TA STOJOL TE MEʼIL TATILETIK
8: Akʼbeya yilik lekil ejemplo
¿BIN SMAKOJBEY SKʼOPLAL?
Te machʼa ya yakʼ ta ilel lekil ejemplo jaʼ te machʼa ya spas ta skuxlejal te bin ya yakʼ ta nopele. Teme ya xtal ta leel ta na jtul meʼil tatil, pero ya yalbey te yal snichʼnabik «maba nakalon uta» te xchie, ¿bin ya xkʼot ta pasel? Ma xjuʼ ya smaliy te ya yal te bin smelelil te yal snichʼan, melel jaʼnix ya smulan spasel lot.
«Bayal machʼatik jich ya yalbeyik te yantike: ‹Jaʼ xa apas te bin ya kalbate ma jaʼuk te bin ya jpase›. Pero jkʼaxel ma xtuun teme jich ya kalbeytik te kal jnichʼnabtike, melel jich kʼoemik bin-utʼil jun esponja te ya stsakik o ya snopik spisil te bin ya kaltik sok te bin ya jpastik. Teme joʼotiknix maba ya jpastik te bin ya kakʼbeytik snopike, yame staik ta ilel sok ya yalbotik ta jamal» (xchi te David).
TE BIN YA YAL TE BIBLIA: «Jaʼat te ya awal «Mame x-elkʼajat», pero ¿ya x-elkʼajat?» (Romanos 2:21).
¿BIN YUʼUN TE BAYAL SKʼOPLAL?
Te alnichʼanetik jaʼto te kʼalal jchʼielikto-ae bayal bin ya snopik ta stojol te sjoʼtakik ta clase, pero kʼaxtoxan bayal bin ya snopik ta stojol te smeʼ statike. Jaʼex meʼil tatilex te machʼa ya xjuʼ yak awakʼbeyik yil te lekil be te awal anichʼnabike, pero jaʼnax teme jaʼexnix ya apas ta akuxlejalik te bin ya awakʼbeyik snopike.
«Ya xjuʼ te ay bin ya kalulanbeytik te kal jnichʼnabtik, pero ma jnaʼtik teme yakiknix ta yaʼiyel-a. Pero, te kʼalal ya yilik te maba ya jpastik te bin ya kalbeytike, yame yalbotik ta jamal. Ya yilik spisil te bin ya jpastik, manchukme jich yilel te maʼuke» (xchi te Nicole).
TE BIN YA YAL TE BIBLIA: «Te pʼijil oʼtanil te talem ta toyol [...] maba chaʼlam yoʼtan» (Santiago 3:17).
¿BIN YA XJUʼ YA APAS?
Jojkʼoybey aba: «¿Bin yilel jtalel ta stojol te joy sok ta stojol te kal jnichʼnabe? ¿Bintik ya kil ta televisión o ta Internet? ¿Bin yilel stalel te kamigotake? ¿Aybal skʼoplal ta koʼtan te yantike?». Te bin ya jkʼantik jaʼ te ya anop ini: ¿yabal akʼan te jich stalel ya xkʼotik te bitʼil te jaʼat te awal anichʼnabe?
«Joʼon sok te jmamalal maba ya jkʼanbeytik te kal jnichʼnabtik te ya spasik te bin maba ya jpastik te joʼotike» (xchi te Christine).
Kʼana perdón. Te awal anichʼnab snaʼojikix te maba tojat ta kʼinale. Jaʼ yuʼun, teme ya akʼanbey perdón te ajoy o te awal anichʼnab te kʼalal ay banti ya xchʼayate, yakatme ta yakʼbeyel yil te awal anichʼnab te mukʼ skʼoplal te pekʼeluk koʼtantik sok te maba ya jmuktik te jmultike.
«Ya skʼan ya kaltik ta jamal te banti ya xchʼayotik sok te ya jkʼantik perdón, melel teme maʼuke, ma snopik skʼanel perdón te kal jnichʼnabtike» (xchi te Robin).
«Te alnichʼanetik bayal bin ya snopik ta stojol te smeʼ statike. Kʼax bayal skʼoplal te ejemplo ya kakʼtik, melel spisil-ora ya yilik te bin ya jpastike. Te ejemplo te ya kakʼbeytik yilik jich kʼoem bin-utʼil jun libro te jamal te banti sjunal kʼajkʼal ay bin yakik ta snopel» (xchi te Wendell).
