1, 2. 1) ¿Binwan ya xjuʼ ya jojkʼoybey jbatik? 2) ¿Bin ya xbajt kilbeytik skʼoplal te artículo ini?

 SPISIL te ants winiketik ayniwan baeltik te xchebet yoʼtanik. a Nopa awaʼiy ta swenta jtul jchʼiel te ma schʼuun yoʼtan te ya xkoltayot yuʼun te Jehová, ta skaj-abi ma xyichʼ jaʼ o nopa ta swenta jtul hermano te kʼalal jchʼielto-a jaʼ nail la spas ta skuxlejal te spasbeyel yaʼtel te Jehová, ma jaʼuk te sleel takʼin. Ta ora ini ayix sfamilia sok jich ya yaʼiy te ya skʼan ya slexan bayal takʼin yuʼun ya swentain te sfamiliae, jaʼ yuʼun yaniwan sjojkʼoybey sba teme lek te bin la sta ta nopel spasele. Yanxan ejemplo jaʼ ta swenta jtul hermana te ayix yaʼbilal te maʼyukix bayal yipe sok te chebajem yoʼtan, melel ma xjuʼix ya spas te bin ya spas ta nailal-a. Ayniwan ya apasbey aba te jojkʼoyeletik ini: «¿Yabal yichʼon ta wenta te Jehová? ¿Aybal skʼoplal ta yoʼtan spisil te bintik la jpas ta stojole? ¿Yatobal xtuunon yuʼun?».

² Te bintik ma lek ya jnoptik yaniwan xjuʼ te ya spejkʼanbey  yip te schʼuunel koʼtantik sok ya yakʼ te ma x-abatinotikix ta stojol te Jehová. Ta artículo ini ya kiltik bin-utʼil te Biblia ya skoltayotik teme jich ya kiltik te maʼyuk jkʼoplaltik ta sit te Jehová, teme jich ya kiltik te maba lek te bin la jtatik ta nopel spasel ta namey o teme jich ya kaʼiytik te maba ya xtuunotikix yuʼun te Jehová.

TE BIN-UTʼIL YA XJUʼ YA JCHAJPANTIK TE BIN MA XKʼOT TA KOʼTANTIK

3. ¿Bin ya skoltayotik ta snaʼel te bin ma xkʼot ta koʼtantike?

³ Teme ay bin ma xkʼot ta koʼtantik ya skoltayotik te sKʼop Dios. Ta swenta-abi ya xnoptsajotik ta stojol te Jehová, ya kamigointikxan ta lek sok ya yichʼxan yip te schʼuunel koʼtantik ta stojol (1 Cor. 16:13).

4. ¿Bin-utʼil ya jtsajtay kiltik spisil te bin ya jpastik jich bitʼil ya yal 1 Tesalonicenses 5:21?

⁴ (Kʼopona 1 Tesalonicenses 5:21). Te Biblia jich ya yalbotik: «Tsajtaya awilik spisil te bintik ya apasik». ¿Bin-utʼil ta pasel-abi? Jaʼ te kʼalal ya jpajtik sok te Biblia te bin ya jnoptik. Nopa ta swenta jtul jchʼiel te maba seguro ay te ya x-ichʼot ta wenta yuʼun te Jehová. ¿Lekbal te jich ya snope? Maʼuk, jaʼ lek te ya yil ta Biblia te bin yilel ya x-ilot yuʼun te Jehová.

5. ¿Bin-utʼil ya kaʼiytik te sujtib ya yakʼbotik te Jehová?

⁵ Kʼalal ya jkʼopontik te sKʼop Dios jich yilel te ya skʼoponotik te Jehová. Pero yuʼun ya kaʼiytik te bin ya yal ta swenta te bin ma xkʼot ta koʼtantik ay bin ya skʼan ya jpastikxan. Ya skʼan ya jletik textoetik ta Biblia te ya yalbey skʼoplal ta swenta te bin ya jmel koʼtantik yuʼun sok te ya jtuuntestik te aʼtejibaletik te yakʼojbotik te organización ta swenta te tema-abi (Prov. 2:​3-6). Mukʼ skʼoplal te yakuk jkʼanbeytik koltayel te Jehová ta sleel te información sok te ya skoltayotik ta sleel te sujtibe. Kiltik textoetik yuʼun te Biblia sok jletik información te ya xtuun kuʼuntik, jaʼnix jich lek te yakuk kilbeytik skʼoplal relatoetik te ay ta Biblia ta swenta ants winiketik te jaʼnix jich kʼaxem ta stojolik-euk.

6. ¿Bin-utʼil ya skoltayotik te tsoblejetik yuʼun ya jtabeytik sujtib te bintik ma xkʼot ta koʼtantik?

⁶ Jaʼnix jich ya kaʼiybeytik skʼop te Jehová ta tsoblejetik. Teme spisil-ora ya xbootik yaniwan jtabeytik sujtib te bin ma xkʼot ta koʼtantik ta jun discurso o ta jun comentario (Prov. 27:17). Ta ora ini kalbeytik skʼoplal chaʼoxchajp te bin ma xkʼot ta koʼtantik sok te bin-utʼil ya jchajpantik.

«¿AYBAL JKʼOPLAL TA YOʼTAN TE JEHOVÁ?»

7. ¿Binwan jojkʼoyel ya jpasbey jbatik?

⁷ Ayniwan ajojkʼoybeyoj aba teme ay akʼoplal ta sit te Jehová. Teme jich ya awaʼiy aba te maʼyuk akʼoplale maniwan schʼuun awoʼtan te ya xjuʼ ya awamigoin te Jpaswanej kuʼuntike. Te ajwalil David jichniwan la sta ta nopel-euk. Chamnax yoʼtan yuʼun te bitʼil te Jehová ay skʼoplal ya yil te ants winiketik, jaʼ yuʼun jich la sjojkʼoy: «Jehová, ¿bin a te ants-winic yuʼun yac awichʼ ta cuenta, o te yal-snichʼan ants-winic yuʼun te ay scʼoblal ta awoʼtane?» (Sal. 144:3). Kiltik bin-utʼil ya jtabeytik sujtib te jojkʼoyel-abi.

8. Jich bitʼil ya yal 1 Samuel 16:​6, 7, 10-12, ¿bin ya yichʼ ta wenta te Jehová?

⁸ Te Biblia ya yakʼbotik kiltik bitʼil te Jehová ay skʼoplal ta yoʼtan te machʼatik maʼyuk skʼoplal ya yaʼiy sbaik. Jich bitʼil te kʼalal te Jehová la stikun te Samuel ta sna te Jesé yuʼun ya smalbey aceite ta sjol jtul te snichʼan yuʼun ya x-och ta ajwalil ta Israel. Te Jesé la yikʼ tal te juktul snichʼnab ta stojol te Samuel pero maba  tey ay-a te David. b Pero te Jehová jaʼ stsaojix-a te Davide (Kʼopona 1 Samuel 16:​6, 7, 10-12). ¿Bin yuʼun? Melel jaʼ la yichʼ ta wenta te bin ay ta yoʼtan sok te mukʼ skʼoplal ya yil te skʼop Diose.

9. ¿Bin yuʼun ya schʼuun awoʼtan te ay akʼoplal ta yoʼtan te Diose? (Jaʼnix jich ilawil te foto).

⁹ Nopa ta swenta te bintik spasoj te Jehová yuʼun yakʼojbat awil te ay akʼoplal ta yoʼtane, jich bitʼil te ya yakʼbat consejoetik te ya xtuun awuʼun ta akuxlejale (Sal. 32:8). Yuʼun jich ya xjuʼ ya spas, ya skʼan ya snaʼbat aba ta lek (Sal. 139:1). Kʼalal ya apas ta akuxlejal te consejoetik sok te ya awil te bin lek ya xlokʼ awuʼun-a ya schʼuunxan awoʼtan te ay akʼoplal ta yoʼtan te Jehová (1 Crón. 28:9; Hech. 17:​26, 27). Ya yil spisil te bintik apasoj ta stojol sok ya yil te tʼujbil taleliletik ay awuʼune (Jer. 17:10). Ya skʼan ya yamigoinat sok ya skʼan te ya awamigoin-euke (1 Juan 4:19).

«¿LEKBAL TE BIN LA JTA TA NOPEL SPASELE?»

10. ¿Binwan ya xjuʼ ya jojkʼoybey jbatik?

¹⁰ Kʼalal ya xkʼax bael te jaʼbiletik, ayniwan machʼa ya xjul ta yoʼtan te bintik spasoj sok ya sjojkʼoybey sba teme lek te bintik la sta ta nopel spasele. Laniwan yijkitay jun lekil aʼtelil o maba la sjach spasel jun negocio ta skaj te abatin ta stojol te Jehová. Pero, ta ora ini ya yil te machʼatik ya snaʼbey sba te jaʼ bajt ta yoʼtanik sleel takʼin sok jich yilel te leknax ay te skuxlejalike. Jaʼ yuʼun, jichniwan ya sjojkʼoybey sba: «¿Aybal bin lek lokʼ kuʼun-a ta swenta te bintik la kijkitay ta skaj te abatinon ta stojol te Jehová? O ¿lekbal ay te jkuxlejal te lajuk jpas te bintik la kijkitaye?».

11. ¿Bin yuʼun ya smel yoʼtan te machʼa la stsʼibay te Salmo 73?

 ¹¹ Teme ay jich jaʼ jojkʼoybeyoj aba, nopa ta stojol te machʼa la stsʼibay te Salmo 73, te ya yil te machʼatik ma x-abatinik ta stojol te Jehová te leknax ay te skuxlejalik, te lamal yoʼtanik sok te ay stakʼinik (Sal. 73:​3-5, 12). Te bitʼil jich yilel te leknax ay te skuxlejalik, te salmista jich ya yaʼiy te maʼyuk skʼoplal spisil te bin ya spas ta stojol te Jehová. Spisil-ora ya smel yoʼtan sok ya snop te bintik ma lek (Sal. 73:​13, 14). ¿Bin koltayot yuʼun?

12. Jich bitʼil ya yal Salmo 73:​16-18, ¿bin koltayot te salmista yuʼun lek te bin ya snope?

¹² (kʼopona Salmo 73:​16-18). Te salmista och ta Templo yuʼun Jehová. Tey la sta lamal kʼinal, ay bin lek la snop sok kʼot ta yoʼtan te manchukme leknax ay yilel te skuxlejalik te ants winiketik, ya xjuʼ te ya sta swokolik ta patil. La yil te lek te bitʼil jaʼ nail la yakʼ ta skuxlejal te abatinel ta stojol te Jehová sok akʼbot lamal kʼinal sok yip yoʼtan yuʼun ya x-abatinxan ta stojol (Sal. 73:​23-28).

13. ¿Bin-utʼil ya ata slamalil kʼinal? (Jaʼnix jich ilawil te fotoetik).

¹³ Jich bitʼil te salmista, ya xjuʼ ya ata te lamal kʼinal .¿Bin-utʼil? Nopa ta swenta te bintik lekilal ataoj sok te kʼulejalil atsoboj ta chʼulchane. Pero, ¿bin ay yuʼunik te machʼatik ma x-abatinik ta stojol te Jehová? Jaʼnax te bin ya sjap te balumilal ini. Spisil te smukʼul yoʼtanik jaʼnax ay ta swenta te bin ya staik ta skuxlejalik sok maʼyuk bin ya smaliyik ta pajel chaʼbej. Pero, te Jehová ay bin jamal yalojbotik te mukʼ skʼoplal ya yakʼ jmaliytik (Sal. 145:16). Jaʼ yuʼun ma xjuʼ ya jnaʼtik te binwan yilel te jkuxlejaltik te manchuk abatinotik ta stojol te Jehová. Pero, te bin jnaʼojtike jaʼ te machʼatik  sok skʼuxul yoʼtanik ya x-abatinik ta stojol te Jehová sok ta stojol te spatxujkik maʼyuk bin ya spasbotik falta.

«¿YABAL XTUUNON YUʼUN JEHOVÁ?»

14. ¿Bin wokolil ay ta kʼaxel ta stojol chaʼoxtul j-abatetik yuʼun Jehová sok binwan ya xjuʼ ya sjojkʼoybey sbaik?

¹⁴ Ay chaʼoxtul j-abatetik yuʼun te Jehová te ya skʼanik te ay bin ya spasikxan ta stojol te Jehová, pero ma xjuʼix yuʼunik ta skaj te ayix yaʼbilalik, ayix schamelik o yantik wokolil ta skuxlejalik. Jaʼ yuʼun, yaniwan snopik te maʼyuk skʼoplal ya x-ilotik yuʼun te Jehová sok te jichniwan ya sjojkʼoybey sbaik: «¿Yabal xtuunon yuʼun te Jehová?».

15. ¿Bin schʼuunoj yoʼtan te machʼa la stsʼibay te Salmo 71?

¹⁵ Te machʼa la stsʼibay te Salmo 71 jaʼnix jich la snop-euk. Jich la yalbey te Jehová: «Ma me xapihteson te cʼalal mayuquix quip a» (Sal. 71:​9, 18). Pero schʼuunoj yoʼtan teme jun yoʼtan ya x-abatin ta stojol te Diose, jaʼ ya xtojobtesot sok ya xkoltayot yuʼun. La snop te tseʼel yoʼtan Jehová ta stojol te machʼatik ya spasik tulan ta spasbeyel te yaʼtele, manchukme ay swokolik (Sal. 37:​23-25).

16. ¿Bin yuʼun ya kaltik te ya stuuntes Jehová te hermanoetik te ayix yaʼbilalike? (Salmo 92:​12-15).

¹⁶ Teme jaʼat ayix awaʼbilal, jichuk ya awil aba te bin-utʼil ya yilat te Jehová. Manchukme ma bayal bin ya xjuʼ ya apas, ya xjuʼ ya akʼanbey koltayel te Jehová yuʼun ya akoltay te yantik ta swenta te schʼuunel yoʼtanik (kʼopona Salmo 92:​12-15). Mame jaʼuk ya xbajt ta awoʼtan te bintik ma xjuʼ ya apase, jaʼuk ay ta awoʼtan te bintik ya xjuʼ ya apas. Ya xjuʼ ya awakʼbey yip yoʼtan te yantik ta swenta te ejemplo awuʼun sok te ay skʼoplal ta awoʼtan te yantike. Jaʼnix jich ya xjuʼ ya awalbey te bin-utʼil skoltayojat te Jehová ta kuxlejal sok te awoʼtanukix ya awil te ya xkʼot ta pasel te bin jamal yaloj te  Jehová. Mame schʼay ta awoʼtan te ay yip te oracionetik ya apas ta stojol te yantik (1 Ped. 3:12). Chikan bin-a te ay ta kʼaxel ta jkuxlejaltik, ya xjuʼ te ay bin ya jpastik ta stojol te Jehová sok ta stojol te yantik.

17. ¿Bin yuʼun ya skʼan ya jpastik tulan te manchuk ya jpajaltay jbatik sok te yantike?

¹⁷ Teme ma lek ya awaʼiy aba ta skaj te ma bayal te bin ya xjuʼ ya apas ta stojol te Jehová te jich bin-utʼil ya akʼane, juluk ta awoʼtan te bayal skʼoplal ya yil te ya apas tulane. ¡Akʼame schʼuun awoʼtan! Jaʼnix jich, teme ya xtal ta awoʼtan te ya akʼan ya apajaltay aba sok te yantik mame jichuk xa-apas. ¿Bin yuʼun? Melel te Jehová maʼyuk bin-ora ya spajotik sok te yantike (Gál. 6:4). Jich bitʼil ta swenta te María te la smalbey aceite te yichʼoj perfume ta yok te Jesús te kʼax toyem stojole (Juan 12:​3-5). Pero, te meʼba ants te la yakʼ chaʼsejp chin takʼin. (Luc. 21:​1-4). Ta sit te Jesús, te bin la spas te chaʼtul antsetik ini la yakik ta ilel te ay schʼuunel yoʼtanik. Te atat Jehová mukʼ skʼoplal ya yil te bin ya apas sok skʼuxul awoʼtan sok te ya awichʼ ta mukʼe, manchukme jich ya awil te maʼyuk skʼoplal ya awil te bin ya apase.

18. ¿Bin ya skoltayat teme ay bin ma xkʼot ta awoʼtane? (Jaʼnix jich ilawil te recuadro « Te sKʼop Dios ya skoltayat ta stabeyel sujtib te bin ma xkʼot ta awoʼtane»).

¹⁸ Ta jpisiltik ay baeltik te xchebet koʼtantik ya kaʼiy jbatik. Pero jich bitʼil la kiltikix, te sKʼop Dios ya skoltayotik yuʼun maba xchebet koʼtantik sok ya skʼan ya jlebeytik sujtib te jojkʼoyeletike jich ya xchʼay bael te bin ya yakʼ xchebet koʼtantik sok te ya jta smukʼul koʼtantik. Te Jehová ya yichʼat ta wenta, mukʼ skʼoplal ya yil te bin ya apas ta stojol sok ya skʼan ya smajtantesat mame ayuk bin-ora ya xchʼay ta awoʼtan te Jehová kʼuxat ta yoʼtan sok ya skanantay ta jujun tul te j-abatetik yuʼune.