Te slejchelul na ay ta yochibal te templo sok jaʼ yochibal te Chʼul Awilal. ¿Jayeb te spʼisojibal? Kʼalal mato sta-a te jaʼbil 2023, te Traducción del Nuevo Mundo jich ya yal-a ta 2 Crónicas 3:4: «Te slejchelul na ta yochibal te templo pajal sjamalul sok te templo 20 xujkʼubil sok 120 te stoyolil». Ay yantik Bibliaetik te jaʼnix jich ya yalik te «120 xujkʼubil» stoyolil. ¡Ya skʼan ya yal-abi te 53 metro stoyolil te slejchelul na!

Pero, te Traducción del Nuevo Mundo ta jaʼbil 2023 jelon te bin ya yal te versículo ini, ta ora ini jich ya yal: «20 xujkʼubil stoyolil», ya skʼan ya yal te ayniwan 9 metro stoyolil. a Kiltik bin yuʼun te la yichʼ jelontesel.

Ta 1 Reyes jaʼnix jich maba ya yalbey skʼoplal te stoyolil slejchelul na. Jich bitʼil ta 1 Reyes 6:​3, te Jeremías ya yalbey skʼoplal te sjamalul sok te snajtil, pero maba ya yalbey skʼoplal te stoyolil. Ta yan capítulo ya yalbey skʼoplal te bintikxan ay ta templo, jich bitʼil te Mukʼul yawil jaʼ te pasbil ta ultesbil takʼinetik, te lajunkojt carroetik sok te chaʼbal oyetik ta ultesbil cobre te ay ta slejchelul na (1 Rey. 7:​15-37). Teme yuʼun-nix kʼaxem ta 50 metro stoyolil te slejchelul nae, jaʼ kʼax toyolxan ya xkʼot te bitʼil te templo te jichuke. Jaʼ yuʼun, ¿bin-utʼil ay-a te maba la scholbey skʼoplal te Jeremías? Bayal jaʼbil ta patil, ay chaʼoxtul historiadoretik la yalik ta swenta te slejchelul na te ma jaʼuk toyolxan te bitʼil te templo yuʼun te Salomón.

Ay chaʼoxtul pʼijil winiketik ya yalik te spajkʼul te templo ma xjuʼ ya skuch te yalal te slejchelul na teme ay 120 xujkʼubil stoyolile. Ta namey kʼinal te kʼalal ya yichʼ pasel te naetik ta tonetik sok ta ladrilloetik te kʼax toyolike, kʼax mukʼ te yiptajib ya yichʼ pasel sok te kʼunkʼun ya xchʼinub moel, jich bitʼil te yochibal te temploetik ta Egipto. Pero ma jichuk pasbil te templo yuʼun te Salomón. Jaʼnix jich ay chaʼoxtul pʼijil winiketik ya yalik te ay la wakeb xujkʼubil spimil te spajkʼule o 2.7 metro. Jtul arquitecto te Theodor Busink sbiil, jich la yal: «Teme ya kichʼtik ta wenta te spimil te spajkʼul te yochibal te temploe, ma xjuʼ te 120 xujkʼubil stoyolil te slejchelul na».

Ayniwan chʼayik te kʼalal la yichʼ pasel copiaetik ta swenta te 2 Crónicas 3:4. Manchukme ay cheʼoxeb namey junetik ya yalik «120» ta versículo ini, jaʼnix jich ay yantik te ya yalik «20 xujkʼubil», jich bitʼil te Códice alejandrino te kʼaxemix ta 1,500 jaʼbil sok te Códice ambrosiano te kʼaxemix ta 1,400 jaʼbil. ¿Bin yuʼun te ma pajaluke? Jaʼ ta swenta te ta kʼopil hebreo te kʼopetik cien sok te xujkʼubil jteb ma pajal. Jaʼniwan yuʼun te machʼa ya spas copiae, maba la stsʼibay «20 xujkʼubil» la stsʼibay «ciento veinte».

Manchukme lek te ya jpastik tulan ta yichʼbeyel swentail te bin-utʼil ay-a te templo yuʼun te Salomón, pero te bin mukʼxan skʼoplal ta koʼtantike, jaʼ te bin señail te templo-abi, te jaʼ skʼoplal te mukʼul templo yuʼun Jehová. ¡Bayal ya kaltik wokol ta stojol te Jehová te ya yikʼotik ta yichʼel ta mukʼ ta mukʼul templo yuʼun! (Heb. 9:​11-14; Apoc. 3:12; 7:​9-17).