¿Yabal xjuʼ ya awakʼbey sujtib te jojkʼoyeletik ini te la yalbey skʼoplal te rebistaetik Te J-ilkʼinal ta toyol 2019?

¿Bin ya skʼan ya yal te jich ya yalbotik ta jamal te Diose: «Mayuc aʼtejibal yuʼun guerra te ya xhuʼ ya stsalat» te xchie? (Is. 54:17).

Ya xjuʼ ya smukʼulin koʼtantik te ya skanantayotik te Dios ta stojol te bintik ay yip te ya xlajinwan te pajal sok «te sahb ye te jʼutsʼinwanej[etic]» (Is. 25:4, 5). Te jkontrataktik maʼyuk bin-ora ya xjuʼ ya spasbotik te bin ma xjuʼ ya schajpan te Jehová (w19.01, pajina 6, 7).

¿Bin-utʼil ya xchiknaj ta ilel te stojil yoʼtan te Dios ta swenta te bin yilel la yil te kananeoetik sok te israeletik te la stoy sbaike?

Te Dios la yakʼbey kastigo te machʼatik la spasik mulil te jkʼaxel ilobtik sba sok te machʼatik ma stojiluk bin la spasik ta stojol te antsetik sok te alaletike. La yakʼbey bendision stukel te machʼatik la schʼuunik mantal sok te la spasik te bin toj ta pasele (w19.02, pajina 22, 23).

¿Bin ya jpastik teme ay machʼa ya spas orasion te maba Testigoe?

Ya xjuʼ ma xkʼopojotik sok lek jtaleltik ya kakʼtik ta ilel, pero ma xkaltik «jichuk» sok ma jtsakbey jba jkʼabtik kʼalal yak ta pasel-a te orasione. Ya xjuʼ parte ya jpastik orasion ta koʼtantik (w19.03, pajina 31).

¿Bin yuʼun jaʼ jun tulan mulil te yutsʼinel alaletike?

Te yutsʼinel alaletike jaʼ jun mulil ta stojol te alal te la yichʼ utsʼinel, ta stojol te kongregasion, ta stojol te j-aʼtel patanetik sok ta stojol te Diose. Ta lugaretik te banti ay leyetik ta swenta te yakʼbeyel snaʼ j-aʼtel patanetik kʼalal ay machʼa ya yutsʼin alaletike te ansianoetik ya schʼuunik spasel (w19.05, pajina 9, 10).

¿Bin-utʼil ya xjuʼ ya jeltaytik o ya jlekubtestik te bin ya stij jpensartike?

Oxchajp te bin ya skʼan ya jpastik te mukʼ skʼoplal jaʼ te ya jkʼopontik te Jehová, jnopilan ta koʼtantik te bin ya yal te Biblia yuʼun ya jnaʼtik te bin ay ta skʼubulil koʼtantik sok jtsatik ta lek te kamigotaktike (w19.06, pajina 11).

¿Bin ya xjuʼ ya jpastik ta ora ini yuʼun ya jchajpan jbatik ta swenta te kontrainele?

Ya skʼan ya kakʼbeytik stsakxan yip te bitʼil kamigoinej jbatik sok te Jehovae, schʼuunejuk koʼtantik te kʼuxotik ta yoʼtan sok te maʼyuk bin-ora ya yijkitayotike, jkʼopontik ta jujun kʼajkʼal te Biblia sok jkʼopontik Dios spisil-ora. Ya skʼan schʼuunejuk koʼtantik te yananix xkʼot ta pasel-a te bendisionetik te ya yakʼ te Wentainel yuʼun Dios, te ya jnoptik ta memoria te tekstoetik ya jmulantik sok te kʼayojiletik ta swenta Dios (w19.07, pajina 2-4).

¿Bin ya xjuʼ ya jpastik swenta ya jkoltaytik te jfamiliatik ta stael skolelik?

Mukʼ skʼoplal te ya xkʼot ta koʼtantik te bin yaʼiyel ya yaʼiy sbaik, te ya kakʼtik ta nopel te smelelil kʼop ta swenta te lek jtaleltike, te manchuk ya xlujbotik sok te ayuk slekil koʼtantike (w19.08, pajina 15-17).

Jich bitʼil ya yal Mateo 11:28, ¿bin-utʼil ya yakʼ jkux koʼtantik te Jesuse?

Ay lekil jkanantaywanejetik kuʼuntik, ay lekil joʼtaktik ta aʼtel sok yakotik ta spasel te aʼtel te mukʼ skʼoplale (w19.09, pajina 23).

¿Bin-utʼil ya stij koʼtantik sok ya yakʼ kiptik te Dios ta spasel te yaʼtele? (Filip. 2:13).

Kʼalal ya jkʼopontik te Biblia sok ya jnopilan ta koʼtantik, te Dios ya stij koʼtantik ta spasel te skʼanojel yoʼtan sok ya yakʼ kiptik ta spasel. Ta swenta te schʼul espiritu ya xjuʼ ya skoltayotik ta slekubteselxan te bin ya jnaʼtik spasele (w19.10, pajina 21).

¿Bin ya skʼan ya jpastik te kʼalal mato jtaojtik ta nopel te bin mukʼ skʼoplal ya jpastike?

Ay joʼeb te bin ya skʼan ya jpastike, jaʼ te ya jpastik inbestigar ta lek, jkʼanbeytik jpʼijiltik te Dios, kiltik te bin ya stij koʼtantik, jnaʼtik ta lek te bin ya jpastik sok jnaʼtik te bin ma xjuʼ kuʼuntike (w19.11, pajina 27-29).

Kʼalal te Satanás kʼopoj sok te Eva, ¿jaʼbal tey jajch tal skʼoplal-a te aylaj chʼulelal te ma xlaje?

Jich yilel te maʼuke. Te Satanás maba la yalbey te Eva te ya xlaj pero te ay bin kuxul ya xjil yuʼun te ma chikanuk ta ilele. La yalbey te maʼyuk bin-ora ya xlaje. Te kʼalal tal te Pulemale, laj skʼoplal te nojptesel yuʼun te lotil relijionetike. Jich yilel te jajch yalik te ay chʼulelal te ma xlaj kʼalal mato spuktiklanoj sbaik-a te ants winiketik te yakik ta spasel-a te tsʼajkʼ yuʼun Babel (w19.12, pajina 15).