1, 2. ¿Bin-utʼil snitojbey sba skʼoplal te bin ya yal Eclesiastés 11:6 sok te scholel skʼop Diose?

AY NASIONETIK te banti ya smulanik yaʼiyel te lek yachʼil kʼope. Pero ay lugaretik te banti ma mero ya smulanik snopel te Biblia o yalbeyel skʼoplal te Diose. Chikan teme ya smulanik o maʼuk te ants winiketik ta jterritoriotike, te Jehová ya skʼan te ma jkejchantik scholel skʼop Dios jaʼto te kʼalal ya yal te maba ya yichʼix pasele.

² Te kʼalal ya xkʼot skʼajkʼalel yuʼun te Jehová, ya xlaj skʼoplal te scholel skʼop Diose, «ha to me ya xtal a te slajibal cʼahcʼale» (Mat. 24:14, 36). Te bitʼil mato xkʼot skʼajkʼalele, ¿bin ya skʼan ya jpastik yuʼun maba ya kakʼbeytik skux yoʼtan te jkʼabtik jich bitʼil ya yal Eclesiastés 11:6? (Kʼopona). *

3. ¿Bin ya jnoptik ta artikulo ini?

³ Ta yan artikulo la jnoptik chaneb te bin ya skoltayotik yuʼun ya jnaʼtikxan scholel skʼop Dios (Mat. 4:19). Ta artikulo ini ya jnoptik bin ya skoltayotik yuʼun ma jkejchantik te scholel skʼop Diose. Yame jnoptik bin yuʼun ma skʼan ya kakʼtik te ay bin ya xchʼaybotik koʼtantik, te maba ya xlujbotik sok te tulanuk te schʼuunel koʼtantike.

4. ¿Bin yuʼun jaʼ ya skʼan ya xbajt ta koʼtantik te scholel skʼop Diose?

⁴ Te Jesús la yal te bin ya xkʼot ta pasel ta slajibal kʼajkʼal sok te bin yilel stalel te ants winiketike. Sok la yal te ya xjuʼ ya schʼaytes koʼtantik ta scholel skʼop Dios, jaʼ yuʼun jich la yal: «Cuxuluc me awoʼtanic» (Mat. 24:42). Ta kʼajkʼal ini ay bintik ya xchʼaytesbot yoʼtan te ants winiketik jich bitʼil ta skʼajkʼalel te Noé (Mat. 24:37-39; 2 Ped. 2:5). Jaʼ yuʼun ya skʼan te jaʼ ya xbajt ta koʼtantik te aʼtelil yakʼojbotik te Jehová.

5. Jich bitʼil ya yal Hechos 1:6-8 ¿bantito kʼalal ya yichʼ cholel te skʼop Diose?

⁵ Ta kʼajkʼal ini jaʼ ya skʼan ya xbajt ta koʼtantik scholel te skʼop Diose. Te Jesús la yal te ma xkejchaj sok te ya xpujk ta alel te skʼop Diose (Juan 14:12). Te kʼalal laj te Jesuse ay chaʼoxtul jnopojeletik te sujtik ta stsakel chay, jaʼ yuʼun kʼalal chaʼkuxaj te Jesuse la stuuntes te yuʼel swenta ya stsakik ipal chayetik. Jich la yakʼtiklanbey snaʼ te jaʼ mukʼxan skʼoplal te ya scholik skʼop Diose (Juan 21:15-17). Te kʼalal nopol ya xmoix bael ta chʼulchan-a te Jesús la yalbey te jnopojeletik te yame yichʼ cholel skʼop Dios kʼalalto «ta stiʼil bahlumilal» (kʼopona Hechos 1:6-8). Cheʼoxeb jaʼbil ta patil la yakʼbey snaʼ te jpuk-kʼop Juan ta jun najalsitil te bin ya xkʼot ta pasel «ta scʼahcʼalel te Cajwaltic». * Te Juan la yil jtul chʼul-abat te «yichʼoj te lec yachʼil cʼop scuenta sbahtel qʼuinal yuʼun ya yalbe yaʼiy [...] spisil nacionetic, tsʼumbaliletic, cʼopiletic soc pueblohetic» (Apoc. 1:10; 14:6). Te Jehová ya skʼan te ya jpastik te mukʼul aʼtelil ini kʼalalto ta slajibal.

6. ¿Bin ya skoltayotik yuʼun ya xbajt ta koʼtantik scholel te skʼop Diose?

 ⁶ Te bin ya skoltayotik yuʼun ya xbajt ta koʼtantik te scholel skʼop Diose, jaʼ te ya jnoptik te bintik-utʼil ya skoltayotik te Jehovae. Jich bitʼil te ya yakʼbotik te publikasion te pasbilik imprimir, te ya jpastik deskargar, te ayik ta audio, ta bideo soknix te JW Broadcasting®. Te pajina kuʼuntik ta Internet kʼaxem ta mil kʼopiletik yichʼoj kʼasesel (Mat. 24:45-47). Te balumilal ini maba jun-nax ayik ta skaj te politika, te relijion sok te takʼin, pero spisil te ocho miyon ta jtul j-abatotik yuʼun Jehová jun-nax ayotik. Jun ejemplo jaʼ te bin la yichʼ pasel ta biernes 19 yuʼun abril ta 2019, la kiltik ta swolol Balumilal te bideo yuʼun te teksto ta jujun kʼajkʼal. Ta kʼajkʼal-abi la jtsob jbatik 20,919,041 ta tul ta spasel te snaʼojibal slajel te Jesuse. Ya yakʼ stseʼelil koʼtantik te tey ayotik-euk-ae sok ya stij koʼtantik ta scholelxan skʼop Dios.

7. ¿Bin-utʼil ya skoltayotik te ejemplo yuʼun te Jesuse?

⁷ Yanxan te bin ya skoltayotik yuʼun ya xbajt ta koʼtantik scholel skʼop Dios, jaʼ te ejemplo yuʼun te Jesuse. Maba la yakʼ te ay bin ya xchʼaytesbot yoʼtan ta yakʼel ta nopel te smelelil kʼope (Juan 18:37). Te Jesús la spʼaj te bin japbot yuʼun te Satanase sok maba la skʼan te ya yichʼ otsesel ta ajwalile (Mat. 4:8, 9; Juan 6:15). Maba la yakʼ te ya x-ikʼbot yoʼtan te ya sle skʼulejal sok maba la xiʼ te ya yichʼ tulan kontrainele (Luc. 9:58; Juan 8:59). Te Pablo la yal te maba ya xlujbotik sok maba ya xchʼay te yip koʼtantik teme ya jtʼunbeytik stalel te Jesús manchukme ya xkʼax prueba ta jtojoltik (Heb. 12:3).

8. ¿Bin-a te ya skʼan ya jnaʼtik smaliyele?

⁸ Yaniwan jkʼantikix te ya xkʼot ta pasel te bin yakotik ta smaliyel sok yaniwan jkʼantik te ya xlaj te jwokoltike. Te j-alwanej Habacuk ya skʼan te yakuk xlajix-a te utsʼinwanej ta Judá (Hab. 1:2). Te jnopojeletik «scuyojic te ora ya xchicnaj te cuentahinel yuʼun Dios» sok te ya xkoltayotik lokʼel ta skʼab te romanoetike (Luc. 19:11). Te joʼotik jaʼnix jich ya jkʼantik te yakuk slajin te wokolil te Wentainel yuʼun Dios sok te yakuk xtalix te achʼ balumilale (2 Ped. 3:13). Pero ya skʼan ya jmaliytik te skʼajkʼalel yalojix te Jehová te ya skʼotes ta pasele. Kiltik cheʼoxeb ejemplo te bin-utʼil yakʼoj ta ilel te Jehová te ya snaʼ maliywanej.

9. ¿Bintik ejemplo ya yakʼ ta ilel te ya snaʼ maliywanej te Jehovae?

⁹ Te Jehová ya snaʼ maliywanej. La yakʼbey tiempo te Noé swenta ya spas te arka sok yuʼun ya «yalbe scʼoblal te bin toj ta pasel» (2 Ped. 2:5; 1 Ped. 3:20). Te Jehová sok slamalil yoʼtan la yaʼiybey skʼop te Abrahán te kʼalal jojkʼoybot bin yuʼun ya slajin te ants winiketik ta Sodoma sok Gomorra (Gén. 18:20-33). Sok bayal jaʼbil kujch yuʼun te bitʼil maba jun yoʼtan la yakʼ sbaik te israeletike (Neh. 9:30, 31). Ta ora ini jaʼnix jich yak ta smaliyel te yakuk sujtes yoʼtanik te ants winiketik sok te ya yamigoinike (Juan 6:44; 1 Tim. 2:3, 4; 2 Ped. 3:9). Te ejemplo yuʼun te Jehová ya snojptesotik te manchuk ya xlujbotik ta scholel skʼop Dios sok ta snojptesel te yantike. Kiltik jun ejemplo ta Biblia te ya snojptesotik ta snaʼel maliywanej.

10. ¿Bin ya yakʼ jnoptik te machʼa ya yaʼiy tsʼunbajel jich bitʼil ya yal Santiago 5:7, 8?

 ¹⁰ (Kʼopona Santiago 5:7, 8). Te ejemplo yuʼun te machʼa ya yaʼiy tsʼunbajel ya snojptesotik te ya skʼan ya jnaʼtik maliywanej. Ay tsʼunubiletik te ora ya xchʼiik, pero ay yantik te maʼuke jich bitʼil te tsʼunubil te ya yakʼ site. Ta Israel ya smaliyik wakeb u yuʼun ya stsobeyik sit te bin la stsʼunike (Mar. 4:28). Teme pʼijotike ya jtʼunbeytik stalel te machʼa ya yaʼiy tsʼunbajele. Pero wokolniwan ya kaʼiytik.

11. Teme ya jnaʼtik maliywanej ¿bin-utʼil ya skoltayotik te kʼalal ya jcholtik skʼop Dios?

¹¹ Te bitʼil maba tojotike ora ya jkʼan ya kilbeytik sit te bin ya jpastike. Pero teme ay bin ya jtsʼuntike ya skʼan ya jchajpanbeytik slumil, ya kakʼintaytik sok ya kakʼbeytik yaʼlel swenta ya yakʼ sit-a. Jaʼ pajal sok te kaʼteltik ta yotsesel jnopojeletik. Ya skʼan ya jlokʼestik tiempo yuʼun ya jkoltaytik te estudiante kuʼuntik swenta ya xchʼi skʼuxul yoʼtan ta stojol te yantike. Teme ya jnaʼtik maliywanej maba ya xchebaj koʼtantik kʼalal ay machʼa ma skʼan ya yaʼiy te bin ya jcholbeytike. Pero teme ay machʼa ya smulan yaʼiyel te skʼop Diose, ya skʼan ya jmaliytik teme kʼunkʼun ya xchʼi te schʼuunel yoʼtane. Jaʼ jich kʼot ta stojolik te jnopojeletike, melel ma orauk kʼot ta yoʼtanik te bin la yal te Jesuse (Juan 14:9). Mame xchʼay ta koʼtantik te jaʼ ya yakʼ chʼiuk te Diose, te joʼotik jaʼnax ay ta jwentatik stsʼunel sok yakʼbeyel yaʼlel (1 Cor. 3:6).

12. ¿Bin-utʼil ya jnaʼtik maliywanej te kʼalal ya jcholbeytik skʼop Dios te jfamiliatike?

¹² Te kʼalal ya jcholbeytik skʼop Dios te jfamiliatik wokolniwan ya kaʼiytik te ya jnaʼtik maliywanej. Ya xjuʼ ya skoltayotik te Eclesiastés 3:1, 7 te jich ya yal: «Ay yorahil  chʼabal ta cʼop, ay yorahil ya xcʼopoj». Ay bin lek ya kakʼbeytik snop te jfamiliatik ta swenta te lek te jtaleltike, pero jaʼnix jich ya jcholbeytik skʼop Dios te kʼalal ya xjuʼe (1 Ped. 3:1, 2). Ya jmulantik scholel skʼop Dios sok nojpteswanej, pero lamal koʼtantik ta stojol te ants winiketik sok ta stojol te jfamiliatike.

13, 14. ¿Machʼatik ya xjuʼ ya jtʼunbeytik stalel?

¹³ Te j-abatetik yuʼun Dios ta namey soknix ta ora ini ya yakʼ kiltik lekil ejemplo. Te Habacuk ya skʼan te yakuk xlajix-a te utsʼinwaneje, pero jich la yal: «Ya xʼayinon ta ilo-qʼuinal cuʼun» (Hab. 2:1). Te jpuk-kʼop Pablo la yal te ya skʼan te yakuk xjuʼix yuʼun slajinel ta yaʼtele, pero maba animaltik la yalbey «scʼoblal te lec yachʼil cʼop» (Hech. 20:24).

¹⁴ Kiltik te bin kʼax ta stojol jtul ermano sok yinam. Te kʼalal la spas sbaik graduar ta Eskuela yuʼun Galaad bajtik ta jun lugar te banti maʼyuk bayal Testigoetik sok te banti te relijionetik maba schʼuunejik te Cristoe. Maʼyuk bayal machʼatik ya skʼanik snopel te Biblia. Pero te sjoʼtakik ta Eskuela yuʼun Galaad ya x-albotik tal te bayal machʼatik yakik ta skoltayel ta yichʼel jaʼ. Manchukme ma bayaluk te machʼatik ya snojptesik ta Biblia, maba lujbik ta scholel skʼop Dios. Ocho jaʼbil ta patil, jtul estudiante yuʼunik la yichʼ jaʼ. ¿Bin-utʼil pajalik te j-abatetik yuʼun Dios ta namey sok te j-abatetik ta kʼajkʼal ini? Jaʼ te maba chʼajubik sok maba la yakʼbey skux yoʼtan te skʼabike, jich akʼbotik bendision yuʼun te Jehová. Jaʼ yuʼun jtʼunbeytik stalel te machʼatik «ta scuenta schʼuhunel yoʼtanic soc te jun yoʼtanic yaquic ta mahlab, ya yichʼic te bintic yaloj ta jamal te Diose» (Heb. 6:10-12).

15. ¿Bin yuʼun ya stsakxan yip te schʼuunel koʼtantik te kʼalal ya jcholtik skʼop Diose?

¹⁵ Ya jkʼantik te spisiluk te ants winiketik ya schʼam yaʼiyik te bin jchʼuunejtike. Smukʼulinej koʼtantik te bin ya yal te Bibliae (Sal. 119:42; Is. 40:8). Kilojtik bitʼil kʼoem ta pasel ta jkʼajkʼaleltik te albilkʼopetike sok te bitʼil lekuben skuxlejal te machʼatik ya spasik te bin ya yal te Bibliae. Jaʼ-abi ya yakʼ kiltik te ya skʼan ya yaʼiyik te skʼop Dios spisil te ants winiketike.

16. Jich bitʼil ya yal Salmo 46:1-3, ¿bin-utʼil ya stsakxan yip te schʼuunel koʼtantik ta stojol te Jehová sok te Jesuse?

¹⁶ Ay schʼuunel koʼtantik ta stojol te Jehová te jaʼ ya jcholbeytik te skʼope sok ta stojol te Jesús te jaʼ Ajwalil yuʼun te Wentainele (Juan 14:1). Chikan bin ya xkʼot ta pasel jaʼme anibal kuʼuntik sok jaʼ kiptik te Jehovae (kʼopona Salmo 46:1-3). Ya jnaʼtik ta lek te jaʼ Jesús te machʼa akʼbil yaʼtel sok yuʼel ta swentainel te scholel skʼop Diose (Mat. 28:18-20).

17. ¿Bin eksperiensia ya yakʼ ta ilel te ya skʼan ya jcholtikxan skʼop Dios?

¹⁷ Ay schʼuunel koʼtantik, jaʼ yuʼun ya jnaʼtik te Jehová ya yakʼbey bendision te bin yakotik ta spasele, ayniwan ma jichuk jmaliyojtik-a (Ecl. 11:6). Jich bitʼil te kʼalal ya jcholtik skʼop Dios ta karritoetik sok ta mesaetik yuʼun publikasion bayal ants winiketik ya yilotik. ¿Aybal machʼa ya jkoltaytik-a te jich ya jcholtik skʼop Diose? ¡Ay! Te Nuestro Ministerio del Reino yuʼun nobiembre 2014 la yalbey skʼoplal jtul achʼix te ay ta unibersidad te la sta ta  nopel te ay bin ya stsʼibay ta swenta te testigoetik yuʼun Jehová. Maba la sta te sNail Tsoblej, pero la yil jun mesa yuʼun publikasion ta stiʼil te unibersidad. Tey la sta-a te informasion te yak ta sleele. Ta patil la yichʼ jaʼ, ta ora ini jaʼix prekursora regular. Te eksperiensia ini ya stij koʼtantik ta scholelxan skʼop Dios, melel ya yakʼ kiltik te ayto machʼatik ya skʼan ya snopik te Bibliae.

18. ¿Bin yuʼun seguro ayotik te ya xkʼot ta pasel ta yorail te bin yaloj te Jehová?

¹⁸ Seguro ayotik te ya xkejchaj te scholel skʼop Dios te kʼalal ya xkʼot skʼajkʼalel te yalojix te Jehová. Jnop kaʼiytik te bin kʼot ta pasel ta skʼajkʼalel te Noé. Te Jehová la yakʼ ta ilel te ya spas ta yorail te bin yaloje. Te Jehová la yal te ya xtal te Pulemal manchukme ayto skʼan 120 jaʼbil yuʼun ya xkʼot ta pasel-a. Te kʼalal ayto skʼan 40 o 50 jaʼbil yuʼun ya xtal-a te Pulemale, la yalbey te Noé te yakuk spas jun arka, tulan aʼtej te Noé. La yakʼbey snaʼ te ants winiketik te bin ya xbajt spas te Jehová. Maba la schʼam yaʼiyik, pero maba la skom sba jaʼto kʼalal albot yuʼun Jehová te akʼa yotses ta arka te chambalametike. Ta patil «te Jehová la smacbe spuertahul» (Gén. 6:3; 7:1, 2, 16).

19. ¿Bin ya jtatik teme maba ya kakʼbeytik skux yoʼtan te jkʼabtike?

¹⁹ Nopol ya yalbotikix te Jehová te maba ya jcholtikix skʼop Dios, tey-abi ya slajin te balumilal yuʼun te Satanás sok ya xkʼatpʼuj ta nichimal kʼinal te Balumilale. Te bitʼil mato kʼoem ta pasel, jtʼuntik te ejemplo yuʼun te Noé, te Habacuk sok yantikxan j-abatetik yuʼun Dios te maba la yakʼbey skux yoʼtan te skʼabike. Mame ayuk bin ya schʼaytes koʼtantik, yakuk jnaʼtik maliywanej sok tulanuk te schʼuunel koʼtantik ta stojol te Jehová sok te bin yaloje.