1. ¿Bin-a te ya skʼan ya jtatik ta nopel spasele?

TE BIN ya staik ta nopel spasel te meʼil tatiletike, ya xjuʼ ya yakʼbey swokol o stseʼelil yoʼtan te yal snichʼnabike. Pero te alnichʼanetik jaʼnix jich ya xjuʼ ya staik ta nopel te bin ya spasike, te bin leke jaʼ te ya x-abatinotik ta stojol te jTatik Jehová (Sal. 73:28).

2. 1) ¿Bin la spasik te José sok te María? 2) ¿Bin la sta ta nopel spasel te Jesuse?

² Te bin la spasik te José sok te María la yakʼ ta ilel te jaʼ ya skʼanik te yakuk x-abatinik ta stojol Jehová te yal snichʼnabike (Luc. 2:40, 41, 52). Te Jesús la sta ta nopel te ya spas te skʼanojel yoʼtan te Jehovae (Mat. 4:1-10). La yakʼ ta ilel tʼujbil talelil, slekil yoʼtan, yip yoʼtan sok jun yoʼtan ta stojol te Jehová. Te meʼil tatiletik te kʼux ta yoʼtanik te Jehová ya skʼanik te jichuk stalelik-euk te yal snichʼnabike.

3. ¿Bin jojkʼoyeletik ya kilbeytik sujtib ta artikulo ini?

³ Ta artikulo ini ya kilbeytik sujtib te jojkʼoyeletik ini: ¿Bin la spas te Jehová ta stojol te Jesuse? ¿Bin ya xjuʼ ya snopik te meʼil tatiletik ta swenta te bin la spas te José sok te María? ¿Bin ya xjuʼ ya snopik te achʼix keremetik ta swenta te bin la spas te Jesuse?

4. ¿Bin la spas te Jehová ta stojol te sNichʼane?

⁴ Te Jehová la stsa ta lek te machʼa ya schʼites te Jesús (Mat. 1:18-23; Luc. 1:26-38). Te bin la yal te María ta Lucas 1:46-55 ya yakʼ ta ilel te kʼax kʼux ta yoʼtan te  Jehová sok te mukʼ skʼoplal ta yoʼtan te sKʼope. Te José la schʼuun te bin albot yuʼun te Jehová, jich la yakʼ ta ilel te kʼux ta yoʼtan sok te ya skʼan ya yakʼbey stseʼelil yoʼtane (Mat. 1:24).

5, 6. ¿Bintik wokolil kʼax ta stojol te Jesuse?

⁵ Te Jehová maba la stsa te machʼa jkʼulej swenta ya schʼitesik te Jesuse. Te majtanil la yakʼik te José sok te María te kʼalal ayin te Jesuse la yakʼ ta ilel te pobreike (Luc. 2:24). Te José ayniwan schʼin karpinteria ta stsʼeel sna ta Nazaret. Maniwan bayal stakʼinik-a sok tsobol yal snichʼnabik, ayniwan juktulik (Mat. 13:55, 56).

⁶ Te Jehová la skanantay te sNichʼane, pero maba la slokʼesbey spisil te swokole (Mat. 2:13-15). Te Jesús laniwan smel yoʼtan te kʼalal la yil te ay chaʼoxtulik ta sfamilia ma la schʼuunik te jaʼ te Mesiase (Mar. 3:21; Juan 7:5). Jaʼnix jich kʼux la yaʼiy te kʼalal laj te José te jaʼ chʼitesot yuʼune. Sok jaʼniwan aʼtejix ta karpinteria, melel jaʼ bankilal-a (Mar. 6:3). Ta patil bael jaʼ jil ta swenta skanantayel te sfamiliae sok bayalniwan aʼtej yuʼun ya yakʼbey te bin ya xtuun yuʼunike. Jich yuʼun ya snaʼ te bin yaʼiyel te lujbele.

7. 1) ¿Bintik ya xjuʼ ya sjojkʼoybey sbaik te meʼil tatiletike? 2) Jich bitʼil ya yal Proverbios 2:1-6, ¿bin nojptesel ya skʼan ya yakʼbeyik te yal snichʼnabik te meʼil tatiletike?

⁷ Teme jaʼat sok te awinam ya akʼan awal anichʼnabik, jojkʼoybeya abaik: «¿Pekʼelbal koʼtantik sok tulanbal schʼuunel koʼtantik? ¿Yabal stsaotik te Jehová yuʼun ya jchʼitestik jtul alal?» (Sal. 127:3, 4). Pero teme meʼil tatilatixe, jojkʼoybeya aba: «¿Yabal jnojptes ta aʼtel te kal jnichʼane?» (Ecl. 3:12, 13). «¿Yabal jpʼijubtes yuʼun ma sta swokol sok ma skʼayinbey stalel te balumilal yuʼun te Satanase?» (Prov. 22:3). Ta melel ma xjuʼ ya jkanantaytik ta spisil te wokolile, pero ya xjuʼ ya jnojptestik ta sitintayel. ¿Bin-utʼil? Jaʼ te ya jnojptestik ta sleel te tojobtesel ay ta Bibliae (kʼopona Proverbios 2:1-6). Jun ejemplo, teme ay machʼa ta afamilia ya yijkitay te Jehová, akʼbeya yil ta Biblia te awal anichʼnab bin yuʼun tulan skʼoplal te jun koʼtan ya  kakʼ jbatik ta stojol te Jehová (Sal. 31:23). O teme ay machʼa ya xlaj awuʼune, akʼbeya yil tekstoetik ta Biblia te awal anichʼnab te ya x-akʼbot smukʼul yoʼtan yuʼune (2 Cor. 1:3, 4; 2 Tim. 3:16).

8. ¿Bin-utʼil la spasik te José sok te María te bin ya yal ta Deuteronomio 6:6, 7?

⁸ Te José sok te María la spasik te bin la yal te Jehová ta Deuteronomio 6:6, 7, jich la skoltayik te Jesús yuʼun ya yakʼbey stseʼelil yoʼtan te Diose (kʼopona). Kʼux ta yoʼtanik te Jehová sok la skʼanik te kʼuxuk ta yoʼtanik-euk te yal snichʼnabike.

9. ¿Bintik la spasik te José sok te María yuʼun ya yichʼik ta mukʼ te Diose?

⁹ Te José sok te María jaʼ bajt ta yoʼtanik yichʼel ta mukʼ te Diose. Ta jujun semana ya xbajtik ta sinagoga yuʼun Nazaret sok ta jujun jaʼbil ya xbajtik ta Jerusalén ta spasel te kʼin Paskua (Luc. 2:41; 4:16). Te kʼalal ya xbeenik bael ta Jerusalén, laniwan scholbeyik te Jesús sok te yantik yal snichʼnabik te bintik kʼaxem ta stojol te lum yuʼun Dios. Jaʼnix jich laniwan yilik te lugaretik te ya yalbey skʼoplal te sJun Diose. Te kʼalal tsobolix-a te yal snichʼnabike, wokolniwan la yaʼiyik te ya yichʼik ta mukʼ ta jujun semana te Diose. Pero la spasik tulan, jaʼ yuʼun te yal snichʼnabik la yamigoinik ta lek te Jehovae.

10. ¿Bin ya xjuʼ ya snopik te meʼil tatiletik ta swenta te José sok te María?

¹⁰ ¿Bin ya xjuʼ ya snopik te meʼil tatiletik ta swenta te José sok te María? Te jaʼ mukʼ skʼoplal te ya awakʼbeyik yil te awal anichʼnabik te kʼux ta awoʼtanik te Jehová. Te mukʼul majtanil ya xjuʼ ya awakʼbeyike, jaʼ te ya akoltayik yuʼun kʼuxuk ta yoʼtanik te Jehová. Jaʼnix jich mukʼ skʼoplal te ya anojptesik ta snopel ta jujun kʼajkʼal te Biblia, te ya spas orasion, te ya xbajt ta tsoblej sok te ya schol skʼop Dios (1 Tim. 6:6). Ta melel ya skʼan ya awakʼbeyik te bin ya xtuun yuʼun te awal anichʼnabike (1 Tim. 5:8). Pero mame xchʼay ta awoʼtanik te jaʼnaxme  ya sta skolelik sok ya kuxinik ta achʼ balumilal teme ya yamigoinik te Jehová (Ezeq. 7:19; 1 Tim. 4:8). *

11. 1) Jich bitʼil ya yal 1 Timoteo 6:17-19 ¿bin-a te lek ya xjuʼ ya spasik te meʼil tatiletik? 2) ¿Bintik ya xjuʼ ya apas sok te afamilia sok bintik bendision ya ataik yuʼun? (Ilawil te rekuadro « ¿Bintik ya xjuʼ ya apasik?»).

¹¹ Ya yakʼ stseʼelil koʼtantik te bayal meʼil tatiletik ya skoltay te yal snichʼnabik yuʼun ya yichʼik ta mukʼ te Jehová. Spisil-ora ya xbajtik ta tsoblej, ta mukʼul tsoblej sok ta scholel skʼop Dios. Ay familiaetik te ya xbajtik ta territorio te banti baeltikto ya yichʼ cholel te skʼop Diose. Ay yantik te ya xbajt yulaʼtayik Betel o ya xkoltaywanik ta konstruksion. Te kʼalal jich ya spasik, yaniwan slajin stakʼinik sok wokolniwan ya yilik. Pero ya sta yip schʼuunel yoʼtanik te sfamiliaike (kʼopona 1 Timoteo 6:17-19). Te alnichʼanetik te jich la yichʼik chʼitesele, maba ya yijkitayik spasel te kʼalal mukʼikix-ae sok bayal ya yalik wokol yuʼun (Prov. 10:22). *

12. ¿Bin la spas te Jesús te kʼalal chʼie?

¹² Te Jehová la stsa ta lek te machʼa ya schʼites te Jesuse. Te José sok te María lek la schʼitesik. Pero te kʼalal mukʼub te Jesús, jaʼnix la sta ta nopel te bin la spase (Gál. 6:5). Libre ay ta stael ta nopel-a. Manchukme ya xjuʼ ya spas-a te bin ya skʼan yoʼtane, jaʼ la spas te skʼanojel yoʼtan te Jehovae (Juan 8:29). Te ejemplo yuʼune ya skoltay te achʼix keremetik ta kʼajkʼal ini.

13. ¿Bin la spas te Jesús te kʼalal jchʼielto-ae?

¹³ Te kʼalal jchʼielto-a te Jesuse, la schʼuunbey skʼop te José sok te María. Maʼyuk bin-ora la stoy sba ta stojolik, «la yacʼ sba ta cuentahinel» (Luc. 2:51). Te bitʼil jaʼ bankilal-a te Jesuse ayniwan bin ay ta swenta spasel-a. La spas tulan ta snopel te aʼtelil ya spas te José yuʼun ya xkoltaywan ta smakʼlinel te sfamiliae.

14. ¿Bin-utʼil ya jnaʼtik te la snop ta lek te sKʼop Dios te Jesuse?

¹⁴ Te José sok te María laniwan scholbeyik yaʼiy te Jesús te ayin ta swenta jun milagro sok te bin la yalik te chʼul-abatetik te kʼalal ayine (Luc. 2:8-19, 25-38). Pero te Jesús ma tikʼuk la yaʼiy-a te bin albote, la snop ta stukel te sJun Diose. ¿Bin-utʼil ya jnaʼtik te la  snop ta lek te sJun Diose? Melel te kʼalal jchʼielto-ae te maestroetik yuʼun ley «xcham yoʼtanic yuʼun te spʼijil yoʼtan soc te suhtib yuʼune» (Luc. 2:46, 47). Manchukme dosetonax yaʼbilal-a te Jesús, snaʼojix ta lek-a te jaʼ sTat te Jehovae (Luc. 2:42, 43, 49).

15. ¿Bin-utʼil la yakʼ ta ilel te Jesús te jaʼ la spasbey te skʼanojel yoʼtan te Jehová?

¹⁵ Kʼalal te Jesús kʼot ta yoʼtan bin yuʼun te tikunot tal ta Balumilal yuʼun te Jehová, la spas te bin ay ta swenta spasele (Juan 6:38). Snaʼoj-a te ya yichʼ pʼajel yuʼun te ants winiketike, snaʼel-abi maba akʼbot stseʼelil yoʼtan. Pero la schʼuunbey skʼop te Jehová, la yichʼ jaʼ ta jaʼbil 29 sok jaʼ bajt ta yoʼtan spasel te skʼanojel yoʼtan te sTate (Heb. 10:5-7). Maʼyuk bin-ora xchebet yoʼtan ta spasel te skʼanojel yoʼtan te Jehová ni jaʼuk te kʼalal yak ta kʼaxel swokol te jipil ta teʼ-ae (Juan 19:30).

16. ¿Bin ya snopik te alnichʼanetik ta swenta te Jesuse?

¹⁶ Chʼuunbeya skʼop te ameʼ atat. Te José sok te María maba tojil ants winiketik-a, jaʼnix jich te ameʼ atate. Pero te Jehová yakʼojbey ta swentaik te ya skanantayat, te ya spʼijubtesat sok te ya stojobtesate. Chʼuuna te tsitsel ya yakʼbate sok ichʼa ta mukʼ te ameʼ atat «scuenta yuʼun lec ya xcʼohat» (Efes. 6:1-4).

17. Ta swenta te bin ya yal Josué 24:15, ¿bin ya skʼan ya spas ta skuxlejalik te achʼix keremetike?

¹⁷ Tsaa machʼa ya awakʼ aba ta abatinel yuʼun. Ya skʼan te jaʼatnix ya anaʼbey sba ta lek te Jehová, bin-a te skʼanojel yoʼtan sok te bin-utʼil ya apase (Rom. 12:2). Jichme ya xjuʼ ya apas ta akuxlejal te bin mukʼ skʼoplal, jaʼ te ya x-abatinat ta stojol te Jehová (kʼopona Josué 24:15; Ecl. 12:1). Teme ya akʼopon sok ya anop te Biblia ta jujun kʼajkʼal, yame stsakxan yip te kʼuxul awoʼtan sok te schʼuunel awoʼtan ta stojol te Jehová.

18. ¿Bin ya skʼan ya spas ta skuxlejal te achʼix keremetik, sok bin lek ya staik-a?

¹⁸ Tuuntesa te akuxlejal ta stojol te Jehová. Te balumilal yuʼun Satanás ya yal te ya ata stseʼelil awoʼtan teme ya atuuntes  te apʼijil ta spasel te bin ya skʼan awoʼtane. Pero te machʼatik ya xbajt ta yoʼtanik sleel bayal sbilukik ya sta «swocolic yuʼun» (1 Tim. 6:9, 10). Teme ya awichʼ ta wenta te bin ya yal te Jehová sok teme ya apas te skʼanojel yoʼtane, «lec ya xcʼoht spisil bintic yac apas» (Jos. 1:8).

19. ¿Bin-a te ma skʼan ya xchʼay ta yoʼtanik te meʼil tatiletike?

¹⁹ Meʼil tatiletik, pasaik tulan ta skoltayel te awal anichʼnabik yuʼun ya x-abatinik ta stojol te Jehová. Akʼa smukʼulin awoʼtanik te Jehová, jaʼme ya skoltayex yuʼun lek te bin ya apasike (Prov. 3:5, 6). Mame xchʼay ta awoʼtanik ini, te awal anichʼnabik jaʼme ya spasik te bin ya yil ya apasike ma jaʼuk te bin ya awalbeyike. Jich yuʼun jaʼme xa apasik te bin lek ya yil te Jehová.

20. ¿Bintik bendision ya staik te achʼix keremetik teme ya x-abatinik ta stojol te Jehová?

²⁰ Achʼix keremetik, te ameʼ atatik ya skoltayex yuʼun lek te bin ya apasike. Pero jaʼatme ay ta awenta yakʼbeyel stseʼelil yoʼtan te Jehová. Jaʼ yuʼun tʼuna te bin la spas te Jesús sok akʼa aba ta abatinel ta stojol te jTatik te ay ta chʼulchan. Teme jich ya apase, ayme swentail ya xkʼot te akuxlejale sok tseʼelnaxme awoʼtan (1 Tim. 4:16). Sok ta pajel chaʼbej yame ata akuxlejal ta sbajtelkʼinal.