Jich yilel te maʼuke. Kʼalal te Satanás la yalbey te Eva te akʼa sloʼbey sit te teʼ te albil yuʼun Dios te ma xjuʼ ya sloʼe, maba la yalbey te ya xlaj stukel te sbakʼetal pero te ay bin kuxul ya xjil yuʼun te ma chikanuk ta ilele, te naʼbil sba ta kʼajkʼal ini jich bitʼil chʼulelal te ma xlaje. Ta swenta jkojt chan, te Satanás la yalbey ta jamal te Eva te maba ya xlaje. La yakʼ ta naʼel te spisil-ora ya xkuxin, te kʼaxto ya smulanxan te skuxlejal liʼ ta Balumilal sok te maba ya xwentainotix yuʼun-a te Diose (Gén. 2:17; 3:3-5).

Jich yuʼun, teme maba ta Edén jajch tal skʼoplal te bin schʼuunejik te ants winiketik ta ora ini te aylaj chʼulelal te ma xlaje, ¿bin-ora jajch tal skʼoplal? Ma jnaʼtik yalel ta lek bin-ora. Jnaʼojtik stojol te laj spisil te lotil relijion ta skʼajkʼalel te Noé te kʼalal tal te Pulemale. Spisil te nojptesel yuʼun te lotil relijionetik laj skʼoplal, melel jaʼnax kolik jilel te Noé sok te sfamilia te yichʼojik ta mukʼ te Diose.

Jich yuʼun, te nojptesel ya yakʼik ta ora ini ta swenta te aylaj chʼulelal te ma xlaje, jajch tal skʼoplal te kʼalal kʼaxemix-a te Pulemale. Kʼalal te Dios la yakʼ kʼopojuk ta yanyantik kʼopiletik te ants winiketik ta Babel sok te la spuktiklan sbaik «ta swohlol bahlumilal», snopojik bael te ay chʼulelal te ma xlaje (Gén. 11:8, 9). Jaʼ yuʼun ma jnaʼtik bin-ora jajch tal te lotil nojptesel-abi. Te bin jnaʼojtik ta leke jaʼ te Satanás te «tatil yuʼun lot», jaʼ la sjach tal te lotil nojptesel-abi sok te tseʼel yoʼtan yuʼun te pujk bael ta bayuk (Juan 8:44).