Te bin ya jkʼan ya jtatik o te bin ya jkʼan ya jpas ta jkuxlejaltik ma wayichilnax o te yan-nax jkʼantik te jichuk ya xkʼot ta pasele. Yuʼun ya jtatik te bin ya jkʼantike, ya skʼan te ya jchaptik ta lek, te tulan ya x-aʼtejotik sok te ya jeltik jtebuk te bin yakotik ta spasel teme jich ya skʼane.

Te bin ya jkʼan ya jpastike, ay ya yichʼ cheʼoxeb kʼajkʼal, cheʼoxeb u o repenta cheʼoxeb jaʼbil yuʼun ya jtatik. Swenta ya jtatik o ya xjuʼ jpasbeltik te bin mukʼxan skʼoplal o te bin ya yichʼ bayal jaʼbil, ya skʼan te ay bintik nail ya jpastik o ya jtatik.

Te kʼalal ay bin ya xjuʼ awuʼun spasel, jich ya awaʼiy aba te ay bintikxan ya xjuʼ ya apas, lekxan ya awil aba sok te awamigotak sok tseʼelxan awoʼtan-a.

Ya anaʼ te ay bintikxan ya xjuʼ apasbel. Teme ya xjuʼ awuʼun spasel te bin maba ya yichʼ bayal tiempo o te bin ma kʼax mukʼ skʼoplal, ya stijbat awoʼtan yuʼun ya akʼan ya apas te bin mukʼxan skʼoplal o te ya yichʼxan bayal tiempo. Jaʼnix jich ya skoltayat yuʼun maba ya axiʼ sitintayel te wokoliletik ta jujun kʼajkʼal, jich bitʼil te tenel yuʼun te yantike.

Lekxan ya awil aba sok awamigotak. Jpisiltik ya jmulantik sjokinel te machʼatik ya snaʼik bin ya skʼan ya spas ta skuxlejalik sok te ya spasik tulan ta staele. Jaʼnix jich ya kamigoin jbatikxan ta lek sok te yantik te kʼalal jun-nax ya x-aʼtejotik yuʼun ay bin ya jtatik ta pajal.

Jich tseʼelxan awoʼtan-a. Te kʼalal ya xjuʼ awuʼun spasel te bin la anop ya apase, kʼax lek ya awaʼiy aba yuʼun.

«Ya jmulan snopel ta nail bin ya jkʼan ya jpas, melel jich ya jpas tulan ta stael. Kʼax lek ya kaʼiy jbatik te kʼalal ay bin ya xjuʼ jpasbeltik. Te kʼalal ya kiltik te juʼix jpasbeltik-ae, ¡mero tseʼel koʼtantik yuʼun te juʼ jpasbeltike!» (xchi te Christopher).

TE BIN YA YAL TE BIBLIA: «Te machʼa ya stsahtay yil te iqʼue, ma ba ya yaʼiy tsʼumbajel, soc te machʼa ya yil te tocaletic, mayuc bin ora ya stsob te sit awal-tsʼunubile» (Eclesiastés 11:4).

Swenta ya anop bin ya akʼan ya apas ta akuxlejal sok te ya xjuʼ apasbel, pasa awil ini:

Nopa te bin ya akʼan ya apas. Tsʼibaya bintik ya akʼan ya apas. Ta patil ilawil bin-utʼil ya xjuʼ ya apas ta jujun.

Nopa ta lek bin-utʼil ya apas. Pasa ini ta jujunchajp te bin ya akʼan ya apase:

• Akʼa jun fecha te bin-ora ya akʼan ya akʼotes ta pasele.

• Tsʼibaya spisil te bintik ya apas swenta ya xkʼot ta pasel awuʼun.

• Nopa bintik ya xjuʼ ya smakat ta spasel sok nopa awaʼiy bin ya apas teme jich kʼot ta pasele.

Jacha spasel ta ora. Yuʼun ya xjajchat ta aʼtel ma puersauk te chapal ta jkʼaxel te bin ya akʼan ya apase. Nopa bin nail ya skʼan ya apas swenta ya ata te bin ya akʼane sok pasa. Te kʼalal olil yak ta bael awuʼun-ae, ilawil bin-utʼil yak ta bael awuʼun.

TE BIN YA YAL TE BIBLIA: «Te bintic chahpambil te nopbil ta lec, ya yacʼ te ay bintic ya yichʼ tahel a» (Proverbios 21:5).