Te jfamiliatik sok te kamigotaktik
Bayal ants winiketik wokol ya yaʼiyik te lek ya yil sbaik sok te yantike. Kiltik cheʼoxebuk tojobtesel te ya yakʼ te Biblia te ya xjuʼ ya skoltayotik yuʼun lek ya kil jbatik sok te yantike.
SPASEL TE BIN LEK TA STOJOL TE YANTIK
TOJOBTESEL TE YA YAKʼ TE BIBLIA: «Ma me atuqueluc nax yac ale awutsil alequil, ha me xalehic te haʼuc nix hich ay yutsil slequilic te yantique» (Filipenses 2:4).
¿BIN YA SKʼAN YA YAL? Yuʼun lek ya kil jbatik sok-a te yantike ya skʼan te ayuk bin ya jnaʼtik yakʼel, ma jaʼuknax te ay bin ya kichʼtike. Teme jaʼnax ya jpastik te bin ya skʼan te koʼtantike yame xjuʼ ya jchʼaytik te machʼatik lek kiloj jbatik soke. Jich bitʼil te jtul winik o jtul ants te jaʼnax ya sle te bin ya skʼan yoʼtane yame xjuʼ ya sloʼlay te sjoy ta nujpunele. Jaʼnix jich te machʼa spisil-ora ya stoy sba ta swenta te bin ay yuʼun o te bin ya snaʼ spasele, ya xjuʼ ya xchʼay te yamigotake. Te libro El camino del carácter ya yalbey skʼoplal te machʼa jaʼnax ya sle te bin ya skʼan yoʼtane ma lek ya xkʼot ta lokʼel yuʼun.
¿BIN YA XJUʼ YA APAS?
-
Koltaya te yantik. Jtul lekil amigo jaʼ te machʼa ya xjuʼ ya smukʼulin awoʼtan sok te yananix skoltayat-ae. Chaʼoxchajp estudioetik te la yichʼ pasele, la yal te machʼa ya spas te bin lek ta stojol te yantike ma mero ya stsakotik ta depresion sok ay skʼoplal ya yaʼiy sbaik.
-
Jichuk ya awaʼiy aba te bin-utʼil ya yaʼiy sba te yantike. Teme jich ya apase maniwan ayuk bin ya awal te ya xjuʼ ya yejchentes te yantike o te ya alaban yuʼun ya abolobtesbey skʼoplal.
Jaʼnix jich maba wokol ya awaʼiy te ya awichʼ ta mukʼe. Jichme maba ya apʼaj te yantik sok ya awamigoin te machʼatik yanyantik stsʼumbalik o skostumbreik.
-
Akʼbeya atiempo te yantike. Te bin-utʼil ya anaʼbey sba ta lek te yantike jaʼ te yakuk akʼases tiempo soke. Ya skʼan te ayuk swentail te bin ya awal yuʼun ya xjuʼ ya ata lekil awamigotak. Nopa schʼamel awaʼiy te bin ya yalbatike sok koltaya teme ay staoj swokolike. Jun estudio te mato jaluk la yichʼ pasele la yal te «machʼatik ya scholik te bin yaʼiyel ya yaʼiy sbaike ay stseʼelil yoʼtanik».
JTSATIK TA LEK TE MACHʼATIK YA KAMIGOINTIKE
TOJOBTESEL TE YA YAKʼ TE BIBLIA: «Te machʼatic chopolic te ya sjoquinotic, ha ya sjimbotic te lequil costumbrehetic cuʼuntic» (1 Corintios 15:33).
¿BIN YA SKʼAN YA YAL? Te kamigotaktike ya xjuʼ ya jkʼayinbeytik stalel. Te machʼatik ya snopbeyik skʼoplal stalel te ants winiketike jaʼ jich staojik ta ilel-euk. Ya xjuʼ ya snopik snukʼel sigarro o ya slajinbeyik sjunal te snujpunelik teme jich ya spasik te yamigotake.
¿BIN YA XJUʼ YA APAS? Lea awamigotak te lek stalelik sok te ya amulan ya akʼayinbey te stalele, jich bitʼil te machʼatik ya snaʼ stsajtayel sbaik, ya x-ichʼawanik ta mukʼ, te ya x-otseswan ta snaik sok te maʼyuk stʼutʼil yoʼtanike.
YANTIK TOJOBTESEL TE YA YAKʼ TE BIBLIA
Ilawil te bideoetik te lokʼem skʼoplal ta Biblia te ya xjuʼ xkoltayot te machʼatik nujpunemik, te jchʼieletik sok alaletik swenta ya xlekub te skuxlejalik ta yutil snaik.
MA JTUUNTESTIK KʼOPETIK TE YA X-EJCHENTESWAN
«Ay machʼa te hich ya xʼehchenteswan te bin utʼil espada te scʼopique». (PROVERBIOS 12:18).
SNAʼEL YAKʼEL TE BIN AY KUʼUNTIKE
«Te machʼa ma pʼisbiluc nax ya yacʼ, ya xpʼohl bintic ay yuʼun». (PROVERBIOS 11:25).
JICH XA APASBEY YANTIK TE BITʼIL YA AKʼAN PASBEYELE
«Spisil te bintic lec yac acʼan ya spasbeyex te yantique, ha nix hich xapasbeyic». (MATEO 7:12).
