1. ¿Bin ya xjuʼ ya jpastik teme ayix kaʼbilaltik?

KʼALAL ya xtoy te kaʼbilaltik, yaniwan jmel koʼtantik te maʼyukix bayal bin ya jpastik ta stojol te Jehová jich bitʼil ta nailal. Maniwan ayukix bayal kiptik, pero te jpʼijiltik sok te experiencia kuʼuntik ya xjuʼ ya jkoltaytik te jchʼieletik yuʼun ya xkoltaywanik ta organización yuʼun te Jehová sok ya yichʼikxan yaʼtelik. Jtul hermano te ayix bayal jaʼbil ochem ta anciano, jich la yal: «Kʼalal la kaʼiy te ma xjuʼix kuʼun ta swenta te ayix kaʼbilal, la kal wokol yuʼun te ay jchʼiel hermanoetik te ay spʼijilik sok chapalik ta spasel te aʼtelil».

2. ¿Bin ya kiltik ta artículo ini?

² Jich bitʼil la kiltik ta yan artículo, te jchʼieletik ya xkoltayotik te kʼalal ya yamigoinik te machʼatik ayix yaʼbilalik. Ta artículo ini, ya jnoptik taleliletik jich bitʼil te pekʼel oʼtanil, te machʼa pekʼel ya yakʼ sba, te yalel wokol sok te yutsil oʼtanil te ya xjuʼ ya xkoltayotik te machʼatik ayix yaʼbilalik, yuʼun jun-nax pajal ya x-aʼtejik sok te jchʼieletik te ya skoltayik te congregación.

3. 1) Jich bitʼil ya yal te Filipenses 2:3, 4, ¿bin-utʼil ya kakʼtik ta ilel te pekʼel oʼtanil? 2) ¿Bin-utʼil ya xkoltayot jtul hermano te pekʼel oʼtanil?

³ Te machʼatik ayix yaʼbilalik ya skʼan te pekʼeluk yoʼtanik ta skoltayel te jchʼieletik. Te machʼa pekʼel yoʼtan ma skuy te jaʼ mukʼxan skʼoplal ya yaʼiy sbae (kʼopona Filipenses 2:3, 4). Te hermanoetik te ayix yaʼbilalik te ya yakʼik ta ilel te talelil-abi, kʼoem ta yoʼtanik te bayal bin-utʼil ya xjuʼ ta pasel te aʼtelil jich bitʼil ya yal te Biblia. Maba ya yalik te  jich ya yichʼ pasel te bin-utʼil ya spasik ta nailale (Ecl. 7:10). Manchukme ay experiencia yuʼunik, pero snaʼojik «te bin ay yuʼun te bahlumilal ta ora ini, cʼaxel nax ay» sok yaniwan skʼan ya sjeltayik te bin kʼayemik ta spasel yuʼun ya xkoltaywanik ta ora ini (1 Cor. 7:31).

4. ¿Bin talelil ya yakʼik ta ilel te superintendenteetik yuʼun circuito jich bitʼil te levitaetik?

⁴ Teme pekʼel yoʼtanik te hermanoetik te ayix yaʼbilalik, kʼoem ta yoʼtanik te ma xjuʼix yuʼunik spasel te bin-utʼil ta nailal-ae. Jnop kaʼiytik ta stojolik te superintendenteetik yuʼun circuito. Te kʼalal ayix 70 yaʼbilalik, ya x-akʼbotik yan asignación. Wokolniwan ya yaʼiyik te jich ya spasik, melel ya smulanik te jich ya x-abatinik ta stojol te hermanoetik. Ya spasik sok spisil yoʼtanik-a te yaʼtelik sok jichto ya spasik ta ora ini. Pero kʼoem ta yoʼtanik te jaʼ lek te jaʼ ya spasikix te jchʼiel hermanoetik. Jich stalelik bitʼil te levitaetik ta Israel, kʼalal ayix 50 yaʼbilalik maba ya x-abatinikix ta nail pakʼ templo. Te stseʼelil yoʼtanik ma jaʼuk yuʼun ta swenta te yaʼtel yichʼojik. Sok sbujtsʼ yoʼtan ya spasik te ban kʼalal ya xjuʼ yuʼunik sok ya skoltayik te jchʼieletik (Núm. 8:25, 26). Te hermanoetik te kʼaxik ta superintendente yuʼun circuito maba ya yulaʼtayikix bayal congregacionetik, pero ya xkoltaywanik ta congregación banti ayik sok ya yakʼbeyik yip yoʼtanik.

5. ¿Bin ya yakʼbat anop te bin kʼax ta stojolik te Dan sok te Katie?

 ⁵ Kiltik te bin kʼax ta stojol te Dan, te jalaj 23 jaʼbil ta aʼtel ta superintendente yuʼun circuito. Kʼalal tsʼakaj 70 yaʼbilal te hermano, ochik ta precursor especial sok te yinam te Katie sbiil. ¿Bin ya spasik ta ora ini? Te Dan ya yal te bayal bin ya spas ta congregación, jich bitʼil skoltayel te hermanoetik yuʼun ya x-ochik ta siervo ministerial sok ya spʼijubtes te hermanoetik yuʼun ya scholik skʼop Dios te banti ya xkʼax bayal ants winiketik sok ta carceletik. Kermanotak te ayix awaʼbilalik, chikan banti yakex ta abatinel, ya xjuʼ bayal bin-utʼil ya akoltayik te yantik. ¿Bin-utʼil? Jaʼ te ya apasik te bin ya xjuʼ awuʼunik ta ora ini sok te ya awakʼ ta awoʼtanik te ya x-abatinex-xan ta stojol te Jehová sok jaʼuk ya apasik te banti kʼalal ya xjuʼ awuʼunik.

6. ¿Bin yuʼun jaʼ lek te pekʼel ya kakʼ jbatik? Ala kaʼiytik jun ejemplo.

⁶ Te machʼa pekʼel ya yakʼ sba ya snaʼ te aynax ban kʼalal ya xjuʼ yuʼun (Prov. 11:2). Ma spas te bin ma xjuʼ yuʼun, jich ay stseʼelil yoʼtan sok ya skoltaywanxan. Te machʼa pekʼel ya yakʼ sba, jich kʼoem bitʼil machʼa ya stij moel scarro, yuʼun ya xmo bael ya skʼan ya sjeltaybey yip te scarro manchukme kʼun ya xmo bael. Jaʼnix jich pajal kʼoem sok te machʼa pekʼel ya yakʼ sba ya snaʼ te bantinax kʼalal ya xjuʼ ya x-abatin ta stojol te Jehová sok ta skoltayel te yantik (Filip. 4:5).

7. ¿Bin-utʼil la yakʼ ta ilel te Barzilái te pekʼel la yakʼ sba?

⁷ Kiltik te bin kʼax ta stojol te Barzilái, te ayix 80 yaʼbilal-a te kʼalal la yichʼ yaʼtel ta stojol te ajwalil David. Pekʼel la yakʼ sba sok la spʼaj te bin albot yuʼun te ajwalil. Snaʼoj te ma xjuʼix yuʼun ta skaj te ayix yaʼbilal, jaʼ yuʼun la yal te jaʼuk ya yichʼ yaʼtel te Kimham, te jaʼ jchʼiel winik (2 Sam. 19:35-37). Jich bitʼil la spas te Barzilái, te hermanoetik te ayix yaʼbilalik tseʼel yoʼtanik ta stojolik te jchʼieletik te jaʼ ya swentainikix te aʼtelile.

8. ¿Bin-utʼil la yakʼ ta ilel te ajwalil David te pekʼel la yakʼ sba?

⁸ Te ajwalil David jaʼnix jich la yakʼ ta ilel te pekʼel la yakʼ sba. Te yoʼtanuk ya spas jun na ta stojol te Jehová. Pero kʼalal albot yuʼun te Jehová te jaʼ ya spas te Salomón, te David la schʼuun sok la yakʼ koltayel (1 Crón. 17:4; 22:5). Ma la yal te jaʼ snujpʼ te jaʼ ya spas te aʼtelile, melel te Salomón jaʼ jchʼiel kerem sok mato ayuk bayal bin ya snaʼ (1 Crón. 29:1). Te David snaʼoj te ma jaʼuk ta swenta te yaʼbilal o te bin ya snaʼ spasel yuʼun ya xjuʼ te aʼtelil, la snaʼ te jaʼ ta swenta te koltayel yuʼun Jehová. Jich bitʼil la spas te David, te hermanoetik te ayix yaʼbilalik jun yoʼtan ya x-aʼtejik, manchukme ya xjelon te bin ya spasik. Sok ya snaʼik te ya xkoltayotik yuʼun Jehová te jchʼieletik ta spasel te yaʼtelike.

9. ¿Bin-utʼil la yakʼ ta ilel te hermano Shigeo te pekʼel la yakʼ sba?

⁹ Jaʼnix jich te hermano Shigeo pekʼel la yakʼ sba. Ta 1976 kʼalal 30 yaʼbilal-a, och ta Comité yuʼun Sucursal. Ta 2004, och ta coordinador yuʼun te Comité. La yil te maʼyukix bayal yip sok ma xjuʼix yuʼun ta spasel ta ora te yaʼtel. Jich yuʼun la skʼopon te Jehová sok la yil te jaʼ lek te ya spas jchʼiel hermano te yaʼtel. Ta kʼajkʼal ini, ma jaʼukix coordinador, pero yato xkoltaywan ta Comité yuʼun Sucursal. Jich bitʼil kʼax ta stojol te Barzilái, te ajwalil David  sok te hermano Shigeo ya yakʼ jnoptik te machʼa pekʼel yoʼtanik sok te pekʼel ya yakʼ sbaik, ma jaʼuk ya yilik te bin ma xjuʼ yuʼun spasel te jchʼieletik, jaʼ ya yilik te bin ya xjuʼ yuʼunik spasel. Jich ya yilik bitʼil sjoʼtak ta aʼtel, ma jichuk bitʼil te machʼa ya stsal sbaik sok (Prov. 20:29).

10. Te hermanoetik te ayix yaʼbilalik, ¿bin-utʼil ya yilik te jchʼieletik te ayik ta congregación?

¹⁰ Te hermanoetik te ayix yaʼbilalik, jich ya yilik bitʼil majtanil yuʼun Jehová te jchʼieletik sok ya yalik wokol yuʼun te bin ya spasik. Te bitʼil maʼyukix lek yipik, mukʼ skʼoplal ta yoʼtanik te jchʼieletik te ya stuuntesik te yipik yuʼun ya xkoltaywanik ta congregación.

11. Jich bitʼil ya yal te Rut 4:13-16 ¿bin-utʼil ya yakʼik ta ilel te machʼatik ayix yaʼbilal te ya yalik wokol yuʼun te koltayel ya yakʼ te jchʼieletik?

¹¹ Te Noemí te ayix yaʼbilal, jaʼ jun lekil ejemplo te ay ta Biblia te la yal wokol yuʼun te koltayel akʼbot yuʼun te machʼa jchʼielxane. Te kʼalal laj te skerem-al te Noemí, la yalbey te Rut te yakuk sujt bael te banti ay te sfamilia. Pero kʼalal albot yuʼun te Rut te ya xjokinot bael ta Belén, te Noemí la schʼuun (Rut 1:7, 8, 18). Te bitʼil jich la spasik ay bin lek lokʼ yuʼunik-a (kʼopona Rut 4:13-16). Te hermanoetik te ayix yaʼbilalik teme pekʼel yoʼtanik, jaʼ ya stʼunbeyik te ejemplo yuʼun te Noemí.

12. ¿Bin-utʼil la yakʼ ta ilel te jpuk-kʼop Pablo te la snaʼ yalel wokol?

¹² Jaʼnix jich te jpuk-kʼop Pablo la yal wokol ta swenta te koltayel akʼbot. Ta jun buelta, la yal wokol ta stojol te yermanotak ta Filipos yuʼun te koltayel akʼbot (Filip. 4:16). Jaʼnix jich la yal wokol yuʼun te bin la spas te Timoteo (Filip. 2:19-22). La yalbey wokol te Jehová kʼalal kʼotik te  yermanotak ta yakʼbeyel smukʼul yoʼtan te kʼalal yak ta bael ta chukel ta Roma (Hech. 28:15). Te jpuk-kʼop Pablo jaʼ jtul winik te ma xiw yoʼtan sok te bayal kilómetro been ta scholel skʼop Dios sok ta yakʼbeyel yip yoʼtan te congregacionetik. Manchukme jich-abi, ma la stoy sba sok lek la yil te koltayel akʼbot yuʼun te yermanotak.

13. ¿Bin-utʼil ya yalik wokol te hermanoetik te ayix yaʼbilalik ta swenta te bin ya spas te jchʼieletik?

¹³ Kermanotak te ayix awaʼbilalik, bayal te bin-utʼil ya xjuʼ ya awakʼik ta ilel te ya awalik wokol ta swenta te bin ya spasik te jchʼieletik ta congregación. Teme ya sjap sbaik yuʼun ya yikʼex bael ta jun lugar, te ya sjokinex ta manbajel o ay binxan ya spasik ta atojolik, mame xa apʼajik te koltayel ya yakʼbeyex. Jichuk ya awilik te bitʼil kʼuxex ta yoʼtan te Jehová. Jichniwan ya xjajch awamigoin abaik ta lek. Ayuk skʼoplal ta awoʼtan spisil-ora te schʼuunel yoʼtan te jchʼieletik. Albeyaik ta jamal te kʼax tseʼel awoʼtanik ta stojolik te bitʼil yakik ta spasel tulan ta skoltayel te congregación. Lokʼesa atiempoik sok cholbeya te bin kʼaxem ta akuxlejalik. Kʼalal jich ya apasik, ya awalbeyik «wocol» te Jehová ta swenta te jchʼieletik te ayik ta congregación (Col. 3:15; Juan 6:44; 1 Tes. 5:18).

14. ¿Bin-utʼil la yakʼ ta ilel yutsil yoʼtan te ajwalil David?

¹⁴ Te ajwalil David ay yan talelil te la yakʼ ta ilel te mukʼ skʼoplal te ya skʼan ya yakʼik ta ilel te hermanoetik te ayix yaʼbilalik: jaʼ te yutsil oʼtanil. Bayal majtanil la yakʼ yuʼun jich ya yichʼ pasel-a te templo (1 Crón. 22:11-16; 29:3, 4). Jich la spas manchukme jaʼ ya yichʼ albeyel lek skʼoplal te Salomón ta swenta te aʼtelil. Teme ayix awaʼbilal sok ma xjuʼ awuʼun ya xkoltaywanatix ta construcción, ya xjuʼ awakʼ amajtan takʼin chikan jayeb ay awuʼun. Cholbeya yaʼiy te jchʼieletik te bin kʼaxem ta akuxlejal te jayebix jaʼbil ayat ta abatinel ta stojol te Jehová.

15. ¿Bin-utʼil te Pablo la skoltay te Timoteo?

¹⁵ Jaʼnix jich te jpuk-kʼop Pablo la yakʼ ta ilel yutsil yoʼtan. La yalbey te yakuk xjokinot yuʼun te Timoteo ta yulaʼtayel te congregacionetik, la snojptes te bin-utʼil ya schol skʼop Dios sok ya xpʼijubteswan (Hech. 16:1-3). Te pʼijubtesel la yakʼ te Pablo koltayot yuʼun lekil jpʼijubteswanej ya xkʼot ta swenta te lek yachʼil kʼop (1 Cor. 4:17). Te pʼijubtesel la yichʼ te Timoteo, la stuuntes yuʼun ya spʼijubtes-euk te yantik.

16. ¿Bin yuʼun te Shigeo la spʼijubtes yantik?

¹⁶ Te hermanoetik te ayix yaʼbilalik ya xjuʼ ya xkoltaywanik ta spʼijubtesel te chʼiel hermanoetik yuʼun ya swentainik te aʼtelil ta congregación. Jich bitʼil la spas te Shigeo te la kalbeytik skʼoplal ta párrafo 9, bayal jaʼbil la spʼijubtes jchʼiel hermanoetik te ayik ta Comité yuʼun Sucursal. Jich la spas yuʼun la skoltay te aʼtelil te ya yichʼ pasel ta nación te banti ya x-abatin. Kʼalal kʼot yorail te ya yijkitay te yaʼtel ta coordinador, ayix jtul hermano te pʼijuben yuʼun ya spas te aʼtelil. Te Shigeo maba skomoj sba ta skoltayel te jchʼiel hermanoetik te bitʼil ayix 45 jaʼbil te ay ta Comité yuʼun Sucursal. Te machʼatik jich stalelik bitʼil te hermano Shigeo, jaʼ jun bendición ta lum yuʼun te Jehová.

17. ¿Bin-utʼil ya xkoltaywanik te machʼatik ayix yaʼbilalik? (Lucas 6:38).

 ¹⁷ Kermanotak te ayix awaʼbilalik, ya awakʼik ta ilel te bitʼil jun awoʼtan ya x-abatinex ta stojol te Jehová, jaʼ te lekil kuxinel. Te ejemplo awuʼunik ya yakʼ ta ilel te jaʼ lek te ya jpas ta jkuxlejaltik te bintik ya yal te Biblia. Ta swenta te experiencia awuʼunik ya anaʼik bin-utʼil ya yichʼ pasel ta nailal, pero ta ora ini mukʼ skʼoplal te jichuk ya apasik te bin-utʼil ya yichʼ pasel ta ora ini. Teme mato jaluk la awichʼ jaʼ, jaʼnix jich ya xjuʼ ya acholbey yaʼiy yantik bin yuʼun ya yakʼbat stseʼelil awoʼtan snaʼbeyel sba te Jehová te bitʼil ayix awaʼbilal. Te jchʼieletik ya smulanik yaʼiyel te bintik kʼaxem ta akuxlejalik sok te bintik anopojik. Teme ya xkoltaywanex ta swenta te experiencia awuʼunik, te Jehová ya yakʼbeyex bayal bendición (kʼopona Lucas 6:38).

18. ¿Bin-utʼil ya skoltay sbaik te machʼatik ayix yaʼbilalik sok te jchʼieletik?

¹⁸ Te hermanoetik te ayix yaʼbilalik, teme ya xnoptsajik ta stojol te jchʼieletik talel kʼaxel ya skoltay sbaik (Rom. 1:12). Ta jujuntul ay bin mukʼ skʼoplal ay yuʼun. Te machʼatik ayix yaʼbilalik ay spʼijilik sok experiencia yuʼunik ta swenta te jayebix jaʼbil abatinemik ta stojol te Jehová. Yan stukel te jchʼieletik ay yipik. Kʼalal te jchʼieletik sok te machʼatik ayix yaʼbilalik jun-nax pajal ya x-aʼtejik, ya yalbeyik yutsil skʼoplal te jTatik te ay ta chʼulchan sok jaʼ jun bendición ta stojol te congregación.