yovidón juʼ skʼoponbel te Biblia sok snopilanel ta yoʼtan ta jujun kʼajkʼal. Te kʼalal lokʼ ta chukojibal, jich la yaltiklanbey te machʼatik maʼyuk jich kʼaxem ta stojolik: «Pasaik tulan te yakuk xnoptsajex ta stojol te Jehová te bitʼil libre ayexe, jaʼ yuʼun kʼax mukʼ skʼoplal te ya akʼoponik te Biblia ta jujun kʼajkʼal sok te publicacionetik kuʼuntik».

16. ¿Bin bajt ta yoʼtan spasel te Yovidón?

¹⁶ Te hermano Yovidón la schʼuun spasel te mantaliletik yuʼun Jehová. Ma jaʼuk la snopilan ta yoʼtan te bintik ma leke sok maba la spas, jaʼ la yakʼ ta yoʼtan te Jehová sok te bin mukʼxan skʼoplal ya yil te Diose.  Ya slokʼes tiempo ta yilel te bintik tʼujbil spastiklanoj te Diose. Ta jujun sab ya xtijot yuʼun te skʼayoj te jaʼmal mutetik, ta ajkʼabal ya yil te U sok te ekʼetike. Jich la yal: «Te majtaniletik te yakʼojbotik te Jehová ya yakʼbon stseʼelil koʼtan sok leknax ya kaʼiy jba yuʼun». Te kʼalal mukʼ skʼoplal ta koʼtantik spisil te bintik ya yakʼbotik te Jehová ta swenta schʼuunel koʼtantik sok te bintik ya xtuun kuʼuntike, tseʼel koʼtantik yuʼun sok jaʼ ya yakʼbotik kiptik yuʼun ya xkujch kuʼuntik.

17. ¿Bin-utʼil ya xjuʼ ya xkoltayot te bin ya yal 1 Pedro 1:6, 7 te machʼa jich yak ta kʼaxel ta stojol te bin-utʼil te Yovidón?

¹⁷ Te Yovidón jaʼnix jich jaʼ nail la yakʼ ta skuxlejal te yichʼel ta mukʼ te Jehová. Snaʼoj te jaʼ kʼax mukʼ skʼoplal te jun yoʼtan ya yakʼ sba ta stojole. Te Jesús jich la yal: «Jaʼnaxme xa awichʼ ta mukʼ te Jehová te Dios awuʼune sok jaʼnaxme xa awakʼ aba ta abatinel ta stojol» (Luc. 4:8). Te comandanteetik sok te soldadoetik ya skʼanik te ya xlaj te schʼuunel yoʼtan te Yovidón. Pero te Yovidón ya skʼopon te Dios sok spisil yoʼtan ta kʼajkʼal ajkʼabal, ya skʼanbey koltayel yuʼun ya xkujch yuʼun sok junuk yoʼtan. Manchukme bayal bintik ma stojil la yichʼ pasbeyel kujch yuʼun, sok ma la yijkitay te schʼuunel yoʼtane. Te bin lek la stae jaʼ te tseʼel yoʼtan, melel la yichʼ ilel te bantito kʼalal ay yip te schʼuunel yoʼtan te maʼyuk yuʼun-a te kʼalal mato yichʼoj ikʼel bael-a, majel-a sok chukel-a (kʼopona 1 Pedro 1:6, 7).

18. ¿Bin-utʼil ya xjuʼ te spisil-ora tseʼel koʼtantik?

¹⁸ Te Jehová ya snaʼ te bin ya xtuun kuʼuntik yuʼun tseʼel koʼtantik. Teme ya jpastik te oxchajp te bin la kiltikix ta artículo ini, spisil-ora tseʼel koʼtantik manchukme ya xkʼax jwokoltik. Jich yuʼun, ya xjuʼ te jich ya kaltik: «¡Bayel me yutsil te pueblo te ha Dios yuʼun te Jehová!» (Sal. 144:15).