1. ¿Bin ya jpastik te kʼalal lek ayotike?

¿JAʼBAL wokol ya kaʼiytik abatinel ta stojol te Jehová te kʼalal ay wokolil o te kʼalal ay lamalkʼinal? Kʼalal ay jwokoltik oranax ya jletik te koltayel yuʼun te Jehová. Pero ¿bin ya jpastik te kʼalal lek ayotike? ¿Yabal xchʼay ta koʼtantik te ya skʼan ya x-abatinotik ta stojol te Jehová? Te Jehová jich la yalbey te israeletik: «Ma me xchʼay ta awoʼtan te Jehová» (Deut. 6:10-12).

2. ¿Bin yuʼun kʼax lekil ejemplo te ajwalil Asá?

² Kʼax lekil ejemplo te ajwalil Asá, melel jaʼnax la smukʼulin yoʼtan te Jehová. Ma jaʼuknax abatin ta stojol te kʼalal ay swokol-ae, «jun yoʼtan ta stojol Jehová te jayeb cʼahcʼal cuxul» (1 Rey. 15:14). Te Biblia ya yal te «la sloqʼueslan te scajtajib ta chiqʼuel mahtaniletic yuʼun yantic diosetic soc te toyol awilaletic; la swuyticlan te chʼul tonetic soc la slajin te locʼombahetic» ta Judá (2 Crón. 14:3, 5). Sok la slokʼes ta ajwalil te Maacá te schuchuʼ meʼel ta skaj te la spas jun lokʼomba yuʼun ya yichʼik ta mukʼ (1 Rey. 15:11-13).

3. ¿Bin ya kiltik ta artikulo ini?

³ Te ajwalil Asá ma jaʼuknax la slajin te lokʼombaetike, jaʼnix jich la stijbey yoʼtan te ants winiketik ta Judá te yakuk sleik te Jehovae. Jaʼ yuʼun te Jehová la yakʼ lamajuk  kʼinal * «lajuneb haʼbil» ta Judá te kʼalal ay ta ajwalil-a te Asá (2 Crón. 14:1, 4, 6). Ta artikulo ini ya kiltik bin la spas te Asá ta lajuneb jaʼbil-abi. Jaʼnix jich ya kiltik te ejemplo yuʼun te jchʼuunjeletik ta sbabial siglo te bayal bin la spasik te kʼalal ay lamalkʼinal-ae. Ta patil ya kilbeytik sujtib te jojkʼoyel ini, ¿bin ya xjuʼ ya jpastik teme ta jlumaltik libre ayotik ta scholel skʼop Dios?

4. Jich bitʼil ya yal 2 Crónicas 14:2, 6, 7, ¿bin la spas te Asá ta yorail lamalkʼinal?

⁴ (Kʼopona 2 Crónicas 14:2, 6, 7). Te Asá la yalbey te machʼatik ayik ta Judá te jaʼ Jehová te machʼa la yakʼ «lamal qʼuinal ta bayuc». Pero te Asá maba la snop te maʼyukix yaʼtele, kaj spas puebloetik, tsʼajkʼetik, toyol j-ilkʼinal sok puertaetik. Jich la yalbey te ants winiketik: «Cuʼuntic te qʼuinal». ¿Bin yuʼun jich la yal? Jaʼ la yakʼ ta naʼel te ya xjuʼ te jun yoʼtan ya x-ayinik ta kʼinal te akʼbotik yuʼun Jehová sok te junuk yoʼtan ya x-aʼtejike, melel maʼyuk skontratakik. La stijbey yoʼtan te machʼatik ayik ta Judá te ayuk bin ya spasik ta yorail lamalkʼinal.

5. ¿Bin yuʼun te Asá la schajpan te soldadoetik yuʼune?

⁵ Te ajwalil Asá jaʼnix jich la schajpan te soldadoetik yuʼun (2 Crón. 14:8). ¿Yuʼunbal maʼyuk smukʼul yoʼtan ta stojol te Jehová? Ay, pero jaʼ ay ta swenta schajpanel te lum ta swenta te bin ya xtal ta patil baele. Snaʼoj-a te maba ya xjalaj te lamalkʼinale, sok jich kʼot ta pasel.

6. ¿Bin la spasik te jchʼuunjeletik ta yorail lamalkʼinal?

⁶ Te jchʼuunjeletik ta sbabial siglo la yichʼik kontrainel, pero ¿bin la spasik te kʼalal ay lamalkʼinal-ae? Te jchʼuunjeletik-abi bajt ta yoʼtanik scholel skʼop Dios. Ta libro yuʼun Hechos ya yal te kongregasion la yichʼ ta mukʼ te Jehová sok maba la skom sbaik ta scholel skʼop Dios, jaʼ yuʼun mukʼubxan te kongregasion. Chikan ta ilel te Jehová la yakʼbey bendision te bin la spasik ta yorail lamalkʼinal (Hech. 9:26-31).

7, 8. ¿Bin la spas te Pablo sok te jchʼuunjeletik yuʼun ya scholik skʼop Dios?

⁷ Te jnopojeletik ta sbabial siglo la scholik skʼop Dios te bantito kʼalal juʼ yuʼunike. Jun ejemplo jaʼ te jpuk-kʼop Pablo te jil ta Éfeso yuʼun ya schol skʼop Dios sok ya yotses jnopojeletik tey-a (1 Cor. 16:8, 9).

⁸ Kʼalal chajpaj te kʼop ta swenta te sirkunsision ta jaʼbil 49, te Pablo sok yantik ansianoetik bayal machʼatik la scholbeyik skʼop Dios (Hech. 15:23-29). Te kʼalal la yichʼ alel ta kongregasionetik te bin la staik ta nopele, te jnopojeletik la spasik tulan ta «spuquel ta halel te lec yachʼil cʼop» (Hech. 15:30-35). ¿Bin lokʼ yuʼunik-a? Te Biblia ya yal te «la yichʼ xan yip schʼuhunel yoʼtanic [...] soc behbe pʼohlel jujun cʼahcʼal» (Hech. 16:4, 5).

9. ¿Bin ya xjuʼ ya jpastik ta bayal lugaretik sok bin ya skʼan ya jojkʼoybey jbatik?

⁹ Ta ora ini libre ayotik ta scholel skʼop Dios ta bayal lugaretik. Jaʼ yuʼun jojkʼoybey jbatik, «¿yakonbal ta spasel tulan ta scholel skʼop Dios?». Ta slajibal kʼajkʼal ini te organisasion yuʼun te Jehová baem ta yoʼtanik scholel skʼop Dios sok ta nojpteswanej ta swolol Balumilal (Mar. 13:10). Ya yakʼ stseʼelil koʼtantik te bayal bin ya xjuʼ ya jpastike.

10. ¿Bin ya stij koʼtantik ta spasel te 2 Timoteo 4:2?

¹⁰ ¿Bin ya xjuʼ ya jpastik teme ta jlumaltik libre ayotik ta scholel te skʼop Diose? (Kʼopona 2 Timoteo 4:2). Jnop kaʼiytik sok te jfamiliatik teme ya xjuʼ ya jcholtikxan skʼop Dios o te ya x-ochotik ta prekursor. Mame jaʼuk yorail te ya jletik bayal jtakʼintik sok bayal jbiluktik, melel ya xlaj skʼoplal ta yorail te tulan wokolil (Prov. 11:4; Mat. 6:31-33; 1 Juan 2:15-17).

11. ¿Bin spasojik chaʼoxtul ermanoetik swenta ya scholikxan skʼop Dios?

¹¹ Bayal ermanoetik ay snopojik yan kʼopil swenta ya scholik skʼop Dios sok ya xnojpteswanik. Jaʼ yuʼun te organisasion yuʼun te Jehová ya skʼases ta bayal kʼopiletik te publikasionetike. Jich bitʼil ta jaʼbil 2010 la yichʼ kʼasesel ta 500 kʼopiletik te publikasionetike. Pero ta ora ini kʼaxemix ta 1,000 kʼopiletik.

12. ¿Bin yaʼiyel ya yaʼiy sbaik te ants winiketik te kʼalal ya yaʼiyik te skʼop Dios ta skʼopiknixe? Akʼa jun ejemplo.

¹² ¿Bin yaʼiyel ya yaʼiy sbaik te ants winiketik te kʼalal ya yaʼiyik te skʼop Dios ta skʼopiknixe? Kiltik te ejemplo yuʼun jtul ermana te kuxinem ta Estados Unidos te bajt ta jun mukʼul tsoblej ta kʼopil kiniaruanda te jaʼ skʼope. Te kʼopil-abi ya yichʼ tuuntesel ta Ruanda, ta República Democrática del Congo sok ta Uganda.  Te kʼalal laj te mukʼul tsoblej te ermana jich la yal: «Ayix 17 jaʼbil te ayon ta Estados Unidos, pero jaʼ sbabial buelta te ya xkʼot ta koʼtan spisil te mukʼul tsobleje». Te ermana-abi kʼot ta yoʼtan spisil, melel la yaʼiy ta skʼopnix. ¿Yabal xjuʼ kuʼuntik te ya jnoptik yan kʼopil yuʼun ya jkoltaytik te ants winiketik ta jterritoriotik? ¿Jaʼbal ya smulanikxan yaʼiyel te skʼop Dios ta skʼopiknixe? Yame jtatik bayal stseʼelil koʼtantik teme jich ya jpastike.

13. ¿Bin la spasik te kermanotaktik ta Rusia ta yorail lamalkʼinal?

¹³ Maba spisil te kermanotaktik libre ayik ta scholel skʼop Dios. Ay lugaretik te banti te ajwalil maba ya yakʼ jpastik te kaʼteltik, jich bitʼil te kermanotaktik ta Rusia. Ta bayal jaʼbil la yichʼik kontrainel te testigoetik yuʼun Jehová, pero ta marso ta 1991 libre akʼotik ta scholel skʼop Dios. Ta jaʼbil-abi ay 16 mil publikadoretik-a, pero 20 jaʼbil ta patil kʼaxemix ta 160 mil-a. Chikan ta ilel te bayal bin la spasik te kermanotaktik ta yorail lamalkʼinal. Manchukme maba jalaj te lamalkʼinal, yakik ta abatinel ta stojol te Jehová sok stseʼelil yoʼtanik te bantito kʼalal ya xjuʼ yuʼunike.

14, 15. ¿Bin-utʼil te Jehová la skoltay te Asá?

¹⁴ Kilbeytikxan skʼoplal te Asá. La sta yorail te laj te lamalkʼinal ta Judá te kʼalal talik ta lajinel yuʼun ipal soldadoetik te talemik ta Etiopía. Te komandante Zérah la skuy te ya xjuʼ yuʼun slajinel te Judá. Pero te Asá la smukʼulin yoʼtan te Jehová, jaʼ yuʼun jich  la skʼopon: «Coltayawotcotic, Jehová, Diosat cuʼuncotic, como quichʼoj quipcotic ta atojol, soc ta scuenta abihil ya caʼbecotic guerra te soldadohetic ini» (2 Crón. 14:11).

¹⁵ Te soldado etiopeetik jaʼ bayalikxan te bitʼil te soldadoetik ta Judá. Pero te Asá snaʼoj-a te jaʼ ya xkoltayotik yuʼun te Jehová. Jich la spas te Jehová, la slajin te soldadoetike (2 Crón. 14:8-13).

16. ¿Bin-utʼil ya jnaʼtik te ya sta yorail te ya xlaj te lamalkʼinal ya kaʼiytike?

¹⁶ Ma jnaʼtik te bin ya xkʼot ta stojol ta jujuntul te j-abatetik yuʼun Jehová, pero jnaʼojtik te ya sta yorail te ya xlaj te lamalkʼinal te ayniwan ta ora ini. Juluk ta koʼtantik te la yal te Jesús te ta slajibal kʼajkʼal ya kichʼtik kontrainel yuʼun te nasionetike (Mat. 24:9). Jich la yal-euk te jpuk-kʼop Pablo: «Ya me xcʼax swocolic ta utsʼinel spisil te machʼatic ya scʼan ya yoʼtantayic schʼuhunel te Cristo Jesús» (2 Tim. 3:12). Jaʼnix jich te Satanás «bayel yilimba», jaʼ yuʼun ma skʼan ya jnoptik te maba ya skontrainotike (Apoc. 12:12).

17. ¿Binwan-utʼil ya yichʼ pasel ta prueba te schʼuunel koʼtantike?

¹⁷ Nopol ya yichʼ pasel ta prueba te schʼuunel yoʼtanik te j-abatetik yuʼun te Diose. Sok nopol ya xjajchix te tulan wokol, te Biblia ya yal «te mayuc hich cʼohem ta pasel ta shachel to tal bahlumilal cʼalal ora» (Mat. 24:21). Yaniwan kichʼtik kontrainel yuʼun te jfamiliatik sok ya yichʼ makel te kaʼteltike (Mat. 10:35, 36). ¿Yabal smukʼulin koʼtan te Jehová te jaʼ ya skoltayon sok ya skanantayon jich bitʼil la spas te Asá?

18. Jich bitʼil ya yal Hebreos 10:38, 39, ¿bin-utʼil ya jchajpan jbatik yuʼun te bin ya xtale?

¹⁸ Te Jehová ya skʼan te chapalukotik yuʼun te bin ya xtale, jaʼ yuʼun yak ta yakʼbeyel yip te schʼuunel koʼtantike. Swenta jun koʼtantik ta stojol te Jehová, yak ta stuuntesel «te aʼbat te jun yoʼtan soc pʼij» swenta «ya yaʼiy macʼlinwanej ta yorahil»  (Mat. 24:45). Pero jaʼ ay ta jwentatik stulantesel te schʼuunel koʼtantike (kʼopona Hebreos 10:38, 39).

19, 20. 1) ¿Bin ya skʼan ya jojkʼoybey jbatik? 2) Ta swenta te bin ya yal 1 Crónicas 28:9, ¿bin yuʼun ya skʼan ya jnopbeytik skʼoplal te jojkʼoyeletike?

¹⁹ Jletik te Jehová jich bitʼil la spas te ajwalil Asá (2 Crón. 14:4; 15:1, 2). Kaj jletik te kʼalal la jnaʼbeytik sba sok te la kichʼtik jaʼe. ¿Yakotikbal ta spasel tulan yuʼun ya xchʼixan te skʼuxul koʼtantik ta stojol te Jehovae? Swenta ya jnaʼtik-a, jnoptik te jojkʼoyel ini: «¿Yabal jpas tulan yuʼun ya xboon ta spisil te tsoblejetike?». Te tsoblejetik ya yakʼ yip koʼtantik yuʼun ya x-abatinotik ta stojol te Jehová sok ya jokintik te kermanotaktike (Mat. 11:28). Ay yantik jojkʼoyel te ya xjuʼ ya jnoptik: «¿Yabal jpas te estudio personal?». ¿Jujunbal semana ya jpas te yichʼel ta mukʼ Dios ta sjunal na sok te jfamiliae? Teme jtukel ayone ¿yabal jpas tulan ta snopel te Biblia jich bitʼil ya spas te familiaetike? ¿Yabal jpas tulan yuʼun ya jchol skʼop Dios sok ya jnojptes te yantike?

²⁰ Lek te ya jnopbeytik skʼoplal te jojkʼoyeletik-abi. Te Biblia ya yal te Jehová ya yilbotik te jpensartik sok te koʼtantike, jich ya skʼan ya jpastik-euk (kʼopona 1 Crónicas 28:9). Yaniwan jtatik ta ilel te ya skʼan ya jeltaytik te bin jnopoj ya jpastik, te jtaleltik o jpensartik, teme jiche, jkʼanbeytik koltayel te Jehová. Yame skʼan ya jchajpan jbatik ta ora ini yuʼun te pruebaetik ya xtale. Jtuuntestik ta lek te tiempo te bitʼil ayto lamalkʼinale.