Jaʼex meʼil tatilex ay ta awentaik snojptesel, yakʼbeyel yil lekil be sok stojobtesel te awal anichʼnabik te kʼalal ay bin ma lek ya spasike. Ma jaʼuknax-abi, jaʼnix jich ya skʼan ya akoltayik swenta ya snaʼik stsajtayel ta lek te bin lek ta pasel sok te bin ma lek ta pasel swenta ya snaʼik kuxinel.

Ta ora ini, bayal meʼil tatiletik maba ya stojobtesikix te yal snichʼnabik, melel ya xiʼik te ya yutsʼinbeyik yoʼtanik. Pero, te meʼil tatiletik te ya snaʼik swentainel ta lek te yal snichʼnabik ya yakʼbeyik mantaliletik te ma kʼax tulanik ta pasel sok ya spʼijubtesik yuʼun ya snaʼik bin-utʼil ta pasel ta skuxlejalik.

«Te kal jnichʼnabtik ya skʼan ya snaʼik ta jamal bin ya xjuʼ sok bin ma xjuʼ ya spasik. Jich ya snaʼik kuxinel te kʼalal ya xmukʼubik sok ya snaʼ stsajtaybel sbaik ta lek-a. Teme maʼuke, jich ya xkʼotik bitʼil jun barco te maʼyuk stimon, ma xtojobik ta skuxlejalik sok ma lek ya xkʼotik ta lokʼel» (xchi te Pamela).

Snujpʼuk te bin ya apase. Teme ay bin-ora maba ya schʼuunbat akʼop te awal anichʼnabe, akʼbeya yil ta jamal te bin ma lek kʼot ta pasel ta swenta te bin la spase. Pero, te kʼalal ya schʼuunbat te akʼope, albeya ta jamal te kʼax lek te bin la spase.

«Ta ora ini ma schʼuunikix kʼop te alnichʼanetike. Jaʼ yuʼun kʼalal te kalatak ya schʼuunbonik te jkʼop ya kalbey yaʼiyik ta jamal te tseʼel koʼtan ta stojolik. Jich ma kʼax wokoluk ya yaʼiyik schʼuunel te kʼalal ya jtojobteslan» (xchi te Christine).

TE BIN YA YAL TE BIBLIA: «Te bin ya stsʼun te ants winike jaʼnix ya stsobey sit» (Gálatas 6:7).

Ayukme swentail te bitʼil ya atojobtes te awal anichʼnabe. Te kʼalal ya atojobtes te awal anichʼnab, ichʼame ta wenta jayeb yaʼbilal, te bin ya xjuʼ sok te bin mato xjuʼ spasbel sok teme tulan o ma tulan te bin la spase. Te alaletike, ay jaʼ ya snopikxan ta lek te kʼalal ya yichʼik tojobtesel ta swenta te bin ma lek ya spasike. Jich bitʼil, teme te awal anichʼnab maba ya yichʼbat ta wenta te bin ya awalbey ta swenta te stuuntesel te celular, jaʼniwan lek te ya awalbey ta jamal jayebxanix tiempo ya xjuʼ ya stuuntes. Pero, mame x-ilinat ta stojolik teme ay bin ya spasik te ma kʼax tulanuk jaʼnax ta skaj te maba la amulane.

«Te kʼalal ay maba ya schʼuunbon jkʼop te kale, ya jpas tulan ta yilel teme yoloj jich la spas o yuʼun-nax chʼay ta yoʼtan te bin kalojbey te ma skʼan ya spase. Melel te kʼalal yoloj ya skʼaxuntay te jmantaltike ya skʼanik tojobtesel. Yan teme jaʼnax yuʼun te chʼay ta yoʼtan, ya skʼan koltayel yuʼun ya sta ta ilel bin-a te ma lek la spase» (xchi te Wendell).

TE BIN YA YAL TE BIBLIA: «Tatiletik, mame xa awakʼ ilinuk yoʼtanik te awal anichʼnabike, yuʼun jich maba ya xchebaj yoʼtanik» (Colosenses 3:21).

Ayuk slekil awoʼtan. Teme sok slekil awoʼtan ya atojobtes te awal anichʼnab, ya staik ta ilel sok jich ma kʼax wokoluk ya yaʼiyik schʼuunel te kʼalal ya atojobtes sok ay bin ya snopik jilel ta swenta te bin ma lek la spasike.

«Te kʼalal ay bin maba lek ya spas te kal jnichʼnabkotike, ya kalbeykotik te tseʼel koʼtantik ta stojol ta swenta te bin lek spasoj tal jaʼto te kʼalal ay bin ma lek la spase. Ya kalbeykotik te ma spisil-ora ya yichʼ naʼulanel te bin ma lek la spas teme ya sjeltay te stalel sok ya kalbeykotik te ya jkoltaykotike» (xchi te Daniel).

TE BIN YA YAL TE BIBLIA: «Te kʼuxul oʼtanil spisil ya xkujch yuʼun sok ay slekil yoʼtan» (1 Corintios 13:4).