Te bin ya yakʼ ta ilel machʼaat-a, ma jaʼuknax te abiil, o te bin yilel te asit awelaw, jaʼnix jich te bintik lek ya apas, te bin schʼuunoj awoʼtan sok te bin yilel te atalele.

Te kʼalal lek ya awaʼiy aba ta swenta te bin yilel atalel ya awakʼ ta ilel, maba ya awijkitay spasel te bintik lek sok maba ya awakʼ te ya sujat yantik achʼix keremetik ta spasel te bin maba ya akʼane.

«Bayal machʼatik ma snaʼik bin kʼuʼul pakʼal ya slapik jaʼ ya slapik te bin ya slapik te yantike, jich kʼoemik bitʼil te mukʼul muñecoetik o muñecaetik te banti ya yakʼik ta ilel pakʼ te jchonbajeletike» (xchi te Adrian).

«Ya xjuʼix kuʼun skoltaybeyel skʼoplal te bin lek manchukme wokol ya kaʼiy. Ya jnaʼ machʼatik kamigotak ta smelelil teme lek ya kaʼiy jba ta yolilik ta skaj te ya yichʼik ta mukʼ te bin jchʼuunoje» (xchi te Courtney).

TE BIN YA YAL TE BIBLIA: «Mame xa akʼayinbeyik stalel te balumilal ini; jaʼukme ya yachʼubtesbeyex te snopojibal awuʼunik te Diose» (Romanos 12:2).

Pasa pensar bin yilel atalel ta ora ini sok bin yilel atalel ya akʼan ya xkʼoat ta pajel chaʼbej, yame skoltayat teme ya awil bintik lek ya apas, bintik wokol ya awaʼiy spasel sok bintik achʼuunoj ta ora ini. Yame xjuʼ ya skoltayat te jojkʼoyeletik te ayik ta alan.

¿Bintik lek ya apas?: «¿Bintik lek ay kuʼun o bintik ya jnaʼ spasel ta lek? ¿Bintik-a te chikan ta ilel te ya jnaʼ spasel ta lek? ¿Yabal jnaʼ skomel jba? ¿Sab-bal ya xkʼoon te banti ikʼbilon? ¿Yabal jmulan aʼtel? ¿Aybal yutsil koʼtan ta stojol te yantike? ¿Bintik lek ya jpas?».

PASA AWIL INI: Teme wokol ya awaʼiy stael ta ilel te bintik lek ya apas o te taleliletik te ay awuʼune, kʼanbeya koltayel te apapa o te amama o jtul amigo.

TE BIN YA YAL TE BIBLIA: «Ta jujuntul akʼame stsajtay yil te bin yilel te yaʼtele, jichme ya sta stseʼelil yoʼtan yuʼun te bin spasoje, mame jaʼuk te ya spaj te yaʼtel sok te yane» (Gálatas 6:4).

¿Bintik wokol ya awaʼiy spasel?: «¿Bintik ya skʼan ya jlekubtes ta jtalel? ¿Bin-ora ya yikʼbonxan koʼtan spasel te bintik ma lekuke? ¿Bin-ora jich kaʼiyoj te ya skʼan te ya jpasxan tulan yuʼun ya jkom jba?».

TE BIN YA YAL TE BIBLIA: «Teme ya kaltik ‹Maʼyuk jmultik›, joʼotiknix ya jloʼlay jbatik ta jtukeltik» (1 Juan 1:8).

¿Bintik achʼuunoj?: «¿Bintik mantaliletik ya jtʼun ta jkuxlejal sok bin yuʼun? ¿Jchʼuunojbal Dios? ¿Bin-utʼil ya xjuʼ ya kakʼ ta ilel te aynix-a te Diose? ¿Bintik-a te ma stojiluk ta pasel ya kil, sok bin yuʼun? ¿Aybal bin lek yakon ta smaliyel te ya xtal te pajel chaʼbeje?».

TE BIN YA YAL TE BIBLIA: «Ya me scanantayat te tsahtayel, soc ya me scanantayat te bin ay ta naʼel» (Proverbios 2:11).