▪ Te bin ya yal Eclesiastés 5:8 ay bin ya yakʼ jojkʼoybey jbatik. Jich ya yal: «Teme yac awil te ay banti ayic ta utsʼinel te pobrehetic, soc te ma stojiluc ya xchahpanotic, ma me xchamuc awoʼtan yuʼun; como ay machʼa mucʼ yaʼtel te ya xʼilot yuʼun machʼa toyol xan yuʼune, soc ay machʼa toyol xan yuʼun schebalic».

Ta sit te ants winiketik te bersikulo-abi jaʼ ya yalbey skʼoplal te ajwaliletik ta balumilal. Pero teme ya kilbeytikxan skʼoplale yame jtatik ta ilel te jaʼnix jich ya yalbey skʼoplal te Jehovae.

Te Eclesiastés 5:8 ya yalbey skʼoplal jtul ajwalil te ya yutsʼin te pobreetik sok te ma stojiluk ya xchajpanwan. Te winik-abi chʼay ta yoʼtan te ay machʼa ya x-ilot te jaʼ toyolxan yaʼtele. Mel-oʼtantik sba te ay ajwaliletik te toyolxan yaʼtelik te jaʼnix jich ma stojiluk ya spas te yaʼtelike, jich ya sta swokolik te ants winiketike.

Manchukme maʼyuk xchajpajibal ya kiltik, ya yakʼ smukʼul koʼtantik snaʼel te yakik ta ilel yuʼun Jehová te machʼatik mukʼ yaʼtelike. Jkʼanbeytik koltayel te Jehová sok kakʼbeytik ta stojol te jwokoltike (Sal. 55:22; Filip. 4:6, 7). Jnaʼojtik «te sit Jehová ya yil spisil te qʼuinal, yuʼun ya yaʼbe yip te machʼatic jun yoʼtanic ta stojol» (2 Crón. 16:9).

Te bin ya yal Eclesiastés 5:8 ya yakʼ jnaʼtik te ay ajwaliletik te toyolxan yaʼtelike. Pero jaʼnix jich ya yakʼ jnaʼtik te jaʼ kʼax mukʼxan yaʼtel te Jehová ta chʼulchan sok ta Balumilal. Ta ora ini jaʼ yakʼoj ta ajwalil te Jesucristo ta Wentainel yuʼune. Te Machʼa spisil ya xjuʼ yuʼun soknix te sNichʼane stojil ya xchajpanwanik.