Te 40 jaʼbil te ayinik ta jochol takin kʼinal te israeletik, te bin bayal la sweʼik jaʼ te maná (Éx. 16:35). Jaʼ nix jich akʼbotik cheb buelta codornisetik yuʼun te Jehová (Éx. 16:​12, 13; Núm. 11:31). Pero ayxan yan te bintik la sweʼik te israeletik, manchukme jtebuknax.

Ay baeltik te Jehová ya stojobtes bael ta lugaretik te «banti ya scux yoʼtanic», sok tey ya staik te jaʼ ya yuchʼik sok te bin ya sweʼik (Núm. 10:33). Jun te lugar-abi jaʼ te slokʼib jaʼetik yuʼun Elim, te «banti ay 12 ta chajp slokʼib jaʼetik sok 70 ta tejkʼ palmeraetik», jaʼniwan palmeraetik te ya sitinik (Éx. 15:​27, TNM). Te libro Plants of the Bible ya yalbey skʼoplal te palmera te bayal ya yakʼ sit jaʼ «te bayuk ya xchʼi te bayal ya xtuun yuʼunik te ants winiketik tey ta jochol takin kʼinal, melel ya xjuʼ ya yichʼ tuuntesel ta aceite sok ta yantikxan».

Ayniwan la skux yoʼtanik te israeletik ta jun lugar te banti ay bayal lamal kʼinal te jich naʼbil sba bitʼil Farán ta ora ini, te ay ta spamlej yuʼun Farán. a Te libro Discovering the World of the Bible, ya yal ta swenta te spamlej ini sok te mukʼul jaʼ «ay 130 kilómetro snajtil, jaʼ te spamlej te ay jaʼ tey-a te kʼax mukʼ, te kʼax tʼujbil sok te naʼbil sba ta Sinaí». Te libro jich ya yalxan: «Ta spamlej-abi ayniwan 45 kilómetro te banti ya xlokʼ tal te jaʼe, tey ay-a te slokʼib jaʼetik yuʼun Farán, te banti ay bayal palmeraetik. Ta kʼinal-abi ay 4.8 kilómetro snajtil sok kʼaxem ta 610 metro stoyolil-a te mare. Jaʼ te tsʼunbil kʼinal Edén yuʼun Sinaí. Jaʼto tal ta namey kʼinal bayal ants winiketik ya xtalik ta lugar-abi ta swenta te palmeraetik».

Kʼalal lokʼik bael ta Egipto te israeletike, laniwan yichʼik bael wotsʼbil harina te banti ya yichʼ wotsʼel sok laniwan yichʼik bael sbakʼ sit awal tsʼunubil sok aceite. Pero maniwan jalaj te bintik la yichʼik baele. Jaʼnix jich, la yichʼik bael «bayel tuminchijetic, tentsunetic soc wacaxetic» (Éx. 12:​34-39). Pero, ta skaj te skʼuxul kʼajkʼal ta jochol takin kʼinal bayalniwan cham te chambalametik-abi jaʼnix jich ayniwan la sweʼik te israeletik sok laniwan yakʼik ta chikʼbil majtanil ta stojol te lotil diosetik-euk (Hech. 7:​39-43). b Manchukme  jich-abi, te israeletik la schʼitesik wakaxetik sok tuminchijetik. Jich ya jnaʼtik ta swenta te bin la yal te Jehová kʼalal la skʼaxuntaybeyik smantal: «Te awal-anichʼanic, ha jcanan-tuminchij ya xcʼohtic ta jochol taquin qʼuinal [40 jaʼbil]» (Núm. 14:33). Jaʼ yuʼun ayniwan yuʼunik leche sok tiʼbal, pero maba tikʼ ya xweʼik-a te oxeb millón ta tul ants winiketik ta 40 jaʼbil. c

¿Banti la staik te jaʼ sok te sweʼel te chambalametike? d Ta tiempo-abi bayalniwan ya yakʼ jaʼal, jaʼ yuʼun bayalniwan jaʼmaletik ta jochol takin kʼinal. Te artículo «Arabia» te ay ta libro Perspicacia para comprender las Escrituras, ya yal te 3.500 jaʼbil te kʼaxem tale «ta Arabia aytonix bayal jaʼ-a, ma jichuk bitʼil ta ora ini». Jich ya yalxan: «Te bitʼil bayal spamlej sok takin be jaʼetik ta jun tiempo bayal yaʼlel-a, jaʼ jun prueba te ta namey kʼinal bayal la yakʼ jaʼal sok te ya xlokʼ be jaʼetik-a». Manchukme jich, tey ta jochol takin kʼinal wokol kuxinel (Deut. 8:​14-16). Te ayuk bitʼil ma akʼbotik jaʼ yuʼun te Jehová ta swenta jun milagro, lajikniwan te israeletik sok te chambalametik yuʼunik (Éx. 15:​22-25; 17:​1-6; Núm. 20:​2, 11).

Te Moisés la yalbey te israeletik te bitʼil akʼbotik sweʼe maná yuʼun te Jehová yuʼun jich ya snaʼik-a «te ma haʼuc nax ya xcuxaj ants-winic yuʼun te pan, ha ya xcuxaj yuʼun spisil te cʼop ya xlocʼ ta ye te Jehová» (Deut. 8:3).