Te machʼa ya smulan aʼtel maba ya xiʼ sba sok te aʼtele. Mero ya smulan aʼtel, ya smulan sleel te bin ya xtuun yuʼun sok skoltayel te yantik, manchukme ma mero mulantik sba te yaʼtele.

Chikan teme ya jmulantik o maʼuk, aynanix bin ya skʼan ya jpastik-a. Jaʼnix jich mero lebil te machʼa ya smulan aʼtel, melel bayal machʼatik ma smulanik te tulan aʼtel ta ora ini (Eclesiastés 3:13).

«Te kʼalal bayal ya x-aʼtejon, leknax ya kaʼiy jba yuʼun. Jaʼ yuʼun ya jkʼan ya x-aʼtejonxan. Jaʼnix jich te kʼalal ya amulan aʼtel ta lek ya yilik te yantike» (xchi te Reyon).

TE BIN YA YAL TE BIBLIA: «Ta spisil te aʼtel ay bin ya xlocʼ a» (Proverbios 14:23).

Te chaneb punto te ya xbajt kilbeytik skʼoplal ya xjuʼ ya skoltayat yuʼun ya amulan te aʼtele.

Nopa spasel ta lek awaʼtel. Chikan bin yakat ta spasel akʼa awoʼtan tey-a, chikan teme yakat ta aʼtel ta yutil ana, ta spasel atarea o ta spasel yan aʼtelil. Teme ay bin ya anaʼix spasel ta lek, pasa tulan ta slekubteselxan o te oraxan ya apase. Teme lekxan ya xlokʼ te awaʼtele, yame amulanxan spasel.

TE BIN YA YAL TE BIBLIA: «¿Ay bal awiloj te machʼa lec te yaʼtele? Ya me xcʼoht ta stojol ajwaliletic, ma haʼuc ya xʼaʼtej ta stojol te machʼatic peqʼuelique» (Proverbios 22:29).

Lebeya yutsil slekil te yantike. Te kʼalal ya apas te bin ay ta awenta spasele, ya sta yutsil slekil te yantike. Teme ya xkoltaywanat ta aʼtel ta yutil ana, jich ma chaʼoxtulnax machʼatik ya x-aʼtejik.

TE BIN YA YAL TE BIBLIA: «Te machʼa ay bin ya yakʼ jaʼ bayalxan stseʼelil yoʼtan te bin-utʼil machʼa ay bin ya yichʼe» (Hechos 20:35).

Pasa te ban kʼalal ya xjuʼ awuʼune. Mame jaʼuknax ya apas te bin ya awichʼ kʼanbeyele, pasa jtebukxan. Jich jaʼatnix ya anaʼ bin ya apas. Melelnix-a te ya x-aʼtejatxan, pero ma jaʼuk yuʼun te ay machʼa ya sujat ta spasel, jaʼatnix jich ya xlokʼ ta awoʼtan spasel (Mateo 5:41).

TE BIN YA YAL TE BIBLIA: «Maʼyuk bin ya jkʼan ya jpas teme ma jichuk awoʼtane, yuʼun jich ma sujbil ya awaʼiy aba ta spasel te lekil aʼtelil ini, jaʼ lek te jaʼuknix ya xlokʼ ta awoʼtan spasele» (Filemón 14).

Mame xjelawat ta aʼtel. Te ya jmulantik aʼtel ma skʼan ya yal te puro aʼtel ya xbajtix koʼtantik-a. Ya skʼan ya jnaʼtik stsajtayel jbatik swenta ya jmulanbeytik yutsil te kaʼteltik soknix te ya jkux koʼtantike.

TE BIN YA YAL TE BIBLIA: «Ha lec xan te jnohpʼ ta cʼabal nojel ta lamal qʼuinal te bin utʼil chaʼnohpʼ ta cʼabal te nojel ta aʼtel soc ta snutsel te iqʼue» (Eclesiastés 4:6).