Te Wentainel yuʼun Dios te jaʼ te gobierno te ayix bayal jaʼbil yakotik ta smaliyele, nopolme ya yakʼ xkuxinotik ta lamalkʼinal sok te jun-nax ya x-ayinotike. Te Salmo 72:7 ya yal te ya xbajt ayinuk «bayel lamal qʼuinal» ta Balumilal. Pero, ¿bin-ora ya xjajch ta mantalteswanej te Wentainel yuʼun te Diose? ¿Bin-utʼil ya xbajt spas? ¿Bin-utʼil ya xjuʼ ya ata lekilal yuʼun te bin ya spas te Wentainele?

Te Biblia la yal bayal ta chajp te bin «señahil» ya yakʼ ta naʼel te nopolix ya xjajch ta mantalteswanej te Wentainel yuʼun te Diose. Te señailetik ya yalbey skʼoplale jaʼ te ya xjajch guerraetik ta bayuk, wiʼnal, chamel, bayal nijkel sok te ya xtoy te chopolile (Mateo 24:3, 7, 12; Lucas 21:11; Apocalipsis 6:2-8).

Ay yan albilkʼop te jich ya yale: «Ta slajibal cʼahcʼal bahel ya xtal yorahil wocol. Ay machʼatic te ha nix cʼux ya yaʼiy sbahic, xbiqʼuet ta yoʼtanic taqʼuin, [...] ya scʼaxuntaybeyic smandar smeʼstatic, ma snaʼic yalel wocol, chopolic, mayuc scʼuxul yoʼtanic, mayuc perdón ta yoʼtanic, jlehawetic ta cʼop, ma scom sbahic, jʼutsʼinwanejetic, ihlaybil yuʼunic te bintic lec, [...] stuquel nax mucʼ ya scuy sbahic, cʼax hich cʼux ta yoʼtanic a te bintic ay ta acʼoltayel ta bahlumilal te bin utʼil cʼux ta yoʼtanic te Diose» (2 Timoteo 3:1-4). Melelnix-a te aynanix machʼatik jich stalelik-ae, pero jaʼ bayalix ta ora ini.

Te albilkʼopetik-abi jajch ta kʼoel ta pasel ta jaʼbil 1914. Jaʼnix jich ay historiadoretik, politicoetik sok escritoretik te ya yalik te yuʼun-nix jelon te balumilal ta jaʼbil-abi. Jich bitʼil te historiador te Peter Munch sbiil, jich la stsʼibay: «Ta 1914 te kʼalal jajch te guerrae, jajch ta jelonel skuxlejal spisil te ants winiketike. Kʼax leknax-a te kuxlejalile, [...] pero ochotik ta kuxinel ta jun tiempo te ay bayal jinel, te ay bin xiʼbantik sba sok pʼajaw, jaʼnix jich maba jun koʼtantik ya xkuxinotikix».

Pero ay lek yachʼil kʼop, melel te señailetik te la kalbeytikix skʼoplale ya yakʼ ta ilel te nopolix ya xmantalteswan ta Balumilal te Wentainel yuʼun te Diose. Kʼalal te Jesús la yalbey skʼoplal te señailetik yuʼun te nopolix te Wentainel-abi, la yal te lekil kʼop ini: «Ya me xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yuʼun Dios, scuenta testigo-cʼop ta stojol spisil nacionetic, ha to me ya xtal a te slajibal cʼahcʼale» (Mateo 24:14).

Te lek yachʼil kʼop-abi, jaʼ te bin ya kalbeytik skʼoplal te bitʼil testigootik yuʼun Jehovae. Jaʼ yuʼun te revista kuʼuntik te naʼbil sba ta leke, jaʼ jich sbiilinej Te J-ilkʼinal ta toyol. Ya spukbey skʼoplal te Wentainel yuʼun Jehová. Jaʼ ya yalbey skʼoplal te bin ya spas te Wentainel yuʼun te Dios ta Balumilal sok ta stojol te ants winiketik ta pajel chaʼbeje.

Swenta ya kakʼbeytik sujtib te jojkʼoyel-abi, kilbeytik skʼoplal chanchajp te bintik mukʼ skʼoplale:

1. Te Wentainel yuʼun Dios maba ya yikʼ ta aʼtel jtuluk político.

2. Spisil te jwolwanejetik yuʼun te politicae mame skʼan ya schʼayik te yaʼtelike jaʼ yuʼun ya xbajt skontrainik te Wentainel yuʼun te Diose (Salmo 2:2-9).

3. Te Wentainel yuʼun te Diose yame xbajt slajin ta jkʼaxel te gobiernoetik ta skaj te ma skʼan ya yijkʼitayik te yaʼtelike (Daniel 2:44; Apocalipsis 19:17-21). Te Biblia ya yal te slajibal guerra te xbajt ayinuke jaʼ sbiil Armagedón (Apocalipsis 16:14, 16).

4.   Te machʼatik ya skʼan ya yichʼik mantaltesel yuʼun te Wentainel-abi, yame xkolik jilel te kʼalal ya xtal te Armagedón sok yame xkuxinik ta achʼ balumilal te banti ay lamalkʼinal. Te Biblia ya yal te «cʼax tsobolic» te machʼatik ya xkolik jilele (Apocalipsis 7:9, 10, 13, 14).

Te bin nail ya skʼan ya jpastik swenta ya smantaltesotik te Wentainele, jaʼ te ya skʼan ya jnaʼbeytik sba te Diose. Ta jun buelta te la skʼopon Dios te Jesuse, jich la yal: «Hich ay te cuxlejal sbahtel qʼuinal: ha te ya snaʼbat aba, te haʼat mero Diosat atuquel, soc te ya snaʼbe sba te Jesucristo te ticombil tal awuʼune» (Juan 17:3).

Bayal ya skoltayotik te snaʼbeyel sba te Diose. Kiltik chebuknax skʼoplal. Te sbabial, jaʼ te ya skoltayotik yuʼun ya stsakxan yip te schʼuunel koʼtantik ta stojol te Diose. Te chʼuunel oʼtanil-abi, jaʼ ya skoltayotik ta yilel te yuʼun-nix ay-a te Wentainel yuʼun Dios sok te nopolix ya xwentainwane, melel jnaʼojtik te smelelil te bin jchʼuunejtike (Hebreos 11:1). Te schebal, jaʼ te jich kʼux-xan ya kaʼiy ta koʼtantik te Dios sok te ants winiketike. Te skʼuxul koʼtantik ta stojol Dios jaʼ ya stij koʼtantik yuʼun ya jchʼuunbeytik te mantaliletik yuʼune, jaʼnix jich te skʼuxul koʼtantik ta stojol te ants winiketike jaʼ ya skoltayotik ta stʼunel te mantalil la yakʼ jilel te Jesús te jich ya yale: «Te bintic ya scʼan awoʼtanic te ya spasbeyex yantic, ha ni me hich xapasbeyic» (Lucas 6:31).

Jich bitʼil jtul tatil, te Jpaswanej kuʼuntike jaʼ ya skʼan te bin lek ta jtojoltike. Jaʼ ya skʼan te yakuk jmulanbeytik yutsilal te smelelil kuxlejalile (1 Timoteo 6:19). Ta kʼajkʼal ini, maba jich te kuxlejalile. Bayal ta tul ants winiketik kʼax wokol yak ta kʼaxel yuʼunik te jujun kʼajkʼale. ¿Binwan yilel te smelelil kuxlejalile? Kilbeytik chaʼoxchajp skʼoplal te bintik lek ya xbajt spas te Wentainel yuʼun Dios ta stojol te ants winiketike.