Te Naciones Unidas yak ta stijbeyel yoʼtan spisil te ants winiketik yuʼun te pajaluk ya skoltay sbaik, te yakuk yichʼik ta mukʼ te sderecho te yantik sok te ya skanantayik te lumkʼinale. ¿Bin yuʼun te jich ya spase? Jaʼ yuʼun te «yak ta jelonel te bitʼil ay te kʼinale, ay utsʼinel, yak ta toyel te bitʼil ma pajal ya kichʼtik ilele, ma xchajpaj te kʼopetik, bayal machʼatik yakik ta anel lokʼel ta slumalik, ay terrorismo ta bayuk, chamel te ya spuk sba ta ora sok yantikxan te yak ta yakʼbeyel swokol spisil te ants winiketik chikan te banti ayik ta nainele». Jaʼ jich la stsʼibay-abi te Maher Nasser ta revista Crónica ONU.

Te machʼatik jelawen te snopojibal yuʼunike jaʼ ya skʼanik te ayuk jun-nax gobierno ta swolol te Balumilale, jaʼ jich la spas te filósofo, poeta sok político te Dante sbiile sok te físico Albert Einstein. Te Dante la yal te maʼyuk bin-ora ya xjuʼ ya x-ayin lamalkʼinal ta Balumilal teme xatbilotik yuʼun te politicae. La yalbey skʼoplal te bin la yal te Jesús: «Teme ya scontrahin sbahic te machʼatic jun slumalic, ha ya xjihn yuʼun» (Lucas 11:17).

Te Einstein la stsʼibay jun carta te jamal bael ta stojol te Asamblea General de las Naciones Unidas te kʼalal kʼaxemix-a te Segunda Guerra Mundial te banti la yichʼ tuuntesel cheb bombas atómicas. Te carta-abi jich la yal: «Ya skʼan ya xjajch ta aʼtel ta oranax te Naciones Unidas swenta ya schiknajtes jun gobierno te ya xjuʼ ya yakʼ lamalkʼinal ta swolol te Balumilale».

Pero, ¿bin-utʼil ya xjuʼ ya jnaʼtik teme maba ya spas sbaik ta mantal ta stukelik, teme ma x-elkʼajik o teme ya snaʼik schajpanel te kʼopetik te machʼatik ya yichʼik yaʼtelike? ¿Jaxan teme jaʼ jich ya spasik te bitʼil yantik ajwaliletike? Te jojkʼoyeletik-abi ya sjultesbotik ta koʼtantik te bin la yal te historiador lord Acton te ya la yakʼotik ta chʼayel te kʼalal ya kichʼtik mukʼ kaʼteltik sok teme kʼaxtoxan mukʼ te kaʼteltike kʼaxtoxan ya yakʼotik ta chʼayel.

Pero teme ya skʼan te ayuk smelelil lamalkʼinal te ants winiketike, ya skʼan te jun-nuknax ya x-ayinike. ¿Yabal xjuʼ ta pasel? Te Biblia ya yakʼ ta naʼel te ya xjuʼe. ¿Bin-utʼil? Ma jaʼuk ta swenta jun gobierno te swentainoj te politicoetik te ma tojike, jaʼnax ta swenta jun gobierno te schiknajtesoj te Diose. Te gobierno-abi ya yakʼ ta ilel te jaʼnax te Dios ay sderecho ta swentainel te bintik spasoje. Te Biblia sbiilintesoj «cuentahinel yuʼun Dios» (Lucas 4:43).

Kʼalal la yakʼ ta nopel te oración yuʼun padrenuestro te Jesuse, jaʼ yak ta yalbeyel skʼoplal te gobierno-abi. Jich la yal: «Acʼa taluc te cuentahinel awuʼun; acʼa yichʼ pasel ta bahlumilal te bin ya scʼan awoʼtan» (Mateo 6:9, 10). Te Wentainel o Ajwalinel yuʼun te Diose jaʼme ya skʼotes ta pasel te skʼanojel yoʼtan Dios ta swolol Balumilal, ma jaʼuk te skʼanojel yoʼtan te ants winiketik te jaʼnax ya sleik te bin ya skʼan yoʼtanik sok te ya skʼanik te ayuk mukʼ yaʼtelike.

Te Wentainel yuʼun Dios jaʼnix jich naʼbil sba bitʼil «cuentahinel yuʼun te chʼulchane» (Mateo 5:3). ¿Bin yuʼun? Manchukme jaʼ ya swentain te Balumilale, kʼalalto ta chʼulchan ya xwentainwan tal. Jaʼ-abi ya skʼan ya yal te maba ya stuuntes takʼin yuʼun ya x-aʼtej. ¡Kʼax leknax ya xkʼot skuxlejal te ants winiketike!

Ta Wentainel yuʼun Dios ay jtul ajwalil, jaʼ te Jesucristoe. Akʼbil mukʼ yaʼtel yuʼun te Diose. Te Biblia jich ya yal ta swenta te Jesuse:

• «Ha ya xcʼoht ta stojol te cuentahinwanej. [...] Te ya xmucʼub te cuentahinel yuʼun soc te lamal qʼuinal yuʼune» (Isaías 9:6, 7).

•   «Aʼbot yaʼtel ta cuentahinwanej, aʼbot yutsilal soc te banti ya xcuentahinwan, scuenta yuʼun spisil pueblohetic, nacionetic soc cʼopiletic ya yacʼ sbahic ta aʼbatinel yuʼun» (Daniel 7:14).

• «Te cuentahinel yuʼun te bahlumilal, ha yuʼunix te Cajwaltic Dios soc te Cristo yuʼune, ha ya xcuentahinwan sbahtel qʼuinal» (Apocalipsis 11:15).

Te Wentainel yuʼun te Diose jaʼ ya skʼotes ta pasel te bin ya yal te padrenuestro, jaʼtome jich ya xkʼot ta pasel te skʼanojel yoʼtan te Dios ta Balumilal. Jich kʼax lek ya xkʼot te lumkʼinal, melel spisil te ants winiketik ya snopik skanantayel ta lek.

Te bin mukʼxan skʼoplale jaʼ te Wentainel yuʼun te Diose ya xbajt snojptes te swiniktake. Ta spisilik ya xjajch snopik schʼuunel spasel te mantaliletik yuʼune. Maʼyukix machʼa ya sjach kʼop ni maba ya sxat sbaikix. Te Isaías 11:9, jich ya yal: «Ma ba ya xʼutsʼinwan soc ma ba ya xlajinwan [...], como hich te bin utʼil nojel ta haʼ te mar, hich ya xnaʼbot sba te Jehová ta spahmal qʼuinal».

Spisil te ants winiketik jun-nax ya xbajt ayinukik sok lamalnax kʼinal ya xkuxinik liʼ ta Balumilal, jaʼ-abi te bin ma juʼem yuʼun spasel te Naciones Unidas. Te Salmo 37:11, jich ya yal: «Ya me smulanic bayel lamal qʼuinal». Ta pajel chaʼbej yame xlaj skʼoplal te utsʼinwanej, contaminación, pobreil sok guerra. Pero, ¿bin-ora ya xkʼot ta pasel-abi? ¿Bin-ora ya xjajch ta mantalteswanej ta Balumilal te Wentainel yuʼun te Diose? ¿Bin-utʼil ya xbajt spas? ¿Bin-utʼil ya xjuʼ ya ata lekilal yuʼun te bin ya spas te Wentainele? Akʼa kilbeytik skʼoplal ta yan artículo.