TE Julian jich ya yal: «Yato xjul ta koʼtan te kʼalal la yichʼ lokʼesel ta congregación te jnichʼan, bayal la jmel koʼtan yuʼun. Bayal bin ya jmulantik spasel ta jchebaltik-a sok kʼax lekil alnichʼan-a, pero ta oranax jajch spas te bin ma leke. Spisil-ora ya x-okʼ-a te kinam, sok ma jnaʼix bin ya jpas-a yuʼun ya kakʼbey smukʼul yoʼtan. La jojkʼoybey jbatik bantiwan chʼayotik».

Kʼax kʼux ta aʼiyel te kʼalal ay machʼa ya yichʼ lokʼesel ta congregación, jich yuʼun ¿bin yuʼun ya yalik te jich ya yichʼ akʼel ta ilel kʼuxul oʼtanil? ¿Bin yuʼun ya yal te Biblia te jich ya skʼan pasele? ¿Bin yuʼun ya yichʼ lokʼesel ta congregación jtul hermano?

Ay cheb swentail te bin yuʼun ya xjuʼ ya yichʼ lokʼesel ta congregación jtul testigo yuʼun Jehová. Te sbabial, jaʼ te ya spas tulan mulil, te schebal, jaʼ te ma sujtes yoʼtane.

Te Jehová snaʼoj te maba tojik te j-abatetik yuʼune, pero ya skʼan te yakuk schʼuunik te mantaliletik yuʼune. Jich bitʼil ya yal te ma skʼan te ya xyalotik ta spasel mulwej, te ya kichʼtik ta mukʼ lokʼomba, te ya x-elkʼajotik, te ya xloʼlaywanotik, te ya kaʼiytik milaw o te ya jpastik te espiritismo (1 Cor. 6:9, 10; Apoc. 21:8).

Jpisiltik jnaʼojtik te ma kʼax tulanuk ta chʼuunel te mantaliletik yuʼune sok te ya skanantayotike. Sok ¿mabal jichuk te jpisiltik ya jmulantik sjokinel te machʼatik lamal yoʼtanik, lek stalelik sok te ma xloʼlaywanike? Jaʼme jich stalelik te j-abatetik yuʼun Dios. Te bin yuʼun leknax ya kaʼiy jbatik te kʼalal ya jokintik te hermanoetik jaʼ ta swenta te ya jchʼuuntik te mantaliletik yuʼun te Jehová jich bitʼil la kaltik ta jamal te kʼalal la kakʼ jbatik ta stojole.

Pero, ¿bin ya xkʼot ta pasel teme jtul j-abat yuʼun Dios ya spas tulan mulil? Ta namey kʼinal ay j-abatetik yuʼun Dios te la spasik tulan mulil, pero maba pʼajotik yuʼun te Diose, jich bitʼil te David. Manchukme la spas mulwej sok la yaʼiy milaw, te j-alwanej Natán jich la yalbey: «Te Jehová la spasbatix perdón yuʼun te amule» (2 Sam. 12:13).

Pero, ¿bin yuʼun la spasbey perdón te David? Melel te David la sujtes yoʼtan ta smelelil (Sal. 32:1-5). Jaʼnix jich, ta ora ini teme jtul j-abat yuʼun Dios ya spas tulan mulil sok ya sujtes yoʼtan ta smelelil sok maba ya spasix, maba ya yichʼ lokʼesel ta congregación (Hech. 3:19; 26:20). Pero, teme maba ya sujtes yoʼtan ta smelelil, te ancianoetik ya slokʼesik ta congregación.

Jichniwan yilel te kʼax tulan o te kʼax chopol ta aʼiyel te ay machʼa ya yichʼ lokʼesel ta congregación, kʼaxtoxan-a teme jaʼ jfamiliatik o kamigotik. Pero, te Biblia ya yalbotik bin yuʼun ya xchiknaj ta ilel kʼuxul oʼtanil te kʼalal ay machʼa ya yichʼ lokʼesel ta congregación.

Te Jesús la yal te ya xchiknaj ta ilel te pʼijil oʼtanil ta swenta te yaʼtelul (Mat. 11:19). Stojil te ya yichʼ lokʼesel ta congregación te machʼa ma sujtes yoʼtan yuʼun te smule sok jich ya xchiknaj ta ilel pʼijil oʼtanil, melel ay bintik lek ya xlokʼ-a. Kiltik oxeb:

Te ants winiketik lek ya xkʼopojik ta stojol te Jehová. Te bitʼil testigootik yuʼun Jehová, te ants winiketik ya xjuʼ te lek o ma lek ya xkʼopojik ta stojol te Jehová ta swenta te jtaleltike (Is. 43:10). Jaʼ pajal sok te kʼalal te ants winiketik ya xkʼopojik ta stojol te meʼil tatiletik ta swenta te bin yilel stalel te yal snichʼanik. Te jtaleltik ya yakʼ te lek o ma lek te bin ya yalik ta stojol te Jehová. Ta skʼajkʼalel te j-alwanej Ezequiel, te lumetik te ay ta sjoyobal te lum Israel snaʼojik-a te judioetik ya yichʼik ta mukʼ te Jehová (Ezeq. 36:19-23). Ta kʼajkʼal ini jaʼnix jich te ants winiketik snaʼojik te kichʼojtik ta mukʼ te Jehová. Jaʼ yuʼun, teme lek te jtaleltike, lek te bin ya yalik ta stojole.

Pero, teme ya jpastik te bin chopol o te bin ma lek, ya kakʼtik ta bolobtesel te schʼul biil te Diose. Jaʼ yuʼun, te jpuk-kʼop Pedro jich la yal: «Ma me pajaluc awoʼtanic soc te bin la amulanic spasel ta nahil to te cʼalal ma to anaʼojic qʼuinal a. Pero, hich te bin utʼil chʼultesbil te Machʼa la yiqʼuex, hichuc chʼultesbiluquex ta spisil bintic yac apasic. Como hich tsʼihbabil hilel: Chʼultesbiluquex, como hoʼon chʼul Dioson» (1 Ped. 1:14-16). Jich yuʼun, teme lek jtaleltik, ya yichʼ albeyel yutsil skʼoplal te Diose.

Kʼalal jtul testigo yuʼun Jehová ya xkʼay ta spasel te bin ma lek, yananix snaʼik stojol-a te machʼatik ya snaʼbeyik sbae. Jaʼ yuʼun, te kʼalal ya yichʼ lokʼesel ta congregación, ya xchiknaj ta ilel te chʼultesbil te lum yuʼun te Jehová sok te ya spasik ta skuxlejalik te bin ya snopik ta Bibliae. Kiltik jun ejemplo. Jtul winik ta Suiza kʼot ta sNail Tsoblej sok la yal te ya skʼan ya x-och ta testigo yuʼun Jehová. ¿Bin yuʼun? Jaʼ ta swenta te la yichʼ lokʼesel ta congregación te swix ta skaj te la spas mulwej, te winik la yal te ya skʼan ya x-och ta jun organización te «ya yilayik te chopol talelil».

Jich ya yichʼik kanantayel te hermanoetik ta congregación. Te jpuk-kʼop Pablo la yalbey te jchʼuunjeletik ta Corinto te ya xjuʼ ya staik wokolil ta congregación teme maba ya slokʼesik te machʼa maba ya sujtes yoʼtan yuʼun te smule. La yal te ya xjuʼ ya yakʼ ta chʼayel te yantik, jich bitʼil te «jteb nax levadura ya spajubtes scʼohlol te weʼbal». Sok la yakʼ te mantalil ini: «Loqʼuesa ta awohlilic te machʼa cʼax chopol bin spasoje» (1 Cor. 5:6, 11-13).

Te machʼa yak ta antsiwej, te la yalbey skʼoplal te Pablo, yak ta spasel ta komonsitil-a. Ta swenta-abi, te yantik jchʼuunjeletik ma chopolix la yilik te bin ya spase (1 Cor. 5:1, 2). Te manchuk la slokʼesik ta congregación, jajchniwan spasik mulwej jich bitʼil kʼayemik ta spasel ta Corinto. Jaʼnix jich, ta kʼajkʼal ini teme ma xyichʼ lokʼesel te machʼa ya spas tulan mulil, te yantik hermanoetik maniwan mukʼ skʼoplal ya yilikix te ya schʼuunbeyik smantal te Dios (Ecl. 8:11). Te machʼatik ya spasik tulan mulil, pero maba ya sujtes yoʼtanik jich kʼoemik bitʼil tonetik ta yeʼtal jaʼ te ya slajinbeyik te schʼuunel yoʼtan te yermanotakik (Jud. 4, 12).

Jich ya xjuʼ ya sjeltay stalel te machʼa la spas te tulan mulil. Te Jesús la yalbey skʼoplal jtul kerem te lokʼ bael ta sna sok la slajin spisil te bin ay yuʼun ta antsiwej. Te kʼalal namal ay ta stojol-a te sfamilia, kʼot ta yoʼtan te tulan sok te maʼyuk swentail te skuxlejal. Jich la sujtes yoʼtan sok sujt ta sna (Luc. 15:​11-24). Kʼax tseʼel yoʼtan te stat te kʼalal la yil te la sjeltay stalel. Te bin la yal te Jesús ta swenta te tatil ini ya yakʼ jnaʼtik bin-utʼil ya yaʼiy sba te Jehová. Te Dios jich ya yal ta Biblia: «Ma jcʼan te ya xlaj te machʼa chopol, ha ya jcʼan te ya yihquitay hilel te be yuʼun soc te ya xcuxaj» (Ezeq. 33:11).

Jaʼnix jich, te machʼatik ya spasik tulan mulil maba ya x-ayinikix ta congregación —te jich kʼoem bitʼil sfamiliaik—, sok yawan smel yoʼtanik yuʼun. Yaniwan yil swokolil yuʼun te bin ma lek la spasike sok ya xjul ta yoʼtanik te jaʼ tseʼel yoʼtanik-a te kʼalal yamigoinejik te Jehová sok te kʼalal ya sjokinik-a te hermanoetike. Jichniwan ya snaʼik kʼinal sok ya sujtik ta stojol te Jehová.

Swenta ya sujtes yoʼtan te machʼa la spas tulan mulil ya skʼan ya kakʼtik ta ilel skʼuxul koʼtantik, pero jaʼnix jich te tulan ya kakʼ jbatik ta stojol. Jich la yal te David: «Acʼa yaʼbon castigo te machʼa toj yoʼtan, lec ya caʼiy» (Sal. 141:5). Swenta ya xkʼot ta koʼtantik te texto ini, jnop kaʼiytik te ejemplo ini. Nopa awaʼiy te ay machʼa yak ta weʼel sok ya xkajtsʼaj sweʼel ta snukʼ. Ma xyichʼix ikʼ yuʼun sok ma xjuʼ ya xkʼopojix. Teme ma xkoltayot ta ora, ya xjuʼ ya xlaj, pero jtul yamigo ya xtal smaj ta spat yuʼun ya xlokʼ te bin katsʼal ta snukʼe. Manchukme kʼux ya yaʼiy te ya xmajote, jaʼ ya xkoltayot yuʼun maba ya xlaj. Jaʼnix jich, te David lek la yaʼiy te la yichʼ tojobtesel manchukme kʼux la yaʼiy, melel snaʼoj te jaʼ yutsil slekilal.

Te tojobtesel ya xtuun yuʼun te machʼa la spas tulan mulil, sok yaniwan yichʼ lokʼesel ta congregación. Te snichʼan te Julian te la kalbeytikix skʼoplal la sjeltay stalel sok sujt ta congregación lajuneb jaʼbil ta patil. Ta ora ini, jaʼix anciano ta congregación sok jich ya yal: «Te kʼalal la kichʼ lokʼesel ta congregación, la kil te ya yakʼ wokolil te bin la jpase. La skoltayon te tojobtesel la kichʼe» (Heb. 12:7-11).

Mel-oʼtantik sba te kʼalal ay machʼa ya yichʼ lokʼesel ta congregación, pero juluk ta koʼtantik te ya xjuʼ ya xchaʼsujt ta stojol te Jehová. Jpisiltik ya xjuʼ ya xkoltaywanotik yuʼun ya xchaʼsujt.

Te ancianoetik ya skʼan ya spasik tulan ta stʼunbeyel te skʼuxul yoʼtan te Jehová te kʼalal ya yalbeyik te ya yichʼ lokʼesel ta congregación te machʼa spasoj tulan mulil. Jaʼ yuʼun ya skʼan ya scholbeyik yaʼiy sok skʼuxul yoʼtanik bin ya skʼan ya spas swenta ya xchaʼoch ta congregación. Jaʼnix jich ya xjuʼ ya yulaʼtayik ta patil teme ya yilik te yakix ta sjeltayel te skuxlejal swenta ya yalbeyik te bin ya skʼan ya spas yuʼun ya sujt ta stojol te Jehová. *

Te sfamilia te machʼa ya yichʼ lokʼesel ta congregación ya skʼan ya yichʼik ta wenta te bin ya staik ta nopel te ancianoetik, jich ya yakʼik ta ilel te kʼux ta yoʼtanik te machʼa la yichʼ lokʼesel soknix te congregación. Te Julian jich ya yal: «Spisil-ora kʼux la kaʼiy ta koʼtan te jnichʼan, pero ta skaj te bin yilel stalel la jpit jbatik».

Te hermanoetik ta congregación ya yakʼik ta ilel te kʼux ta yoʼtanik te machʼa la yichʼ lokʼesel ta congregación, jaʼ yuʼun maba ya sjokinik sok maba ya skʼoponik (1 Cor. 5:11; 2 Juan 10, 11). Jich ya skoltaybeyik skʼoplal te tojobtesel ya yakʼ te Jehová ta swenta te ancianoetik. Pero, jaʼnix jich ya skʼan ya yakʼbeyik yil skʼuxul yoʼtanik te sfamilia te machʼa la yichʼ lokʼesel, melel bayal ya smel yoʼtanik. Ma jkʼantik te stukel ya yaʼiy sbaik, melel maba la yichʼik lokʼesel ta congregación stukelik (Rom. 12:13, 15).

Te Julian jich ya yalxan: «Te kʼalal ya kichʼtik lokʼesel ta congregación, jaʼ ya skoltayotik yuʼun ya kichʼtik ta mukʼ te mantaliletik yuʼun te Jehová. Manchukme kʼux ta aʼiyel, ta patil ay bin lek ya xlokʼ yuʼun-a. Te manchuk la kijkitay skʼoponel te jnichʼane, maniwan ayuk bin-ora sujt ta stojol te Jehová te jichuke».