TA STOJOL TE MACHʼATIK NUJPUNEMIK
1: Ayuk skʼoplal ta awoʼtanik te anujpunelike
¿BIN SMAKOJBEY SKʼOPLAL?
Te machʼatik ay skʼoplal ta yoʼtanik te snujpunelike maba ya snopik te ya yijkitay sbaik. Jaʼ yuʼun jun yoʼtan ya yaʼiy sbaik. Chikan bin ya sitintay ta skuxlejalik snaʼojik te maʼyuk bin-ora ya yijkitay sbaik.
Ay machʼatik maba ya yijkitay sbaik jaʼnax ta skaj te jich lek ya x-ilotik yuʼun te sfamiliaik sok te yamigotakik. Pero, jaʼ lekxan te jun ayik ta swenta te kʼux ya yaʼiy sbaik sok te ya yichʼ sbaik ta mukʼe.
TE BIN YA YAL TE BIBLIA: «Te winike, mame skʼan ya yijkitay te yiname» (1 Corintios 7:11).
«Teme ay skʼoplal ta awoʼtan te anujpunele ma orauk ya x-ilinat. Jaʼnix jich ya skoltayotik ta spasbeyel perdón te joytik sok ta skʼanel perdón. Soknix ya skoltayotik ta yilel te ay xchajpajibal te wokoliletik ya jtatik» (xchi te Micah).
¿BIN YUʼUN TE BAYAL SKʼOPLAL?
Teme te winik sok te ants maʼyuk skʼoplal ta yoʼtanik te snujpunelike, kʼalal ya staik wokolil ta skuxlejalik yaniwan x-och snopik te ma snujpʼuk te nujpunemik sok yaniwan skʼan ya yijkitay sbaik.
«Ay machʼatik te kʼalal ya xnujpunik ay ta yoʼtanik te ya xjuʼ ya yijkitay sbaik teme ay bin ma lek kʼot ta lokʼele. Pero teme jich ay ta awoʼtan te kʼalal ya xnujpunate, ya skʼan ya yal te manix ayuk skʼoplal ta awoʼtan-a te nujpunele» (xchi te Jean).
¿BIN YA XJUʼ YA APAS?
JOJKʼOYBEYA ABA INI:
¿Bin ya apas te kʼalal ya xjajch kʼop sok te ajoye?
-
¿Jichbal ya awal «tojolnax nujpunon sok»?
-
¿Yabal anop te jaʼ lek akuxlejal te yanuk machʼa nujpunemat soke?
-
¿Aybal jich ya awalbey te ajoy «yame kijkitayat» o «ya jle machʼa kʼuxon ta yoʼtan»?
Teme ay jich awaloj manchukme jun-nax ta spisil te jojkʼoyeletike, jaʼ yorail te ya apas tulan yuʼun ayukxan skʼoplal ta awoʼtan te anujpunelike.
ILBEYAIK SKʼOPLAL TA ACHEBALIK INI:
-
¿Aytobal bayal skʼoplal ta koʼtantik te jnujpuneltik jich bitʼil ta sjajchibale? Teme maʼuke, ¿bin yuʼun?
-
¿Bin ya xjuʼ ya jpastik swenta ayukxan skʼoplal ta koʼtantik te jnujpuneltike?
PASA AWIL INI:
-
Ayuk bin yachʼil xa apas ta stojol te ajoye. Ya xjuʼ ya atsʼibaybey jun carta o te ya atsʼibaybey ta chaʼoxpʼal kʼopnax te kʼux ta awoʼtan.
-
Ayuk sfoto awinam o amamalal te banti ya x-aʼtejate.
-
Kʼopona bael te ajoy te kʼalal ayat ta aʼtel o te kʼalal maba ajokinej abaike.
TE BIN YA YAL TE BIBLIA: «Te bin jun-nax yakʼoj te Diose, mame ayuk machʼa ya xat» (Mateo 19:6).
