Te bintik ya sjojkʼoyik te machʼatik ya skʼopon te june
Te Biblia ya yal te ya skʼan ayuk chaʼtul testigo swenta ya yalik te bin kʼot ta pasele (Núm. 35:30; Deut. 17:6; 19:15; Mat. 18:16; 1 Tim. 5:19). Jaʼukmeto, te Ley yuʼun Moisés ya yal teme ay jtul winik la stsak yutsʼin ta «yohl qʼuinal» jtul achʼix te makbilixe, pero te awune, te achʼix maʼyuk smul ya xkʼot, yan stukel te winike ya yichʼ alel te la yaʼiy antsiweje. Manchukme maʼyuk machʼa la yil te bin kʼot ta pasele, ¿bin yuʼun ya yichʼ alel te ay smul te winike?
Te bin ya yal te Deuteronomio 22:25-27 ma jaʼuk tulan skʼoplal ya yakʼ ta naʼel te ay smul te winike, melel chikan ta ilel te ay smule. Te ley ini, jaʼ ya yakʼ ta naʼel te ma jaʼuk smul te achʼixe. Kiltik te bin ya yal te bersikuloetik ay ta naile.
Te bersikuloetik ay ta naile, ya yalbey skʼoplal jtul winik te ya spas mulil ta «pueblo» sok jtul achʼix te makbilixe. Ta namey kʼinal, jtul achʼix te makbilixe jich ilbil te nujpunemixe, jaʼ yuʼun te winik te ya spas mulil soke, ya sta smul ta antsiwej. ¿Jaxan te achʼixe? Te achʼixe «ma ba awon ta scʼanel coltayel te bin utʼil ay ta yutil pueblo». Te awunuke, ay machʼa la yaʼiy sok tal ta koltayel te jichuke. Pero ta swenta te maba awune, jaʼnix jich la sta smul ta antsinel. Jich yuʼun ay smul ta schebalik (Deut. 22:23, 24).
Ta patil, te Ley ya yal te binxan ya xjuʼ ya xkʼot ta pasele: «Teme ay winic te ya sta ta yohl qʼuinal jtuhl achʼix te quechelix ta nuhpunel, teme ya stsac, ya xway soc, ha nax ya yichʼ milel stuquel te winic te way soc; mayuc bin yac apasbe stuquel te achʼix, mayuc mulil spasoj te ya xhuʼ ya xlaj yuʼune. Ha ini ha pajal cʼohem soc te machʼa ya scontrahin spat-xuhc soc ya smil. Como te winic la stsac te achʼix ta yohl qʼuinal; aunque awon te achʼix, mayuc machʼa coltayot yuʼun» (Deut. 22:25-27).
Te kʼalal ay jich ya xkʼot ta pasele, te juesetik jaʼ ya schʼuunbeyik te bin ya yal te achʼixe. Ya xjuʼ ya snopik te «awon te achʼix» pero «mayuc machʼa coltayot yuʼun». Jich yuʼun ma smuluk te bin kʼot ta pasele. Yan stukel te winike ya sta smul ta utsʼinwanej sok ta antsiwej, melel la «stsac» ta utsʼinel te achʼixe.
Te ley ini, manchukme jaʼ ya yakʼxan ta naʼel te ma jaʼuk smul achʼix te bin kʼot ta pasele, jaʼnix jich ya yakʼ ta ilel te ay smul te winik ta yutsʼinel achʼix sok ta antsiwej. Ya xjuʼ seguro ayotik te juesetik ya spasik inbestigar ta lek te bin kʼot ta pasele sok te jaʼ ya stʼunik te tojobtesel la yakʼ bayal buelta te Dios swenta ya staik ta nopel te bin ya spasike (Éx. 20:14; Deut. 13:14; 17:4).