Te nojptesel te ya yakʼ te Biblia ya xjuʼ ya slekubtes jkuxlejaltik. Kiltik bin-utʼil koltayotik yuʼun te Ricardo sok te Andrés.

RICARDO: Kʼalal aytonax 15 kaʼbilal-ae, ochon ta jun grupo yuʼun j-utsʼinwanejetik. La jkʼayinbey stalelik te yachʼil kamigotak ta skaj te keremonto-ae. Te bin la jta ta nopel spasele jaʼ te ya jkʼan ya x-ochon 10 jaʼbil ta cárcel. Chajpniwan ta aʼiyel-abi, pero te banti nainemon-ae ichʼbil ta mukʼ sok lek ilbil te machʼa ay ochem ta carcele. Jaʼ yuʼun la jmulan te jichuk ya yilonik-euke.

Maba lek-a te jkuxlejale, ya jtuuntes droga sok ya xmajawanon-a. Ta jun ajkʼabal boon sok te joʼtak ta tujkʼaywanej. La jkuy te ya smilonike, pero juʼ kuʼun te lokʼon ta anele. Jaʼ yuʼun, jajch jnop te bin-nix yakon ta spasel sok-a te jkuxlejale. La jkʼan la jeltay te jtalele, pero ¿bin-utʼil ya jpas? ¿Machʼa ya skoltayon?

Jteb ma spisiluk te jfamiliatak ay kʼop yuʼunik sok maba tseʼel yoʼtanik, pero ay jtul jtio te yan-a te skuxlejal sok te sfamiliae. Jnaʼoj-a te lek yoʼtanik sok te ya skʼotesik ta pasel te bin ya yal te Bibliae soknix yalojbonik-a te sbiil te Diose, jaʼ Jehová. Kʼalal mato ayuk bayal kʼajkʼal kʼaxem-a te bin-ora kolon ta tujkʼayele, la jkʼopon te Jehová, la kalbey sbiil te kʼalal la jkʼopone sok la jkʼanbey te yakuk skoltayone. Ta yan kʼajkʼal-abi, kʼot ta jna jtul testigo yuʼun Jehová, ma schʼuun koʼtan-a te bin kʼot ta pasele. Jich jajch snojpteson sok te Biblia.

Maba kʼax bayal kʼajkʼal ta patil te tal kʼop ta jtojole, te machʼatik kamigotak-ae jajch yalbonik ta teléfono te yakuk jokinlanxan, manchukme wokol la kaʼiy, la kaltiklanbey te maʼuke. La jta ta nopel te jaʼ lek te maba ya kijkitay snopel te Bibliae. Jelon ta jkʼaxel te jkuxlejale, ta ora ini mero tseʼel koʼtan.

Jich te bitʼil la jkʼan te yakuk x-ochon 10 jaʼbil ta cárcel swenta ya yichʼonik ta mukʼ jun grupo yuʼun j-utsʼinwanejetik, la jkʼanbey Dios te yakuk xjuʼ x-abatinon ta stojol 10 jaʼbil yuʼun ya jkoltay te ants winiketik sok te Biblia jich bitʼil la kichʼ koltayel-euke. Te Diose la yakʼbey sujtib te jkʼope, melel ayix 17 jaʼbil te yakon ta abatinel ta stojole. Jaʼnix jich ya kalbeyex te manix ayuk bin-ora ochon ta carcele.

Ta ora ini, bayal te machʼatik la kamigoine ayik ta cárcel sok ay yantik te lajemikixe. Ya kal bayal wokol ta stojol te jfamiliatak te jaʼ testigoetik yuʼun Jehová te ma la spajbeyik stalel te yantike sok te ya spas ta skuxlejalik te bin ya yal te Bibliae. Kʼax bayal ya kichʼtiklan ta mukʼ, melel ma pajalik sok te machʼatik ayik ta grupo yuʼun j-utsʼinwanejetike. Pero, jaʼ bayalxan ya kalbey wokol te Dios ta swenta te la yakʼbon kil te bin-utʼil lek ya xkuxinone.

 ANDRÉS: Te banti ayinon sok chʼion tale pobreik te ants winiketike, jaʼnix jich ya xmilawanik, x-elkʼajik, spasik mulwej sok ya stuuntesik droga. Te jtate bayal ya xyakub sok kʼayem ta stuuntesel-a te cocainae. Spisil-ora ya sbolkʼoptay sbaik sok ya smaj sbaik-a te jmeʼ jtate.

Kʼax keremonto-a te jajchon ta yuchʼel trago sok ta stuuntesel drogaetik. Jteb ma spisiluk-ora ayon ta kaye yuʼun ya x-elkʼajon sok yuʼun ya jchon te bintik ya kelkʼane. Bayal jaʼbil ta patil, swentalaj lek ya kil jba sok-a te jtate, la snojpteson te muken ya kotses droga sok yantikxan biluketik ta jnacion yuʼun ya yichʼ chonel ta patil. Oranax la jta bayal jtakʼin yuʼun. Ta jun buelta te kʼalal ayon ta jna-ae, tal stsakon bael te policiaetik yuʼun te kʼan kaʼiy milaw. La kichʼ albeyel te joʼeb jaʼbil ya kichʼ chukele.

Ta jun sab la yichʼik ikʼel spisil te jchukeletik ta jun tsoblej te ya spasik te Testigoetike, boon ta tsoblej-abi. Ay swentail la kaʼiy te bin la scholbeyik skʼoplale, jaʼ yuʼun la jkʼan te ya snojptesonik sok te Bibliae. La scholbonik ta lek sok la yakʼbonik jnop te mantaliletik yuʼun te Diose.

La jta ta ilel te ya jkʼan koltayel yuʼun ya jeltay te jkuxlejale, melel chopol jajch yilonik te yantik jchukeletike, jaʼ ma la smulanik te ya jnop te Bibliae. La jkʼanbey te Jehová te yakuk yakʼbon yip koʼtan sok jpʼijile. Jich juʼ kuʼun scholbeyel te yantik jchukeletik te bintik yakon ta snopele.

Te kʼalal lokʼon ta carcele, yakon ta xiwel-a, jaʼ lek la kaʼiy-a te jilukonxan junchebuk kʼajkʼal tey-ae. Te kʼalal yakonix ta lokʼel bael-ae, ay machʼatik jajch sjimulan skʼabik yuʼun te yakonix ta baele sok ay yantik la yalbonik sok slekil yoʼtanik: «Tsajtayame bael, chʼin pastor».

Ma jkʼan ya jnop te binwan yilel-a te jkuxlejal te manchuk la snojpteson te Diose. Ya kalbey bayal wokol yuʼun te skʼuxul yoʼtan ta jtojole sok te maba chʼayon ta yoʼtane. a