TA CHEʼOXEB TAL JAʼBIL, ILBIL SKʼOPLAL TA SWENTA TE MEL-OʼTAN YA YAKʼ KʼALAL AY MACHʼA YA XLAJ KUʼUNTIK. Pero bayal buelta tabil ta ilel te bin ya yalik-euk te machʼatik ya yilbeyik skʼoplale, jaʼnix pajal sok te bin ya yal te Bibliae. Ya yakʼ ta ilel te consejoetik yichʼoje, yato xtuun kuʼuntik ta ora ini. Te Biblia ma jaʼuknax ya yakʼ lekil tojobtesel, jaʼnix jich ya yakʼbey smukʼul yoʼtan te machʼatik ya smel yoʼtanike.

• Ya yakʼ smukʼul koʼtantik te maba yakik ta kʼaxel ta wokol te machʼatik lajem kuʼuntik.

  Ta Eclesiastés 9:5 ya yal te machʼatik lajemik «mayuc bin ya snaʼic». Ya xchʼay te bin snopojike (Salmo 146: 4). Jaʼ yuʼun te Biblia ya spajbey skʼoplal te lajel jich bitʼil ay machʼa ya xkʼub swayel (Juan 11:11).

• Ya yakʼ smukʼul koʼtantik te kʼuxotik ta yoʼtan te Diose.

  Te Biblia jich ya yal: «Te sit Jehová a ay ta stojol te machʼatic toj yoʼtanic, tsʼehel schiquin ta yaʼiybeyel yawic» (Salmo 34:15). Te kʼalal ya jcholbeytik Dios te bin ay ta koʼtantik, lek ya kaʼiy jbatik yuʼun sok bayal ya skoltayotik. Ya skoltayotik yuʼun ya xnoptsajotikxan ta stojol te Jpaswanej kuʼuntik sok ya xjuʼ ya stuuntes te yuʼel yuʼun ya yakʼ smukʼul koʼtantik.

• Ay bin ya jmaliytik ta pajel chaʼbej.

  Te Biblia bayal buelta ya yal te ya sta yorail te ya xchaʼkuxajik tal te machʼatik lajemikixe. Jaʼnix jich ya schol te bin yilel ya xkʼot te jkuxlejaltik liʼ ta Balumilal, melel jich ya yal: «Yame xkustiklanbot yaʼlel sitik yuʼun te Diose, maʼyukix lajel, maʼyukix mel-oʼtan, okʼel sok te bin kʼux» (Apocalipsis 21:3, 4). Leknax ta aʼiyel.

Bayal ants winiketik te schʼuunojik te Jehová, ay smukʼul yoʼtanik te ya sta yorail te ya yilbeyik sit yan buelta te machʼa lajem yuʼunike, jaʼ ya x-akʼbot yip yoʼtanik yuʼun ya xkujch yuʼunik te tulan mel-oʼtane. Te Ann te laj te smamalal te kʼalal ayix 65 jaʼbil snujpunelik-ae, jich ya schol: «Te Biblia ya yalbon ta jamal te machʼa lajem kuʼune, maba yak ta kʼaxel swokol sok ya schaʼkuxajtesot yuʼun te Dios te maʼyuk machʼa ya schʼay ta yoʼtan stukele. Jich ya jnopilan te kʼalal ya xtal ta koʼtan te jmamalale, jich ya stsʼijk kuʼun-a te tulan mel-oʼtane».

Te Tina te la kalbeytikix skʼoplale, jich ya yal: «Jaʼto tal te kʼalal laj te Timo, kiloj te skoltayojon te Dios te kʼalal bayal ya jmel koʼtane. Te bin ya yal te Biblia ta swenta te chaʼkuxajele, mero schʼuunoj koʼtan sok jaʼ ya yakʼbon kip yuʼun ya jpas tulan jaʼto te kʼalal ya kil yan buelta te Timo».

Spisil ini jaʼme te bin ya yalik bayal millón ta tul ants winiketik te smukʼulinoj yoʼtanik te Biblia. Teme ya akuy te ma smeleliluk te bin ya yal te Bibliae, ¿bin yuʼun ma xa awilbey skʼoplal te consejoetik ya xtuun kuʼuntik sok te bin yaloj te ya xkʼot ta pasele? Yame awil te bin-utʼil te Biblia ya skoltay te machʼatik ay machʼa lajem yuʼunike.

Ta página kuʼuntik ta jw.org, yame ataxan videoetik te ya yalbey skʼoplal te tema ini.

 ¿BIN-UTʼIL AYIK TE MACHʼATIK LAJEMIKIXE?

¿YABAL AKʼAN YA AWAʼIY LEK YACHʼIL KʼOP?