Te bintik lek lokʼ ta scholel skʼop Dios

«La stabey swentail te skuxlejal»

TE Jesús ya yal te ya snaʼbey sba ta lek te tuminchijetik yuʼune (Juan 10:14). Teme ay jtul ants winik te lek yoʼtan, te ya smulan te lamalkʼinal sok te bin toj ta pasel, yame smulan sjokinel te jnopojeletik yuʼun te Jesús. Yame stabey swentail te skuxlejalik jich bitʼil kʼot ta stojol jtul ants ta Bélgica. Jaʼ ini jaʼ te bin kʼax ta skuxlejal:

«Kʼalal te testigoetik yuʼun Jehová kʼotik ta jna, kʼax jmeloj koʼtan-a sok jnopoj-a te ya jmil jbae. La jmulan te la yalbonik te bitʼil ya xlaj te wokolil ta Balumilal, pero maba la jmulan te jaʼ ay ta swenta spasel te Diose. Ayix waxakeb jaʼbil-a te la kijkitay te iglesia, melel kʼax ma lek la kil te jchebal-oʼtanetike. Manchukme jich-abi, kʼot ta koʼtan te jaʼ smelelil te bin la yalbonik te Testigoetik sok te mananix ya xjuʼ kuʼuntik-a te namal ayotik ta stojol te Diose.

»Pero mel-oʼtantik sba te cheʼoxebnax buelta la yulaʼtayonik te Testigoetike. Melel maba la jtaikix ta kʼoponel. Cheb caja cigarro ya jnukʼ ta jujun kʼajkʼal-a sok jajch jtuuntes droga. Te bitʼil koʼtanuk ya jkʼan ya jkʼopon-a te jmamuch te lajeme, la jle koltayel ta espiritismo. ¡Kʼax xiʼbantik sba te bin la jpase! Ta ajkʼabal, te kʼalal jtukel-ae, ya xtal yutsʼinonik te pukujetike. Jich la spasbonik bayal u. Te kʼalal ya x-ijkʼub te kʼinal ya xiwon-a te jtukel ayone.

»Ta jun buelta te kʼalal lokʼon ta paxial, boon te banti maʼyuk kʼoemon-a sok la kil te yakik ta spasel jun mukʼul na. Yan-nax la kil-a te bayal ants winiketik yakik ta aʼtel tey-a. Te kʼalal noptsajonxan bael te banti ayike, la kil te jaʼik te testigoetik yuʼun Jehová te yakik ta spasel jun sNail Tsoblej. Jul ta koʼtan te kʼalal la yulaʼtayonik ta jna, sok la jnop ta koʼtan te kʼax lek te jichuk skuxlejalik spisil te ants winiketik te bitʼil te Testigoetike.

»Ya jkʼan-a te yakuk xchaʼyulaʼtayonik ta jna, jaʼ yuʼun kʼopojon sok te machʼatik ayik ta aʼtel ta spasel te sNail Tsoblej. La jkʼopon Dios, sok lajuneb kʼajkʼal ta patil tal yulaʼtayon te hermano te la jkʼopone. La sjojkʼoybon teme ya jkʼan te ya xchaʼnojptesonik ta Biblia, la kalbey te yake. La yikʼon ta tsoblejetik ta sNail Tsoblej. ¡Maʼyuk banti jich kiloj-a! Ta bayal tiempo jleoj ants winiketik te tseʼel yoʼtanik sok te ya yakʼik ta ilel skʼuxul yoʼtanik.

»Jaʼto tal-abi maʼyuk jkomoj jba ta tsoblejetik. Oxebniwan semana ta patil la kijkitay snukʼel te cigarro. La jchʼojtiklan bael te libroetik yuʼun astrología sok te discoetik yuʼun música te ay spukujil, jaʼto jich la kaʼiy te ma tal yutsʼinonikix te pukujetike. La jpas ta jkuxlejal te bin ya smulan te Jehová, sok oxeb u ta patil jajchon ta lokʼel ta scholel skʼop Dios. Wakeb u ta patil la kichʼ jaʼ, sok cheb kʼajkʼal ta patil ochon ta precursora auxiliar.

»Bayal ya kalbey wokol te Jehová yuʼun spisil te bin spasoj ta jtojol. La jtabey swentail te jkuxlejal. Jich, te sbiil te Jehová jaʼ jun toyol tsʼajkʼ te banti ya kichʼtik kanantayel (Proverbios 18:10). Jich ya kaʼiy jba te bitʼil te salmista te jich la stsʼibay: ‹Ha lec te jun cʼahcʼal ta amaqʼuetic awuʼun te bin utʼil jmil cʼahcʼal ta yan lugar. Ha lec ya caʼiy te ha jcanan-puertahon ta sna te Dios cuʼun, te bin utʼil te ya xnahinon ta sna te machʼatic chopolic›».

Te ants ini te manso yoʼtan la stabey swentail te skuxlejal. Sok jaʼnixme jich ya xjuʼ ya staik te ants winiketik te ya sleik te Jehová.