Ya skoltayotik yuʼun lek kʼinal ya kaʼiytik
Te Biblia ya yalbey skʼoplal te ya skʼan ya jpʼajtik teme ay bin-ora ma lek ya kaʼiy jbatike soknix ya yalbey skʼoplal te ay lekilal ya jtatik teme lek te bin-utʼil ya kaʼiy jbatike.
TE ILINBA
TOJOBTESEL TE YA YAKʼ TE BIBLIA: «Ha lec xan te machʼa ma xʼilin ta ora te bin utʼil machʼa ay yip» (Proverbios 16:32).
¿BIN YA SKʼAN YA YAL? Jaʼme lek teme ya jnaʼtik skomel te kilinbatike, manchukme ay rason kuʼuntik, melel yame xjuʼ ya yutsʼinotik. Ilbil skʼoplal te kʼalal ma jkomtik te kilinbatike, ta patil ya jmel koʼtantik yuʼun te bin la kaltik sok te bin la jpastike.
¿BIN YA XJUʼ YA APAS? Ay machʼatik ya yalik te machʼalaj ya x-ilin ta orae yuʼunlaj tulan winik o tulan ants ya yaʼiy sba, pero ma jichuk-abi. Jaʼ yuʼun pasa tulan te ya akom te awilinbae, teme maʼuke yame xjuʼ jaʼ ya stsalat. Te Biblia jich ya yal: «Hich te bin utʼil pueblo te jihnem stsʼahcul, hich ay te machʼa ma snaʼ scomel sba» (Proverbios 25:28). Ilbeya lek skʼoplal te bin-utʼil ay te kʼop jajcheme sok chʼama awaʼiy ta lek te bin ya yalik te yantik ta swentae, jichme ya xjuʼ ya akom te awilinba sok jichme ya awakʼ ta ilel te ay apʼijil. Te Biblia jich ya yal: «Te spʼijil yoʼtan te winic, ha ya xcombot yilimba yuʼun» (Proverbios 19:11).
YALEL WOKOL
TOJOBTESEL TE YA YAKʼ TE BIBLIA: «Naʼahic me yalel wocol» (Colosenses 3:15).
¿BIN YA SKʼAN YA YAL? Ay machʼatik ya yalik te jaʼnax ay stseʼelil yoʼtanik te machʼatik ya snaʼik yalel wokole. Te ants winiketik te ay machʼa lajem yuʼunik o te ay schʼayojik sbilukik, yilojik-euk te ay stseʼelil yoʼtanik yuʼun te ya yalik wokole. Te bitʼil jich spasojike, jaʼ koltaybilik yuʼun ta slokʼesel ta yoʼtanik te bin ma lekuk kʼinal ya yaʼiyik yuʼune.
¿BIN YA XJUʼ YA APAS? Ta jujun kʼajkʼal tsʼibaya te bintik ya akʼan ya awal wokol yuʼune. Pero ma puersauk jaʼ ya awal wokol yuʼun te bintik kʼax mukʼ skʼoplal ay awuʼune, jaʼ ya xjuʼ ya awal wokol yuʼun te bitʼil ya sakub talel te kʼinale, te ya amulanbey yutsilal te bitʼil ay machʼa ya ajokin aba ta kʼop sok o ya awal wokol yuʼun te kuxulate. Teme ya apas tulan yuʼun te jich ya apase yame awil te ya xlekub te bitʼil ya awaʼiy abae.
Te binxan ya skoltayat ta bayal, jaʼ te ya awal wokol yuʼun te ay afamilia sok awamigotak. Nopa awaʼiy te bin yuʼun mukʼ skʼoplal ta awoʼtan ta jujuntule, ta patil albeya o tsʼibaybeya jun karta, jun korreo o jun mensaje. Teme jich ya apase, yame stsakxan yip te bitʼil lek ya awil aba soke, jaʼnix jich yame awaʼiy te tseʼelxan awoʼtan yuʼun te ay bintik lek ya apas ta stojol te yantike (Hechos 20:35).
YANTIK TOJOBTESEL TE YA YAKʼ TE BIBLIA
Ya xjuʼ ya apas deskargar te grabasion yuʼun Biblia ta pajina jw.org ta 40 ta chajp kʼopil.
MAME XA ACHʼIK ABA TA KʼOP
«Te shachel cʼop hich cʼohem te bin utʼil ya yichʼ malel loqʼuel haʼ ta yawil; ha yuʼun ihquitaya te hach-cʼop te ma to ba schucoj sba a». (PROVERBIOS 17:14).
MAME BAYALUK YA AMEL AWOʼTAN YUʼUN TE PAJEL CHAʼBEJE
«Ma me haʼuc ya xbaht ta awoʼtanic snaʼel te pajele, como te pajel, ha ya yil sba stuquel. Ticʼuc a te wocol ta jujun cʼahcʼal». (MATEO 6:34).
NOPA NAILUK TE BIN YA AKʼAN YA APASE
«Ya me scanantayat te tsahtayel, soc ya me scanantayat te bin ay ta naʼel». (PROVERBIOS 2:11).
Yaniwan amulan-euk sk'oponel ini
¡WIKʼAME ASIT!
Te bin-utʼil ya jkombeytik yip te estrés
Ilawil chaʼoxchajp te bin ya xjuʼ ya skoltayat ta skombeyel yip te estrés.
