Ya skoltayotik yuʼun ma stsakotik chamel
Manchukme ma jaʼuk jun libro yuʼun poxil te Bibliae, ya yalbey skʼoplal ta swenta te bitʼil ya xjuʼ ya jkanantaytik te jbakʼetaltik yuʼun ma stsakotik chamel-a. Kiltik cheʼoxeb tojobteseletik te ya yakʼ te Biblia ta swenta-abi.
JKANANTAYTIK TE JBAKʼETALTIK
TOJOBTESEL TE YA YAKʼ TE BIBLIA: «Mayuc machʼa ya spʼaj te sbaqʼuetal, ya smacʼlin soc ya scanantay» (Efesios 5:29).
¿BIN YA SKʼAN YA YAL? Jaʼ te yakuk jpastik tulan ta skanantayel te jbakʼetaltik o jkuxlejaltik te bantito kʼalal ya xjuʼ kuʼuntike. Ay ilbil skʼoplal te jaʼ ta skaj te maba lek te bin kʼayemotik ta spasel te ya stsakotik chamel yuʼune. Jich yuʼun mukʼ skʼoplal te yakuk jkanantay jbatike.
¿BIN YA XJUʼ YA APAS?
-
Lekuk ya xweʼat. Pasa tulan yuʼun lekuk te bin ya aweʼ sok uchʼa bayal jaʼ.
-
Pasa ejersisio. Te spasel ejersisio ya xjuʼ ya skoltayotik ta jpisiltik, manchukme ay ma tsʼakal kok jkʼabtik o ayotik ta chamel te ma xchojpixe. Yame xjuʼ ya skoltayat ta spasel ejersisio te afamilia o jtul doktor, pero jaʼme ay ta awenta stael ta nopel teme ya akʼan ya apase.
-
Kuxa awoʼtan ta lek. Teme kʼayemat te ma xwayat ta leke, yame xjuʼ ya stsakat jun tulan chamel yuʼun. Ay bayal ants winiketik te ma orauk ya xwayik yuʼun ayto bintikxan ya skʼan ya spasik. Pero teme ya xwayat ta leke, bujtsʼan kʼinal ya awaʼiy yuʼun.
YIJKITAYEL TE BIN KʼAYEMOTIK TA SPASEL
TOJOBTESEL TE YA YAKʼ TE BIBLIA: «Acʼa jpoc jbahtic yuʼun spisil bintic bohloben ta jbaqʼuetaltic soc ta coʼtantic» (2 Corintios 7:1).
¿BIN YA SKʼAN YA YAL? Jaʼ te ma mero ya stsakat chamel teme maba ya atuuntes te bin ya xjuʼ ya sbolobtesbat te abakʼetale, jich bitʼil te sigarroe. Te sigarro naʼbil skʼoplal te jaʼ te bin ya yakʼ chamel sok te bayal machʼatik lajemik yuʼune.
¿BIN YA XJUʼ YA APAS? Tsaa jun fecha yuʼun ya awijkitay ta snukʼel te sigarroe, tsʼibaya ta akalendario sok albeya te machʼatik ya anaʼ te ya xjuʼ ya skoltayate. Pero ta nail, chʼoja bael te jayebxan sigarro ay awuʼune, te seriyo o te bintik ya sjultesbat ta awoʼtan snukʼel yan bueltae. Mame xbaat te banti ay te machʼatik yakik ta snukʼel sigarro.
YANTIK TOJOBTESEL TE YA YAKʼ TE BIBLIA
Teme ya akʼan jpajkuk aBiblia, kʼanbeya jtul testigo yuʼun Jehová tey ta alumal.
SNAʼEL STSAJTAYEL JBATIK
«Cʼalal yac apas yachʼil ana, ya me awaʼbe stsʼahcul ta sjoyobal ta sba, scuenta yuʼun teme ay machʼa ya xchʼay cohel tey a, ma ba yac ata mulil yuʼun chʼichʼ a haʼat soc te machʼatic awuʼun ta ana». (DEUTERONOMIO 22:8).
LAMALUK KOʼTANTIK
«Te machʼa ma orahuc ya xʼilin, ya snaʼ qʼuinal ta lec; yan te machʼa ma xcuhch yuʼun, ya yacʼ ta ilel te ma snaʼ qʼuinal». (PROVERBIOS 14:29).
MA BAYALUK YA XWEʼOTIK
«Ma me xatʼun [...] te machʼatic lom bayal ya xweʼique». (PROVERBIOS 23:20, XCD).
