TA STOJOL TE MACHʼATIK NUJPUNEMIK
2: Talel kʼaxel xa akoltay abaik
¿BIN SMAKOJBEY SKʼOPLAL?
Te winik sok te ants te talel kʼaxel ya skoltay sbaik jich ya x-aʼtejik te bitʼil te machʼa ya stij te avión sok te machʼa ya xkoltayot yuʼun te pajal te banti snopojik ya xbajtike. Ma stukeluknax ya sle yutsil slekilik, jaʼ ya spasik te bin lek ya xkʼotik yuʼun ta schebalik, jichnix ya spasik te kʼalal ay swokolike.
TE BIN YA YAL TE BIBLIA: «Maba chebikix, junxanix sbakʼetalik» (Mateo 19:6).
«Yuʼun lek ya xkʼot te nujpunel ya skʼan te schebalik talel kʼaxel ya skoltay sbaik» (xchi te Christopher).
¿BIN YUʼUN TE BAYAL SKʼOPLAL?
Teme maba talel kʼaxel ya skoltay sbaik te machʼatik nujpunemik, te kʼalal ya staik wokolil, jaʼnix ya x-och stsak sbaik ta kʼop, ma jaʼuk ya sleik bin-utʼil ya schajpanik te wokolile. ¿Bin ya xlokʼ-a? Manchukme ma tulanuk te kʼop ta sjajchibal ya xjuʼ ya xbatsʼej yuʼun.
«Swenta lek ya xkʼot te jnujpuneltik ya skʼan te talel kʼaxel ya jkoltay jbatik. Te manchuk jich ya jpas sok te jmamalal jich kʼoem te jun-nax na te banti kuxulotik, pero te maba jun ya jtatik ta nopel te bin ya jpastike» (xchi te Alexandra).
¿BIN YA XJUʼ YA APAS?
JOJKʼOYBEYA ABA INI:
-
¿Jaʼnaxbal awuʼun ya awaʼiy te takʼin ya atae?
-
¿Jaʼbal lek ya awaʼiy aba te kʼalal maba ajokinej te ajoye?
-
¿Namalbal awakʼoj aba ta stojol te sfamilia te ajoy manchukme jun-nax ayik stukelik?
ILBEYAIK SKʼOPLAL TA ACHEBALIK INI:
-
¿Bintik ya jpastik ta jchebaltik te ya yakʼ ta ilel te jun ayotike?
-
¿Banti ya skʼan ya x-aʼtejotikxan?
-
¿Bin ya xjuʼ ya jpastik swenta talel kʼaxelxan ya jkoltay jbatik ta jchebaltik?
PASA AWIL INI:
-
Te winik sok te ants te nujpunemik jich kʼoem te yakik ta tajimal. ¿Bin ya xjuʼ ya spasik swenta schebalik ayik ta jun equipo te jich ma stsal sbaik ta stukeliknix?
-
Mame jaʼuknax ya anop bin-utʼil ya xjuʼ ya awaʼiy tsalaw, nopa bin-utʼil ya xjuʼ ya awaʼiyik tsalaw ta achebalik.
«Te bin tulanxan skʼoplal ta nujpunel, jaʼ te ayuk lamalkʼinal sok te junuknax ayotike. Ma jaʼuk machʼa ay razón yuʼun» (xchi te Ethan).
TE BIN YA YAL TE BIBLIA: «Mame atukeliknax ya ale awutsil alekilalik, jaʼme xa alebeyik yutsil slekil te yantike» (Filipenses 2:3, 4).
