Te spasel perdón jaʼ te maba ya jkʼej kilinbatik ta stojol te machʼa la yutsʼinotik sok te maba ya jnaʼulantikixe. Jaʼ ini ma skʼan ya yal te maʼyuk skʼoplal ta koʼtantik te bin la kichʼtik pasbeyel o te yanax kakʼtik ta ilel te maʼyuk bin kʼot ta pasele.

TE BIN YA YAL TE BIBLIA: «Talel kʼaxel tsʼikbeya abaik sok pasbeya abaik perdón sok spisil awoʼtanik manchukme yuʼun-nix ay bin ma lek la awichʼik pasbeyel-a» (Colosenses 3:13).

«Te kʼalal ay machʼa kʼux ta awoʼtan, ma jaʼuk ya xbajt ta awoʼtan yilel te banti ya xchʼaye, jaʼ ya awil te yak ta spasel tulan ta slekubtesel te stalele» (xchi te Aaron).

Teme ya akʼej awilinba maniwan lek ya awaʼiy aba yuʼun sok ya xjuʼ ya stsakat chamel. Jaʼnix jich ya xjuʼ ya yutsʼin te anujpunele.

«Jun buelta te jmamalal la skʼanbon perdón yuʼun te bin ma lek la spasbon te kʼux la kaʼiye. Wokol la kaʼiy spasbeyel perdón, pero juʼ kuʼun. Koʼtanuk te oranax la jpasbey perdón. Maba kʼax jwokoltik te jichuke» (xchi te Julia).

JOJKʼOYBEYA ABA INI:

Jichuk xa ajojkʼoybey aba te kʼalal ay bin ya yalbat o ay bin ya spasbat te ajoy te kʼux ya awaʼiye:

• ¿Jtebnaxbal jtael?

• ¿Puersabal te ya skʼanbon perdón, o yabal xjuʼ te ya jchʼay ta koʼtan?

ILBEYAIK SKʼOPLAL TA ACHEBALIK INI:

• ¿Orabal ya jpasbey jbatik perdón?

• ¿Bin ya xjuʼ ya jpastik yuʼun ora ya jpasbey jbatik perdón?

PASA AWIL INI:

• Te kʼalal ay bin ya yalbat o ay bin ya spas te ajoy te ya yutsʼinbat awoʼtan, mame xa anop te yoloj la spase.

• Mame orauk ya x-ilinat sok te ajoye, naʼame te «jpisiltik ay bayal te banti ya jkʼojchin koktike» (Santiago 3:2).

«Oranax ya jpastik perdón te kʼalal jchebaltik ay jmultike, pero te kʼalal jtulnaxe jaʼ wokol ta spasel perdón. Ya skʼan te mero pekʼel koʼtantik, yuʼun ya kichʼbeytik ta wenta te skʼop te machʼa la yutsʼinotik sok te ya jpasbeytik perdón» (xchi te Kimberly).

TE BIN YA YAL TE BIBLIA: «Pasa tulan ta schajpanel ta oranax te kʼop jajchem awuʼunik» (Mateo 5:25).