1. ¿Bin-a te joʼotiknix ya yakʼ jpastik te Jehovae?

TE Jehová ya yakʼ jtsatik te bin ya jkʼan ya jpas ta jkuxlejaltike. Ya snojptesotik yuʼun lek te bin ya jtatik ta nopel spasel sok ya skoltayotik yuʼun ya xjuʼ kuʼuntik spasel teme lek ya yil te bin la jtatik ta nopele (Sal. 119:173). Kʼalal ya jpas ta jkuxlejaltik te lekil tojobtesel ay ta sKʼop Dios ya skoltayotik yuʼun lek te bin ya jtatik ta nopel spasele (Heb. 5:14).

2. ¿Binwan tulan ya kaʼiytik spasel kʼalal ay bin la jtatikix ta nopel te ya jpastike?

² Manchukme lek te bin la jtatik ta nopel spasel yaniwan skʼan ya jpastik tulan yuʼun ya juʼtestik ta pasel. Kiltik cheʼoxeb ejemplo. Jtul jchʼiel kerem ya sta ta nopel te ya skʼopon spajkal te Bibliae. Jich ya spas cheʼoxeb semana, pero patil ya yijkitay. Jtul ermana ya sta ta nopel te ya x-och ta prekursora, pero ya sjelulanbey te skʼajkʼalel yaloj te ya sjache. Te ansianoetik ta jun kongregasion ya staik ta nopel te ya yulaʼtayik te ermanoetik yuʼun ya yakʼbey yip yoʼtanik, pero kʼaxix tal bayal u sok maʼyuk machʼa yulaʼtayojik. Ta spisilik maba pajal te bin la snopike, pero ay bin pajal ay yuʼunik, jaʼ te ay bin la staik ta nopel spasel pero maba la spasik. Jteb ma pajal sok te bin kʼax ta stojol te jchʼuunjeletik ta Corinto ta sbabial siglo. Kiltik te bin ya xjuʼ ya jnoptik ta stojolike.

3. ¿Bin la yal ya spasik te corintoetik, pero bin kʼot ta pasel ta patil?

³ Ta nopol bael te jaʼbil 55, ay bin mukʼ skʼoplal la yal ya spasik te corintoetike. La yaʼiyik stojol te ayik ta wokol te jchʼuunjeletik ta Jerusalén sok ta Judea ta skaj te maʼyuk stakʼinike sok la snaʼik te ay yantik kongregasionetik yakik ta stsobel takʼin swenta ya stikunbeyik bael. Ta swenta te slekil yoʼtanik la snopik te ya xkoltaywanik-euk, jaʼ yuʼun la sjojkʼoybeyik te jpuk-kʼop Pablo bin-utʼil ya xjuʼ ya spasik. Te Pablo la yalbey te bin ya xjuʼ ya spasik sok la yal te jaʼ ya xkoltayotik ta stsobel te Titoe (1 Cor. 16:1; 2 Cor. 8:6). Pero cheʼoxeb u ta patil te Pablo  la yaʼiy stojol te maba spasojike. Yuʼun-niwan mato stsobojik-a te kʼalal kʼot skʼajkʼalel te jun-nax ya yichʼ ichʼel bael ta Jerusalén te takʼin la stsobik te yantik kongregasionetike (2 Cor. 9:4, 5).

4. Jich bitʼil ya yal 2 Corintios 8:7, 10, 11, ¿bin la yal te Pablo te akʼa spasik te corintoetike?

⁴ Kʼax lek te bin la staik ta nopel spasel te corintoetike, jaʼ yuʼun te Pablo la yutsilkʼoptay ta swenta te tulan ay te schʼuunel yoʼtanik sok te ay slekil yoʼtanike. Pero jaʼnix jich la yalbey te akʼa sjuʼtesik ta pasel te bin la yalike (kʼopona 2 Corintios 8:7, 10, 11). Te bin kʼax ta stojolik ya yakʼ jnoptik te jaʼnix jich ay tulan ya yaʼiyik te j-abatetik yuʼun Dios te ya skʼotesik ta pasel te bin la staik ta nopel spasele.

5. ¿Bin jojkʼoyeletik ya kilbeytik sujtib?

⁵ Jichnix bitʼil te corintoetike, ayniwan tulan ya kaʼiytik-euk spasel te bin la jtatik ta nopele, jaʼ ta skaj te maba tojotike sok te ya jelbeytik skʼajkʼalel te bin-ora jnopoj ya jpastike. Jaʼnix jich te bintik ya xkʼot ta pasel te ma maliybil kuʼuntik, ya xjuʼ ya smakotik ta spasel te bin kalojtike (Ecl. 9:11; Rom. 7:18). Ta artikulo ini ya kilbeytik sujtib te jojkʼoyeletik ini, ¿bin-utʼil ya jtatik ta nopel ta lek te bin ya jpastike?, ¿bin ya skʼan ya jpastik swenta ya kiltikxan yan buelta te bin jtaojtikix ta nopel spasel sok teme ya xjuʼ ya jeltaytike? Sok ¿bin ya skoltayotik yuʼun ya juʼtestik spasel te bin la kaltik ya jpastike?

6. ¿Bin-ora te yaniwan skʼan ya jeltaytik te bin la jtatik ta nopel spasele?

⁶ Ay bintik la jtatik ta nopel spasel te maʼyuk bin-ora ya jeltaytike. Jich bitʼil te ma kijkitaytik te abatinel ta stojol te Jehová sok te jun koʼtan ya kakʼ jbatik ta stojol te joytike (Mat. 16:24; 19:6). Pero ay yantik te yaniwan skʼan ya jeltaytik, melel ay ya xjelon te jkuxlejaltike. ¿Bin ya skoltayotik ta stael ta nopel ta lek te bin ya jpastike?

7. ¿Bin ya skʼan ya jkʼanbeytik te Diose sok bin yuʼun?

⁷ Jkʼanbeytik jpʼijiltik te Diose. Te Jehová jich la yakʼbey stsʼibay te Santiago: «Teme ay machʼa mayuc spʼijil yoʼtan, acʼa scʼambe Dios, ma pʼisbiluc nax ya yacʼ stuquel» (Sant. 1:5). Ta jpisiltik ay bin-ora ya jkʼantikxan jpʼijiltik, jaʼ yuʼun akʼa smukʼulin koʼtantik te Jehová kʼalal ay bin ya jtatik ta nopel spasel sok te kʼalal ya kiltik teme ya skʼan ya jeltaytike. Jichme ya skoltayotik te Jehová ta stael ta nopel ta lek te bin ya jpastike.

8. ¿Bin ya skʼan ya jpastik te kʼalal mato jtaojtik ta nopel te bin ya jpastike?

⁸ Jpastik inbestigar ta lek. Kiltik te sKʼop Diose, jkʼopontik te junetik ya spas te organisasion yuʼun Jehová sok kalbeytik yaʼiy te machʼa ya snaʼ yakʼel lekil tojobtesele (Prov. 20:18). Kʼax mukʼ skʼoplal te ya jpastik spisil ini kʼalal yakotik ta snopel te ya jel te kaʼteltik, te ya xbootik ta nainel ta yan lugar o te kʼalal yakotik ta snopel te bin ya jpastik estudiar swenta ya jtatik te bin ya xtuun kuʼuntike sok te ya x-abatinotik ta stojol te Diose.

9. ¿Bin-utʼil ya skoltayotik te maba ya jloʼlay jbatik ta jtukeltike?

⁹ Kiltik te bin ya stij koʼtantike. Te Jehová ay skʼoplal ta yoʼtan te bin ya stij koʼtantik te kʼalal ay bin ya jpastike (Prov. 16:2). Te Jehová ya skʼan te maʼyuk bin-ora ya xloʼlaywanotik. Jaʼ yuʼun ma skʼan ya jloʼlay jbatik sok ma jloʼlaytik te yantik kʼalal ay bin ya jtatik ta nopel spasele. Teme maba jich ya jpastike, ya xjuʼ wokol ya kaʼiytik sjuʼtesel ta pasel te bin la kaltike. Nopa awaʼiy te jtul kerem la snop te ya x-och ta prekursor, pero cheʼoxeb u ta patil maba juʼ yuʼun stsʼakajtesel te jayeb ora ya skʼan ya spase sok maʼyukix stseʼelil yoʼtan ta scholel te skʼop Diose. Laniwan snop te jaʼ tijbot yoʼtan te ya skʼan ya yakʼbey stseʼelil yoʼtan  te Jehovae. Pero, ¿aybal jaʼ jich la spas yuʼun te ya yakʼbey stseʼelil yoʼtan te smeʼ stat o yan te machʼa lek ya yile?

10. ¿Bin ya skʼan ay kuʼuntik swenta ay bin ya jeltay ta jkuxlejaltik?

¹⁰ Kiltik yan ejemplo. Jtul te machʼa yakal ta snopel te Biblia ya sta ta nopel te ya yijkitay te snukʼel maye. Ta sjajchibal bayal la spas tulan, jich yuʼun maba la snukʼ cheʼoxeb semana, pero ta patil la snukʼxan. Ta patilxan bael juʼ yuʼun yijkitayel. Te skʼuxul yoʼtan ta stojol Jehová sok te ya skʼan ya yakʼbey stseʼelil yoʼtan jaʼ koltayot ta yijkitayel (Col. 1:10; 3:23).

11. ¿Bin yuʼun ya skʼan jnaʼojtik ta lek te bin ya jpastike?

¹¹ Jnaʼtik ta lek te bin ya jpastike. Jaʼ ini jaʼme ya skoltayotik ta sjuʼtesel te bin la jtatik ta nopel spasele. Jich bitʼil teme la jtatik ta nopel te bayalxan ya jkʼopontik te Biblia, pero teme maʼyuk jprogramatik maniwan ya xjuʼ kuʼuntik spasel. * Yanxan ejemplo, te ansianoetik ta jun kongregasion ya staik ta nopel te ya yulaʼtayikxan te ermanoetike, pero kʼaxix bayal tiempo sok maʼyuk machʼa yulaʼtayojik. Jun te bin ya xjuʼ ya xkoltayotik ta spasele, jaʼ te jich ya sjojkʼoybey sbaike: «¿Aybal jnopojtikix machʼatik ya skʼan ya kulaʼtaytik? ¿Labal jlebeytik skʼajkʼalel te bin-ora ya kulaʼtaytike?».

12. ¿Bin yaniwan skʼan pasel sok bin yuʼun?

¹² Jnaʼtik te bin ma xjuʼ kuʼuntike. Maʼyuk machʼa bayal stiempo, stakʼin sok yip ta spasel spisil te bin ya skʼan ya spase. Jaʼ yuʼun ya skʼan kʼoem ta koʼtantik te bin ya xjuʼ sok ma xjuʼ kuʼuntik spasele. Ayniwan bin-ora ya skʼan ya jeltaytik te bin la jtatik ta nopel spasel teme ma xjuʼ kuʼuntik skʼotesel ta pasele (Ecl. 3:6). Pero teme ya kiltik ta lek te bin la jnoptik spasele, teme ay la jeltaytik jtebuk sok ya kiltik te ya xjuʼ kuʼuntik skʼotesel ta pasel, ¿bin ya skoltayotik ta spasel? Kiltik joʼeb te bin ya xjuʼ ya jpastike.

13. ¿Bin-utʼil ya xjuʼ ya jta kiptik ta spasel te bin la jtatik ta nopel spasele?

¹³ Jkʼanbeytik kiptik te Dios yuʼun ya jpastik. Te Jehová ya xjuʼ ya yakʼ kiptik yuʼun ya jpastik te bin la jtatik ta nopel spasele (Filip. 2:13). Jaʼ yuʼun jkʼanbeytik te schʼul espiritu swenta ay te kiptik ya xtuun kuʼuntike. Mame jkom jbatik ta skʼoponel te Dios manchukme jich yilel te ma sutbotik ta orae. Te Jesús jich la yal: «Cʼanahic, hich me ya xʼaʼbotex [te chʼul espiritue]» (Luc. 11:9, 13).

14. ¿Bin-utʼil ya skoltayotik te tojobtesel ay ta Proverbios 21:5 ta spasel te bin la jtatik ta nopele?

¹⁴ Jchajpantik te bin ya jpastike (kʼopona Proverbios 21:5). Swenta ya jpastik chikan biluk aʼtel, nail ya skʼan ya jchajpantik ta lek te bin ya skʼan pasele sok jaʼuk jich ya jpastik te bitʼil la jchajpantike. Jaʼ pajal sok te kʼalal ay bin ya jtatik ta nopel spasel, jtsʼibaytik ta jun lista te bintik ya jpastik baele. Teme ya jpastik ta cheʼoxeb parte jun mukʼul aʼtel, ya xjuʼ ya jtatik ta ilel te yak ta juʼel kuʼuntik te kaʼteltike. Te Pablo la yalbey te corintoetik te «jujun sba cʼahcʼalil semana» akʼa yakʼik ta parte jtebuk takʼin, ma jaʼuk te jaʼto ya stsobik-a te kʼalal ya xkʼote (1 Cor. 16:2). Yanxan te bin lek ya xlokʼ-a te kʼalal ya jpastik ta cheʼoxeb parte jun mukʼul aʼtel, jaʼ te maba ya jkuytik te ma xjuʼ kuʼuntik spasele.

15. Teme la jchajpantikix-a te bin ya jpastike, ¿binxan ya xjuʼ ya jpastik?

¹⁵ Teme ya jchajpantik sok ya jtsʼibaytik te bin ya jpastik baele ya skoltayotik yuʼun ya jpastik te bin la jtatik ta nopele (1 Cor. 14:40). Jun ejemplo, te ansianoetik ta jujun  kongregasion albilik te yakuk stsaik jtul ansiano swenta ya stsʼibay spisil te bin ya staik ta nopel spasele, te machʼa ya spas sok te bin-ora ya xjuʼ ta pasel yuʼune. Te ansianoetik te ya schʼuunik spasel ini, ya xjuʼ yuʼunik spasel spisil te bin la staik ta nopele (1 Cor. 9:26). Jaʼnix jich ya xjuʼ ya jpastik te joʼotike. Ya xjuʼ ya jtsʼibaytik ta jun lista te bin ya skʼan ya jpastik ta jujun kʼajkʼal sok jaʼ nail ya kakʼtik te bin ya jkʼan ya jpastik ta orae. Te kʼalal jich ya jpastike, ya skoltayotik ta spasel te bin la jtatik ta nopel spasel sok maba bayal tiempo ya xjalajotik ta spasel.

16. Jich bitʼil ya yal Romanos 12:11, ¿bin-a te mukʼ skʼoplal yuʼun ya jpastik te bin la jtatik ta nopel spasele?

¹⁶ Jpastik tulan. Swenta ya jtʼuntik te bin la jchajpantikixe sok te ya xjuʼ kuʼuntik spasel, ya skʼan ya jpastik tulan (kʼopona Romanos 12:11). Te Pablo la yalbey te Timoteo te yakuk snopxan lek pʼijubteswanej sok te manchuk ya skom sba ta spasele. Te tojobtesel ini jaʼnix jich ya xtuun kuʼuntik ta yantikxan te bin ya jkʼan ya jpastik ta stojol te Jehovae (1 Tim. 4:13, 16).

17. ¿Bin-utʼil ya skoltayotik te Efesios 5:15, 16 ta spasel te bin la jtatik ta nopel spasele?

¹⁷ Jtuuntestik ta lek te tiempo (kʼopona Efesios 5:15, 16). Jlebeytik yorail te bin ya jpastike sok mame jelbeytik te yoraile. Mame jnoptik te ay jun kʼajkʼal te kʼax lek ta pasel te kaʼteltike, melel maniwan ayuk ya jtatik te kʼajkʼal-abi (Ecl. 11:4). Mame kakʼtik te bin maʼyuk lek skʼoplal ya slajin te jtiempotik sok kiptik ta spasel te bin mukʼxan skʼoplale (Filip. 1:10). Teme ya xjuʼe, jletik jun ora te kʼalal maʼyuk bayal bin ya schʼaytes koʼtantik. Kalbeytik te yantik te manchuk ya schʼaybotik koʼtantike. Ya xjuʼ ya jtupʼtik te selular sok patilto ya kiltik te korreo elektroniko o te redes sociales. *

18, 19. Te kʼalal la jtatikix ta nopel ta lek te bin ya jpastike, ¿bin ya skoltayotik yuʼun maba ya jkom jbatik manchukme ay bin ya smakotik?

¹⁸ Jaʼuk ya kiltik te bin lek ya xlokʼ-ae. Te bin ya jtatik ta nopel spasel ya xjuʼ ya jpajtik sok te ay banti ya xbootike. Teme ya jkʼan ya xkʼootike, ma jkom jbatik ta beel manchukme makal te be sok manchukme ya skʼan ya jtsaktik yan be. Jaʼnix jich teme jaʼ ya kiltik te bin lek ya xlokʼ-a te bin la jtatik ta nopel spasele, maba oranax ya jkom jbatik ta spasel manchukme ay bin ya smakotik (Gál. 6:9).

¹⁹ Maba kʼun te ya jtatik ta nopel ta lek te bin ya jpastik sok te ya xkʼot ta pasel kuʼuntike. Pero ta swenta te koltayel ya yakʼbotik te Jehová ya xjuʼ te ay jpʼijiltik sok kiptik ta skʼotesel ta pasel te bin la kaltike.