1, 2. ¿Bin ya yakʼ jnoptik te bin kʼax ta stojol te Angelito ta swenta te bin ya skʼan ya jpastik ta jujuntule?

¿TESTIGOBAL yuʼun Jehová te ameʼ atate? Teme jaʼe, mame xa akuy te awamigoinejix aba sok te Jehová jaʼnax yuʼun te yamigoinej sba sok te ameʼ atate. Teme schʼuunej Jehová o maʼuk te jmeʼ jtatike, ta jujuntul ayme ta jwentatik spasel tulan te ya kamigointik te Jehovae.

² Kilbeytik skʼoplal jtul ermano te Angelito sbiil, te testigoix yuʼun Jehová-a te smeʼ stat te kʼalal chʼi tale. Te kʼalal keremto-ae, maba nopol la yaʼiy sba ta stojol te Jehovae. Jich la yal: «Ya x-abatinon ta stojol-a te Jehová ta skaj te ya jkʼan ya jpas-euk te bin ya spas te jfamiliae». Pero ta patil kaj slokʼes tiempo ta skʼoponel te Biblia, ta snopilanel ta yoʼtan te bin ya skʼopone sok kaj skʼopon Dios ta spisil-ora. ¿Bin lokʼ yuʼun-a? Jich la yal: «Kʼot ta koʼtan te jaʼnax nopol ya kaʼiy jba ta stojol te jTatik Jehová teme ya jnaʼbey sba ta leke». Te ejemplo yuʼun Angelito, ay bin cheb ya yakʼ jnoptik: ¿bin yuʼun te maba pajal skʼoplal te ay bin ya jnaʼtik ta swenta Jehová sok te ya jnaʼbeytik sba ta leke? Sok ¿bin-utʼil ya xjuʼ ya jnaʼbeytik sba ta lek te Jehovae?

3. ¿Bin yuʼun te maba pajal skʼoplal te ay bin ya jnaʼtik ta swenta Jehová sok te ya jnaʼbeytik sba ta leke?

³ Yaniwan jkuytik te ya jnaʼbeytik sba ta lek te Jehová ta swenta te ya jnaʼbeytik te sbiil o te jnaʼojtik chaʼoxchajp te bin yaloj sok te bin spasoje. Pero ma jaʼuk ya skʼan ya yal te ya jnaʼbeytikix sba ta leke. Ya skʼan ya jlokʼestik tiempo ta snaʼbeyel  sba sok ta snopel te tʼujbil taleliletik yuʼune. Jaʼnaxme jich ya xkʼot ta koʼtantik te bin ya xtijbot yoʼtan yuʼun te bin ya spas sok te bin ya yale. Jaʼ-abi ya skoltayotik ta snaʼel teme lek ya yil te bin ya jnoptik sok te bin ya jpastike. Te kʼalal kʼotix ta koʼtantik-a te bin ya skʼan ta jtojoltik te Jehovae, yame skʼan ya jpastik.

4. ¿Bin-utʼil ya skoltayotik te ya jnoptik cheʼoxeb ejemploetik ta Biblia?

⁴ Ayniwan chaʼoxtul ants winiketik ya xkaj slabanotik yuʼun te ya jkʼan ya x-abatinotik ta stojol te Jehovae sok kʼaxtoniwan ya xkaj skontrainotik te kʼalal ya xjajchotik ta bael ta tsoblejetike. Pero teme ay smukʼul koʼtantik ta stojol te Diose, mame ayuk bin-ora ya yijkitayotik. Jaʼme jich ya xkaj kakʼbeytik yiptajib kʼoem te bitʼil ya kamigoin jbatik sok te Jehová ta sbajtelkʼinal. ¿Yanixbal xjuʼ ya jnaʼbeytik sba ta lek-a te Jehovae? Yak. Jich ya yakʼ kiltik te ejemplo yuʼun Moisés sok te David te maba tojil ants winiketik-euke. Ta ora ini ya kiltik te bintik la spasik sok te bitʼil la snaʼbeyik sba ta lek te Jehovae soknix te bin ya xjuʼ ya jnoptik ta swenta te ejemplo yuʼunike.

5. ¿Bin la sta ta nopel te Moisés?

⁵ Te Moisés jaʼ la sta ta nopel te ya x-abatin ta stojol te Diose. Kʼalal 40 yaʼbilal-a te Moisese, jaʼ la sta ta nopel te ya skoltay te israeletik, te jaʼ lum yuʼun te Diose, «ma ba la scʼan ya xhalot te ha yal te yantsil-nichʼan faraón» (Heb. 11:24). Jaʼ la spʼaj te kʼax mukʼ skʼoplal ya xkʼote. La skoltay te lum Israel te ayik ta mosoinel ta Egipto manchukme snaʼoj-a te bayal ya x-ilin te faraón, te jaʼ ajwalil te jich ilbil bitʼil diose. Te Moisés la yakʼ ta ilel te ay smukʼul yoʼtan sok te ay schʼuunel yoʼtan ta stojol te Jehovae. Jaʼ-abi koltayot yuʼun ya yamigoin sba ta lek sok ta spisil-ora (Prov. 3:5).

6. ¿Bin ya jnoptik ta swenta te ejemplo yuʼun te Moisese?

⁶ ¿Bin ya jnoptik ta swenta te Moisese? Jaʼ te jpisiltik ya skʼan ya jnoptik teme ya x-abatinotik ta stojol te Jehová sok teme ya x-ochotik ta lum yuʼun o teme maʼuke. Kʼalal ya x-abatinotik ta stojol Jehová, ayniwan bin ya skʼan ya jpastik te wokol ya kaʼiytik spasel sok yaniwan xkaj kichʼtik kontrainel yuʼun te machʼatik ma snaʼbeyik sbae. Pero teme ay smukʼul koʼtantik ta stojol te jTatik Jehovae, seguro ayotik te ya skoltayotike.

7, 8. ¿Bin la snopxan ta stojol Jehová te Moisese?

⁷ Te Moisés la snopbeyxan skʼoplal te taleliletik yuʼun te Jehová sok la snopxan te bitʼil ya spasbey te skʼanojel yoʼtane. Jun ejemplo jaʼ te kʼalal albot yuʼun Jehová te yakuk slokʼes tal ta Egipto te lum Israel, jich la yaʼiy te ma xjuʼ yuʼune, jaʼ yuʼun bayal buelta la yalbey te ma chapaluk ta spasel te aʼtelile. Pero te Jehová la snaʼbey yoʼbolil sba, jaʼ yuʼun la skoltay (Éx. 4:10-16). Ta swenta te koltayel akʼbot yuʼune, juʼ yuʼun yalbeyel te faraón te bin kastigo ya yichʼe. Ta patil la yilbey te yuʼel Jehová kʼalal la skoltay te israeletik sok te la slajin te faraón sok te soldadoetik yuʼun ta mar Rojo (Éx. 14:26-31; Sal. 136:15).

⁸ Kʼalal lokʼemikix ta Egipto-a te israeletike, kajik ta wulwulkʼop. Te jayeb tiempo te jich la spas te lume, te Moisés la sta ta ilel te ma x-ilin ta oranax te Jehová ta stojol te lum Israel te la yakʼ ta libre yuʼun te mosoinele (Sal. 78:40-43). Jaʼnix jich la yil te bayal spekʼelil yoʼtan te Jehová, melel la sjel te bin snopoj ya spas ta stojol te lum te kʼalal jich la skʼanbeye (Éx. 32:9-14).

9. Jich bitʼil ya yal Hebreos 11:27, ¿bin yilel la yil sba sok Jehová te Moisese?

 ⁹ Kʼalal lokʼemix ta Egipto-a te Moisese, kʼax lekxan kaj yil sba sok te Jehovae, jich kʼoem te yak ta yilbeyel sit te sTat ta chʼulchane (kʼopona Hebreos 11:27). Te Biblia jich ya yal: «Te Jehová ya snuhpʼin sba ta cʼop soc Moisés, hich te bin utʼil machʼa ya xcʼopoj soc te smohlole» (Éx. 33:11).

10. ¿Bin ya skʼan ya jpastik yuʼun ya jnaʼbeytik sba ta lek te Jehovae?

¹⁰ ¿Bin ya yakʼ jnoptik-abi? Swenta ya jnaʼbeytik sba ta lek te Jehovae, ma jaʼuknax ya jnopbeytik skʼoplal te stalele, jaʼnix jich ya skʼan ya jpasbeytik te skʼanojel yoʼtane. ¿Bin-a te skʼanojel yoʼtane? Te Biblia jich ya yal: «Yoʼtanuc ya xcol spisil ants-winiquetic soc te yacuc xcʼoht ta yoʼtanic te smelelil-cʼope» (1 Tim. 2:3, 4). Jun te bitʼil ya jpasbeytik te skʼanojel yoʼtan te Jehovae, jaʼ te ya jkoltaytik te ants winiketik ta snaʼbeyel sba te Diose.

11. ¿Bin yuʼun ya jnaʼbeytikxan sba ta lek te Jehová kʼalal ya jkoltaytik te yantik yuʼun ya xnaʼbot sba?

¹¹ Jteb ma spisiluk-ora ya jnaʼbeytikxan sba ta lek te Jehová kʼalal ya jkoltaytik te yantik yuʼun ya xnaʼbot sbae. Jun ejemplo ta swenta-abi, jaʼ te ya kiltik te ya snaʼbey yoʼbolil sba te ants winiketik kʼalal ya stojobtesotik bael te banti ay te machʼatik lek yoʼtanike (Juan 6:44; Hech. 13:48, TNM). Jtaojtik ta ilel te yuʼel sKʼop Dios kʼalal ya kiltik te ya xjuʼ yuʼunik yijkitayel te schopol kostumbre te machʼatik ya jnojptestik ta Biblia sok te ya yijkitayik te spokoʼ talelike (Col. 3:9, 10). Te bitʼil bayal buelta ya yakʼ xbootik ta stojol te ants winiketik te Jehovae, jich ya kiltik te ya snaʼ maliywaneje, melel ya skʼan te yakuk xnaʼbot sba swenta ya sta skolelik-a (Rom. 10:13-15).

12. Jich bitʼil ya yal Éxodo 33:13, ¿bin la skʼanbey Jehová te Moisés sok bin yuʼun?

¹² Te Moisés bayal skʼoplal ta yoʼtan te yamigoinej sba sok te Jehovae. Manchukme spasojix bayal milagro ta swenta sbiil te Diose, la yalbey te yakuk x-akʼbotxan snaʼbey sba ta leke (kʼopona Éxodo 33:13). Te Moisés snaʼoj ta lek-a te bayaltoxan bin ya skʼan ya snop ta swenta te sTat ta chʼulchan manchukme kʼaxemix ta 80 yaʼbilal-ae.

13. ¿Bin-utʼil ya xjuʼ ya kakʼtik ta ilel te bayal skʼoplal ta koʼtantik te kamigoinej jbatik sok te Jehovae?

¹³ ¿Bin ya jnoptik yuʼun? Jaʼ te bayaluk skʼoplal ta koʼtantik te kamigoinej jbatik sok te Jehová manchukme ayix bayal jaʼbil te yakotik ta abatinel ta stojole. Jun te bitʼil ya jpastike, jaʼ te kʼalal ya jkʼopontike.

14. ¿Bin yuʼun mukʼ skʼoplal te ya jpastik orasion swenta ya jnaʼbeytik sba ta lek te Jehovae?

¹⁴ Kʼaxtoxan lek ya kamigoin jbatik sok yantik teme spisil-ora ya jkʼopon jbatike. Jaʼ yuʼun akʼa noptsajukotik ta stojol te Jehová ta swenta te orasione, mame skʼan ya xiwotik ta yalbeyel te bin ya jnoptik sok te bin yaʼiyel ya kaʼiy jbatike (Efes. 6:18). Jtul ermana te Krista sbiil te Turquía slumale, jich la yal: «Ta jujun buelta te ya kalbey te Jehová te bin ya jnop sok te kʼalal ya kil te bin-utʼil ya skoltayone, jaʼ ya yakʼ xchʼi te skʼuxul koʼtan sok te smukʼul koʼtan ta stojole. Kʼalal ya jta ta ilel te bitʼil ya sutbon te j-orasione, jaʼ skoltayejon ta yilel jich bitʼil jTat sok Kamigo».

15. ¿Bin la yal te Jehová ta stojol te ajwalil Davide?

¹⁵ Kʼalal ayin te Davide yakikix ta yichʼel ta mukʼ Dios-a te smeʼ stat sok te yantik ants winiketik ta slumale. Pero ma jaʼuknax la yichʼ ta mukʼ Dios yuʼun te jich yakix ta spasel-a te sfamiliae. Jaʼnix ta stukel te bitʼil la skʼan te  ya yamigoin sba sok te Jehovae, jaʼ yuʼun mero kʼux aʼiyot yuʼun. Jaʼnix te Jehová te la yal te mero tseʼel yoʼtan yuʼun te Davide (Hech. 13:22). ¿Bin la spas te David yuʼun ya yamigoin sba ta lek sok te Jehovae?

16. ¿Bin la snop te David te kʼalal la yil te bintik spastiklanoj te Jehovae?

¹⁶ Te David la snaʼbey sba te Jehová ta swenta te bintik spastiklanoj. Te kʼalal jchʼielto-a te Davide bayal tiempo aʼtej ta skanantayel te tuminchijetik yuʼun te state. Jaʼniwan tey kaj snopilan ta yoʼtan-a te bintik spasoj te Jehovae. Jich bitʼil te kʼalal la yil ta ajkʼabal te chʼulchan ma jaʼuknax la yil te nojel ta ekʼe, jaʼnix jich la stabey ta ilel te stalel te machʼa la spase. Jaʼ-abi, jaʼ tijbot yoʼtan ta yalel ini: «Te chʼulchan ya yalbe scʼoblal te yutsilal te Diose, te sjamalil chʼulchan ya yalbe scʼoblal te yaʼtel te scʼabe» (Sal. 19:1, 2). Jaʼnix jich la yilbey te spʼijil te Jehová te kʼalal la snopilan ta yoʼtan te bitʼil pasbil te ants winiketike (Sal. 139:14). Te kʼalal la spas tulan ta snopel te bintik chajpto spastiklanoj te Jehovae, kʼax chʼin la yaʼiy sba ta stojol (Sal. 139:6).

17. ¿Bin ya jnoptik te kʼalal ya jnopilan ta koʼtantik te bintik pastiklanbile?

¹⁷ ¿Bin ya jnoptik ta swenta te bin la spas te Davide? Akʼa kiltik ta lek te bintik pastiklanbile. Mame tikʼuk ya kaʼiytik-a te kuxulotik ta tʼujbil Balumilal te spasoj te Jehovae, jaʼnix jich akʼa jmulanbeytik yutsilal. Te kʼalal ya jpastik te kaʼteltik ta jujun kʼajkʼale, akʼa jnopilan ta koʼtantik te bintik ya yakʼ jnoptik ta swenta Jehová te bintik ay ta joyobaltike, jich bitʼil te jaʼmaletik, te chambalametik sok te ants winiketike. Teme jich ya jpastike, ta jujun kʼajkʼal ay bin tʼujbil ya jnoptik ta swenta te jTatik te bayal skʼuxul yoʼtane (Rom. 1:20). Jichme ya xchʼi ta jujun kʼajkʼal te skʼuxul koʼtantik ta stojole.

18. Jich bitʼil ya yal te Salmo 18, ¿bin la sta ta ilel te Davide?

¹⁸ Te David la sta ta ilel te koltayel akʼbot yuʼun te Jehovae. Jun ejemplo, jaʼ te kʼalal yak ta skanantayel tuminchijetik-ae juʼ yuʼun smilel jkojt leon sok jkojt oso, pero la snaʼ te juʼ yuʼun smiltiklanel ta skaj te jaʼ koltayot yuʼun te Jehovae. Soknix te kʼalal la smil te najtil winik Goliat la yil ta jamal te jaʼ koltayot yuʼun te Jehovae (1 Sam. 17:37). Jaʼnix jich la yil te jaʼ kanantayot yuʼun te Jehová ta skʼab te ajwalil Saúl te ya skʼan ya xmilot yuʼune (Sal. 18, sjajchibal aʼiyej). Te lajuk stoy sba te Davide, laniwan snop te maʼyuk machʼa koltayot ta spasel te bin juʼ yuʼun spasele. Pero ma jichuk la snop, melel ay spekʼelil yoʼtan jaʼ yuʼun la yil te jaʼ Jehová te machʼa koltayot ta skuxlejale (Sal. 138:6).

19. ¿Bin ya yakʼ jnoptik te ejemplo yuʼun te Davide?

¹⁹ ¿Bin ya yakʼ jnoptik te ejemplo yuʼun te Davide? Te kʼalal ya jkʼanbeytik Jehová te yakuk skoltayotike, jaʼnix jich ya skʼan ya kiltik te bitʼil ya spas sok te bin-ora ya spase. Teme pekʼel koʼtantik sok teme ya jnaʼtik te ay bintik ma xjuʼ kuʼuntik spasele, yame jtatik ta ilel te jaʼ ya skoltayotik te Jehovae. Kʼalal ya kiltik te bitʼil ya skoltayotike kʼaxtoxan ya kamigoin jbatik sok-a. Jich kʼot ta stojol jtul ermano te Isaac sbiil te nainem ta Fiyi te ayix bayal jaʼbil yak ta abatinel ta stojol te Jehovae. Jich la yal: «Kʼalal ya jnop te bin yilel te jkuxlejal ta ora ini, ya jta ta ilel bitʼil skoltayejon te Jehová jaʼto tal te kʼalal jajch jnop te Bibliae. Jaʼ-abi jaʼ skoltayejon yuʼun ya kil te yuʼun-nix kuxul-a te Jehovae».

20. ¿Bin-utʼil koltayot te David yuʼun te lek yiloj sba sok Jehovae, sok bin ya jnoptik yuʼun?

²⁰ Te David la stʼunbey te taleliletik yuʼun te Jehovae. Ya xjuʼ ya jtʼunbeytik te stalel te Jehová melel jaʼ jich la spasotik (Gén. 1:26).  Te kʼalal bayalxan ya jnopbeytik skʼoplal te stalele, ya xjuʼ ya jkʼayinbeytik ta lek. Te David lek la yil te yantik jich bitʼil ya spas te Jehovae, jich la spas melel la snaʼbey sba ta lek te sTate. Kiltik junuk te bin kʼax ta skuxlejal te ajwalil Davide. La sta smul ta stojol Jehová kʼalal yal ta mulil sok te Betsabé sok la yakʼbey ta milel te smamalale, manchukme jich la spas naʼbot yoʼbolil sba yuʼun te Jehovae (2 Sam. 11:1-4, 15). ¿Bin yuʼun? Jaʼ yuʼun te la stʼunbey te stalel Jehová kʼalal la snaʼbey yoʼbolil sba te ants winiketike. Te bitʼil la yamigoin sba ta lek soke, kʼax kʼanbil kʼot te Davide, te Jehová la stuuntesbey te ejemplo yuʼun swenta ya yal teme lek o ma lek ya yil jtul ajwalil ta Israel (1 Rey. 15:11; 2 Rey. 14:1-3).

21. Jich bitʼil ya yal Efesios 4:24 sok 5:1, ¿bin lek ya xlokʼ-a teme ya jtʼunbeytik stalel te Diose?

²¹ ¿Bin ya yakʼ jnoptik? Jaʼ te ya skʼan ya jtʼunbeytik stalel te Diose. Te kʼalal ya jtʼunbeytik te stalele, ma jaʼuknax te ya jta jlekilaltike, jaʼnix jich ya skoltayotik yuʼun ya jnaʼbeytikxan sba ta lek. Kʼalal ya jpastik tulan te jichuk jtaleltik te bitʼil stalel te Diose, ya xchiknaj ta ilel te yal snichʼanotike (kʼopona Efesios 4:24; 5:1).

22, 23. ¿Bin ya xkʼot ta pasel teme ya jpas ta jkuxlejaltik te bin ya jnoptik ta stojol te Jehovae?

²² Jich bitʼil la kilbeytikix skʼoplale, te Jehová ya yakʼ sba ta naʼel ta Biblia sok ta swenta te bintik spasoje. Maʼyuk yan libro te pajal sok te Biblia te nojel ta ejemplo yuʼun j-abatetik yuʼun Dios te ya xjuʼ ya jtʼunbeytik stalelik, jich bitʼil te Moisés sok David. Te Jehová yakʼoj te bin ya xtuun kuʼuntik yuʼun ya jnaʼbeytik sba, pero ay bin ya skʼan ya jpastik-euk, jaʼ te ya skʼan ya jpastikxan tulan ta snaʼbeyel sba ta leke.

²³ Maʼyuk bin-ora ya xlaj koʼtantik ta snaʼbeyel sba te Jehovae (Ecl. 3:11). Te bin mukʼxan skʼoplale, ma jaʼuk teme bayal bin ya jnaʼtik ta stojole, jaʼ mukʼxan skʼoplal te bin ya jpastik ta swenta te bin jnaʼojtikixe. Teme ya jpas ta jkuxlejaltik te bin ya jnoptik ta stojol sok ya jpastik tulan ta stʼunbeyel stalel te Dios kuʼuntik te bayal skʼuxul yoʼtane, ya xnoptsajxan tal ta jtojoltik (Sant. 4:8). Te Jehová ya yalbotik ta Biblia te maʼyuk bin-ora ya yijkitay te machʼatik ya xleot yuʼune.