1. Jich bitʼil ya yal 2 Corintios 3:1-3 ¿bin yuʼun jaʼ jun majtanil te ya jkoltaytik yuʼun ya yichʼ jaʼ te estudiante kuʼuntike? (Ilawil te foto ta yelaw te rebista).

¿BIN yaʼiyel ya kaʼiy jbatik te kʼalal ay machʼa ya yichʼ jaʼ ta jkongregasiontike? Tseʼel koʼtantik yuʼun (Mat. 28:19). Teme joʼotik la kakʼbeytik te nojptesel yuʼun Biblia, kʼaxtoxan tseʼel koʼtantik-a (1 Tes. 2:19, 20). Te machʼatik ya yichʼik jaʼ, jich kʼoemik te bitʼil jun «carta» te ya yalbey lek skʼoplal te machʼa ya xnojptesot yuʼun soknix te kongregasione (kʼopona 2 Corintios 3:1-3).

2. 1) ¿Bin ya skʼan ya jojkʼoybey jbatik sok bin yuʼun? 2) ¿Bin-a te kurso yuʼun Bibliae? (Ilawil te nota).

² Te ayix tal chaneb jaʼbile, ta jujun u ya yichʼik akʼbeyel kurso yuʼun Biblia * 10 miyon ta tul ants winiketik ta swolol Balumilal. Jaʼnix jich yichʼojik jaʼ kʼaxem ta 280 mil ta tul ta jujun jaʼbil. Chikan ta ilel te jaʼ bayalikxan te machʼatik mato yichʼojik jaʼe. ¿Bin-utʼil ya xjuʼ ya jkoltaylantik? Te Jehová yakto ta smaliyel te ants winiketik yuʼun ya x-ochik ta jnopojel yuʼun Cristo. «Nopol ya sta yorahil te ya xlaj spisil bintic ay», jaʼ yuʼun kakʼbeytik yipal ta skoltayel te estudianteetik yuʼun ya yichʼik jaʼ (1 Cor. 7:29a; 1 Ped. 4:7).

3. ¿Bin ya jnoptik ta artikulo ini?

 ³ Te Kuerpo Gobernante la sjojkʼoybey te sukursaletik bin ya xjuʼ ta pasel swenta ya jkoltaytik te estudianteetik yuʼun ya yichʼik jaʼ, melel kʼax mukʼ skʼoplal ta kʼajkʼal ini. Ta artikulo ini sok ta yane ya jnoptik bin spasojik chaʼoxtul superintendenteetik yuʼun sirkuito, misioneroetik sok prekursoretik (Prov. 11:14; 15:22). * Te bin ya schol kaʼiytik ya xkoltayot te machʼa ya yakʼ te nojptesel sok te machʼa ya yichʼ te nojptesele. Ta artikulo ini jaʼnix jich ya jnoptik joʼchajp te bin ya xjuʼ ya spas te estudiante swenta ya yichʼ jaʼ sok bin-utʼil ya xkoltaywan te machʼa ya yakʼ te nojptesel.

4. ¿Aybal bin ya xlokʼ-a teme spisil-ora ya jnojptestik ta stiʼ sna te ants winike?

⁴ Ay bayal ermanoetik te ya yakʼbeyik kurso yuʼun Biblia ta stiʼ sna te ants winike. Te kʼalal jich ya spasike kʼunkʼun ya stijbeyik yoʼtan, pero maniwan ya xjalajik ta yakʼel te nojptesel sok maniwan ya staik ta jujun semana. Ay ermanoetik te ya skʼanbeyik snumero te ants winike yuʼun ya skʼoponik bael o ya stikunbeyik bael jun mensaje yuʼun ya yalbeyik skʼoplal jun teksto. Manchukme bayal u te jich ya spasike, ¿tikʼbal-a yuʼun ya yakʼ sba ta stojol Jehová sok yabal yichʼ jaʼ te estudiantee? Maniwan.

5. Jich bitʼil la yakʼ ta nopel te Jesús ta Lucas 14:27-33 ¿bin ya skʼan ya spas te estudiantee?

⁵ Te Jesús ay la stuuntes cheb ejemplo yuʼun ya yalbey skʼoplal te bin ya skʼan ya spas te machʼa ya skʼan ya x-och ta jnopojele. La yalbey skʼoplal jtul winik te ya skʼan ya spas jun toyol tsʼajkʼ sok jtul ajwalil te ya xbajt yakʼbey guerra yan ajwalil. Te machʼa ya skʼan ya spas te toyol tsʼajkʼe, nail ya skʼan ya yil «teme ticʼ ya xhuʼ a te jayeb ay» yuʼune. Te ajwalil jaʼnix jich ya skʼan te «nahiluc ya shuhcan sba ta snopel teme ya xhuʼ yuʼun stsalel» te skontrae (kʼopona Lucas 14:27-33). Te Jesús snaʼoj-a te jaʼnix jich ya skʼan ya spas te machʼa ya skʼan ya x-och ta jnopojele, te nailuk ya snop teme ya xjuʼ yuʼune. Swenta jich ya spas, ya skʼan ya jtijbeytik yoʼtan yuʼun ya yichʼ te kurso yuʼun  Biblia ta jujun semana. ¿Bin-utʼil ya jtijbeytik yoʼtan?

6. ¿Bin ya xjuʼ ya jpastik yuʼun ya spas ta skuxlejal te bin ya snop te estudiantee?

⁶ Teme ya kakʼbeytik nojptesel ta stiʼ snae, ya skʼan ya xjalajotik jtebuk ta yilel cheʼoxebuk bersikuloetik ta Biblia. Teme kʼayix-a te ya xjalajotik ta snopel te Biblia soke, jojkʼoybeytik teme ay banti ya xjuʼ ya xnaklotike. Teme lek la yile, jich ya jnaʼtik-a te ya smulan snopel te Bibliae. Ta patil ya xjuʼ ya jojkʼoybeytik teme ya smulan snopel te Biblia cheb buelta ta semana. Jaʼme ya xkoltayot ta spasel ta skuxlejal te bin ya snope. Kiltik te schebal te bin ya xjuʼ ya spas te estudiantee.

7. ¿Bin-utʼil ya skʼan ya schajpan sba te machʼa ya yakʼ te nojptesele?

⁷ Te machʼa ya yakʼ te nojptesel ya skʼan ya schajpan sba ta lek. Nail ya xjuʼ ya skʼopon te kapitulo o leksion sok te tekstoetike. Ya yil te bintik mukʼ skʼoplal sok ya yil te titulo, te subtitulo, te jojkʼoyeletik, te tekstoetik te ya skʼan kʼoponel, te fotoetik sok junuk bideo te ya scholbeyxan skʼoplal te bin yakik ta snopele. Ta patil, jnop kaʼiytik bin-utʼil ay skuxlejal te estudiante sok jnoptik bitʼil jamal ya jcholbeytik skʼoplal yuʼun ya xkʼot ta yoʼtan sok yuʼun ya spas ta skuxlejal (Neh. 8:8; Prov. 15:28a).

8. ¿Bin ya yal te Colosenses 1:9, 10 te ya skʼan ya jpastik ta stojol te estudiante kuʼuntike?

⁸ Te kʼalal ya jchajpan jbatike, jkʼanbeytik ta orasion te Jehová te yakuk skoltay te estudiante kuʼuntik yuʼun ya spas ta skuxlejal te bin ya snope. Jkʼanbeytik te Jehová te yakuk skoltayotik ta stuuntesel te Biblia yuʼun ya jtijbeytik yoʼtan (kʼopona Colosenses 1:9, 10). Jnoptik bin-a te wokol ya xkʼot ta yoʼtan o te wokol ya yaʼiy schʼuunele. Mame xchʼay ta koʼtantik te jaʼ ya jkʼantik te ya yichʼ jaʼe.

9. ¿Bin-utʼil ya jnojptestik ta schajpanel sba te estudiantee?

⁹ Te nojptesel ya kakʼbeytik te estudiante, jaʼ ya xkoltayot yuʼun mukʼ skʼoplal ya yil te bin spasoj te Jehová sok te Jesús ta stojol sok te ya skʼan ya snopxane (Mat. 5:3, 6). Te estudiante ya  skʼan te jaʼ ya xbajt ta yoʼtan te bin yak ta snopele. Jaʼ yuʼun ya skʼan te ya kalulanbeytik te mukʼ skʼoplal te ya schajpan te banti ya jnoptik sok te yakuk spas ta skuxlejale. Ya xjuʼ ya jkoltaytik ta schajpanel junuk leksion swenta ya yil bitʼil ta pasel. * Jnojptestik ta slebeyel sujtib te jojkʼoyeletik sok te yakuk sbon chaʼoxpʼal kʼopetik yuʼun jich ya xjul ta yoʼtan-a te sujtibe. Ta patil kalbeytik te yakuk schol kaʼiytik te bitʼil kʼot ta yoʼtane. Jich ya jnaʼtik-a teme la yichʼbey swentaile. Kiltik te yoxebal te bin ya xjuʼ ya spas te estudiantee.

10. 1) ¿Bin yuʼun mukʼ skʼoplal te ya skʼopon ta jujun kʼajkʼal te Biblia te estudiantee? 2) ¿Bin ya skʼan ya spas te kʼalal ya skʼopon te Bibliae?

¹⁰ Ma tikʼuk-a te jaʼnax ya snop ta jujun semana te Bibliae, te estudiante jaʼnix jich ya skʼan ya snop ta stukel ta jujun kʼajkʼal te Bibliae. Jichme ya yaʼiybey skʼop-a te Jehová (Jos. 1:8; Sal. 1:1-3). Jnojptestik ta stuuntesel te programa yuʼun skʼoponel te Biblia te ay ta jw.org sok te ya xjuʼ ta pasel imprimir. * Te kʼalal ya skʼopon te Bibliae, kalbeytik te akʼa snopilan ta yoʼtan te bin yilel stalel te Jehová sok te bin-utʼil ya xjuʼ ya spas ta skuxlejale (Hech. 17:11; Sant. 1:25).

11. 1) ¿Bin-utʼil ya snop skʼoponel Dios te estudiantee? 2) ¿Bin yuʼun mukʼ skʼoplal te ya skʼopon Dios ta jujun kʼajkʼal?

¹¹ Jtijbeytik yoʼtan te estudiante yuʼun ya skʼopon ta jujun kʼajkʼal te Jehová. Kʼalal ya jkʼopontik Dios ta sjajchibal sok ta slajibal te estudioe, jpastik sok spisil koʼtantik te orasion sok jtabeytik ta alel sbiil te estudiantee. Jich ya snop spasel-euk te kʼalal ya skʼopon te Jehová sok ya snop spasel ta swenta sbiil te Jesucristo (Mat. 6:9; Juan 15:16). Jnop kaʼiytik jayebto ya xnoptsaj ta stojol te Jehová teme ya skʼopon te Biblia ta jujun kʼajkʼal sok teme ya spas orasion (Sant. 4:8). Teme jich ya spasulane, jaʼme ya xtijbot yoʼtan yuʼun ya yakʼ sba ta stojol te Jehová sok te ya yichʼ jaʼe. Kiltik bin-a te ya xtijbot yoʼtan.

12. ¿Bin-utʼil ya xjuʼ ya jkoltaytik te estudiante yuʼun ya yamigoin sba sok te Jehová?

¹² Te bin ya snop te estudiante ma jaʼuknax ya xjil ta spensar, ya skʼan ya xkʼot ta yoʼtan. ¿Bin yuʼun? Melel ta koʼtantik ya xchʼi te bin ya jkʼantik, te bin ya jmulantik sok te bin yaʼiyel ya kaʼiy jbatik, jaʼ-abi jaʼ ya yakʼ te ay bin ya jpastike. Te Jesús la snaʼ ta lek nojpteswanej, pero jaʼnix jich la stijbey yoʼtan te ants winiketike (Luc. 24:15, 27, 32). Te estudiante ya skʼan ya snaʼ te aynanix-a te Jehovae sok te ya xjuʼ ya yil bitʼil sTat, sDios sok Yamigo (Sal. 25:4, 5). Te kʼalal yakotik ta snopel te Biblia soke, jaʼuk ya kalbeytik skʼoplal te tʼujbil stalel te Dios kuʼuntike (Éx. 34:5, 6; 1 Ped. 5:6, 7). Chikan bin temail te yakotik ta snopele, kakʼbeytik yil bin yilel stalel te Jehovae, jich bitʼil te skʼuxul yoʼtan, te slekil yoʼtan sok te ya snaʼ yoʼbolil jbatike. Te Jesús jich la yal: «Cʼux me xʼawaiy te Cajwaltic Dios. [...] jaʼ sbabial mandalil te mucʼ scʼoplale» (Mat. 22:37, 38, TZOXCH). Jkoltaytik te estudiante kuʼuntik yuʼun ya xchʼi skʼuxul yoʼtan ta stojol te Diose.

13. Ala jun ejemplo te bitʼil ya xjuʼ ya jkoltaytik te estudiante kuʼuntik yuʼun ya yil te tʼujbil stalel te Jehovae.

¹³ Te kʼalal ya xkʼopojotik sok te estudiante kuʼuntike, kalbeytik te kʼux ta koʼtantik te Jehová. Jichniwan ya sta ta ilel te ya skʼan ya yamigoin-euke sok te kʼux ta yoʼtane (Sal. 73:28). Jun ejemplo, te kʼalal ayotik ta skʼoponel jun publikasion o jun teksto te ya yakʼ ta ilel te ay skʼuxul yoʼtan te Jehová, te ay spʼijil yoʼtan, yuʼel sok te toj yoʼtane, kalbeytik te estudiante kuʼuntik te jaʼ ta swenta-abi te kʼux ta koʼtantik te jTatik ay ta chʼulchane. Kiltik te yoʼebal te bin ya xkoltayot te estudiante yuʼun ya yichʼ jaʼ.

14. Ta swenta te bin ya yal Hebreos 10:24, 25, ¿bin ya xkoltayot te estudiante yuʼun ya yichʼ jaʼ?

¹⁴ Jpisiltik ya jkʼantik te yakuk yichʼik jaʼ te estudianteetike. Swenta jich ya spasik, jtijbeytik yoʼtan yuʼun ya xbajtik ta tsoblejetik. Te ermanoetik te pʼijubenikix ta lek ta scholel skʼop Dios ya yalik te oranax ya yichʼik jaʼ te estudianteetik teme ya xbajtik ta tsobleje (Sal. 111:1). Ay ermanoetik te ya yalbey te  s-estudianteik te bayal bin ya xjuʼ ya snopik ta tsoblej te maba ya snopik ta kurso yuʼun Biblia. Jkʼoponbeytik Hebreos 10:24 sok 25 yuʼun ya jkoltaytik ta yilel bin lek ya sta teme ya xbajt ta tsoblejetike (kʼopona). Jaʼnix jich ya xjuʼ ya kakʼbeytik yil te bideo ¿Bin ya yichʼ pasel ta tsoblejetik kuʼunkotik? * Sok jtijbeytik yoʼtan yuʼun mukʼ skʼoplal ya yil te tsoblejetike.

15. ¿Bin ya xjuʼ ya jpastik yuʼun spisil-ora ya xbajt ta tsoblej te estudiante kuʼuntike?

¹⁵ ¿Bin ya xjuʼ ya jpastik teme baeltikto ya xkʼot ta tsoblej te estudiante kuʼuntik o teme maʼyuk kʼoeme? Jcholbeytik yaʼiy te bin la jmulantik ta tsobleje, jichme ya jtijbeytik yoʼtan-a. Kakʼbeytik te rebista Te J-ilkʼinal ta toyol o te Sjunal kaʼteltik ta swenta tsoblej sok kakʼbeytik yil te bin ya jnoptik ta yan semanae, ta patil jojkʼoybeytik bin-a te la smulane. Bayalme ya xkoltayot teme ya xbajt ta tsoblej ta sbabial bueltae, melel ma spaj te bin yaʼiyoj o yiloj ta yan relijione (1 Cor. 14:24, 25). Teyme ya snaʼbey sba te ermanoetik te jaʼik jun lekil ejemplo sok te ya xkoltayot yuʼun ya yichʼ jaʼ.

16. 1) ¿Bin ya skʼan ya jpastik yuʼun ya yichʼ jaʼ te estudiante kuʼuntike? 2) ¿Bin ya jnoptik ta yan artikulo?

¹⁶ ¿Bin-utʼil ya jkoltaytik te estudiante kuʼuntik yuʼun ya yichʼ jaʼ? Jtijbeytik yoʼtan te manchuk ya schʼay ta jujun semana te nojptesel sok te yakuk schajpan te jun ya jnoptik soke. Jnojptestik ta spasel orasion sok ta snopel te Biblia ta jujun kʼajkʼal, jtijbeytik yoʼtan te yakuk yamigoin te Jehová sok te yakuk xbajt ta tsoblejetike. (Ilawil te rekuadro « Te bin ya skʼan ya spas te estudiante»). Ta yan artikulo ya jnoptik joʼchajp te bin ya skʼan ya jpastik te kʼalal ya kakʼtik kurso yuʼun Biblia, jichme ya jkoltaytik te estudiante kuʼuntik yuʼun ya yichʼ jaʼ.