Ta 1 Corintios 15:8, te Pablo jich la yal: «Ta slajibal la yakʼ sba ta ilel ta jtojol, jichon-a te bin-utʼil alal te mato staoj yorail te ya x-ayine». Jaʼ yak ta yalbeyel skʼoplal-a te Pablo te kʼalal la yil ta najalsitil te yutsilal te Jesús ta chʼulchan. Ta nailal, ya jcholbeytik skʼoplal-a te jichlaj kʼoem te chaʼayin o la yichʼ chaʼkuxajtesel bitʼil espíritu manchukme bayalto jaʼbil ya skʼan yuʼun ya xjajch-a te chaʼkuxajel ta chʼulchan. Pero la yichʼ nopbeyelxan ta lek skʼoplal te versículo ini, jaʼ yuʼun ya skʼan jeltayel te bitʼil kʼoem ta koʼtantike.

Melel ta versículo ini, te Pablo jaʼ yak ta yalbeyel skʼoplal-a te kʼalal och ta jchʼuunjel yuʼun Cristo. Pero, ¿bin yuʼun la yal te jich kʼoem bin-utʼil «alal te mato staoj yorail te ya x-ayine»? Ayniwan bayal swentail.

Ta repentenax och ta jchʼuunjel. Te alaletik te ma yorailuk ya x-ayinike ta repentenax ya xkʼot ta pasel. Kʼalal te Saulo te patil la yichʼ naʼbeyel sba bitʼil Pablo, yak ta bael ta Damasco yuʼun ya schuktiklan tal te jchʼuunjeletik ta lum-abi, ma snaʼoj-a te ya yil ta najalsitil te Jesús te chaʼkuxajemix-ae. Te bin kʼot ta pasel ma jaʼuknax te Pablo te ma jich smaliyoj-ae, jaʼnix jich te jchʼuunjeletik te ayik ta Damasco. Te bin kʼax ta stojol chajpto la yil-a, melel maba la yil kʼinal cheʼoxeb kʼajkʼal yuʼun (Hech. 9:1-9, 17-19).

Ma yorailukix-a te och ta jchʼuunjel. Ta kʼopil griego te kʼalal ya yal te «mato staoj yorail te ya x-ayine» jaʼnix jich ya xjuʼ ta kʼasesel bitʼil te «kʼaxix yorail-a te ya x-ayine». Te Traducción Kadosh Israelita Mesiánica de estudio jich ya skʼases ini: «Ma yorailuk-a te ayinone». Te kʼalal och ta jchʼuunjel te Pabloe, sujtemix bael ta chʼulchan-a te Jesuse. Te Pablo maba la yil te Jesús te kʼalal chaʼkuxaj sok te kʼalal mato moem bael ta chʼulchan-ae, ma spaj te machʼatik la yalbey skʼoplal ta yantik versiculoetik (1 Cor. 15:4-8). Te bitʼil chiknaj ta najalsitil te Jesús jich la yakʼ sba ta ilel ta stojol te Pablo manchukme jich yilel te «ma yorailukix-a».

Jaʼnix la yalbey sba te pekʼel skʼoplal. Ay chaʼoxtul te machʼatik ya yilbeyik skʼoplal te Biblia ya yalik te kʼopil la stuuntes te Pablo ta versículo ini, jaʼ te ay bin ya spejkʼanbey skʼoplal. Teme jichnix-ae, te Pablo la yakʼ ta naʼel te ma snujpʼuk ya yaʼiy te ya x-och ta jpuk-kʼop. Melel jich la yal: «Te joʼone pekʼel ayon ta stojol te yantik jpuk-kʼopetike, ma snujpʼuk te ya kichʼ albeyel jpuk-kʼop, melel la jkontrain te congregación yuʼun te Diose. Pero, te bin jtaoje jaʼ ta swenta te slekil yoʼtan Dios te ma snujpʼuk ya kichʼtike» (1 Cor. 15:9, 10).

Jich yilel te Pablo jaʼ yak ta yalbeyel skʼoplal-a te bitʼil repentenax chiknaj ta stojol te Jesús, te ma smaliyoj-a te ya x-och ta jchʼuunjel o te ma snujpʼuk la yaʼiy te la yil ta najalsitil te Jesús. Chikan te bin yuʼune, te bin kʼax ta stojol kʼax mukʼ skʼoplal la yil, melel jich la snaʼ te chaʼkuxajemix-a te Jesús. Jaʼ yuʼun, bayal buelta la yalulanbey skʼoplal te bin kʼax ta stojol kʼalal la scholbey yaʼiy te yantik ta swenta te chaʼkuxaj te Jesús (Hech. 22:6-11; 26:13-18).