Snaʼbeyel sba te Diose
Ta sbabial artikulo la kalbeytik skʼoplal te ay machʼatik jich ya yilik bitʼil jun chʼul libro te Bibliae. Te kʼalal ya skʼoponik sok ya spas ta skuxlejalik te bin ya yale, nopolxan ya yaʼiy sbaik ta stojol Dios sok ya snaʼbeyik swentail te bin yuʼun te kuxulike.
Te Biblia ya yal te «machʼa yichʼoj te Espíritu» yuʼun Dios lek ya yil te kuxinele (1 Corintios 2:15a). Te machʼatik ma yichʼojuk te espiritu yuʼun te Diose jaʼnax ya yichʼ sbaik ta mukʼ stukelik, yan stukel te machʼatik yichʼojike spisil-ora ya yichʼik ta wenta te mantaliletik yuʼune (Efesios 5:1).
AYUK SMUKʼUL AWOʼTAN
TOJOBTESEL TE YA YAKʼ TE BIBLIA: «Teme ya xpehcʼaj awoʼtan te cʼalal ay awocol, mayuc bayel awip» (Proverbios 24:10).
¿BIN YA SKʼAN YA YAL? Teme ya xpejkʼaj te yip awoʼtane jichme ya awaʼiy te ma xkujch awuʼun te awokole. Pero teme ay smukʼul awoʼtane, ayme yip awoʼtan yuʼun ya awakʼbeyxan yipal ta swenta te bintik ya apas sok yame xjul ta awoʼtan te jkʼaxelnax aye, soknix te ay bin lek ya xlokʼ awuʼun-a te kʼalal ya asitintay aba soke.
¿BIN YA XJUʼ YA APAS? Mame jaʼuk ya xbajt ta awoʼtan snopilanel te bintik ya xkʼot ta pasel o te ay bin lek ya amaliye, jaʼme xa apas te bin anopoj spasel ta akuxlejale. Jaʼme lek te yakuk apas tulan ta snopel te aynix bin lek ya xkʼot ta pasel ta pajel chaʼbeje, manchukme ay te bin ajkʼnax ya xkʼot ta pasel ta atojol (Eclesiastés 9:11). Pero jteb ma spisiluk-ora te leknix ya xkʼoat ta lokʼel. Te Biblia ya stuuntes te ejemplo yuʼun te machʼa ya yaʼiy tsʼunbajel, jich ya yal: «Ta sab tsʼumbeya sbacʼ te atsʼunube, soc ta tibiltic ma xawaʼbe scux yoʼtan te acʼabe, como ma xanaʼ ban ay lec ya xcʼoht, teme ha ini o ha te yane, o teme lec ya xcʼoht schebalic» (Eclesiastés 11:6).
JOJKʼOYELETIK TE TULANIK SKʼOPLALE
TOJOBTESEL TE YA YAKʼ TE BIBLIA: «Ha smelelil cʼop te acʼope» (Juan 17:17).
¿BIN YA SKʼAN YA YAL? Te Biblia ya yakʼbey sujtib te bintik ya jojkʼoybey jbatike. Jich bitʼil:
-
¿Bin yuʼun te kuxulotike?
-
¿Bin yuʼun te ay jwokoltike?
-
¿Bin ya xkʼot ta pasel te kʼalal ya xlajotike?
-
¿Bin ya xkʼot ta pasel ta pajel chaʼbej?
Bayal millón ta tul ants winiketik ta swolol Balumilal staojik stseʼelil yoʼtanik yuʼun te sujtib ya yakʼ te Biblia ta swenta te jojkʼoyeletik-abi sok yantikxan.
¿BIN YA XJUʼ YA APAS? Yame kikʼatkotik yuʼun jaʼatnix ya awil te bin ya yal te Bibliae. Kʼanbeya jtul testigo yuʼun Jehová te yakuk skoltayat yuʼun ya xkʼot ta awoʼtan te bin ya yale. Jaʼnix jich ya xjuʼ ya x-ochat ta pajina kuʼuntik ta Internet ta jw.org o ya xjuʼ xbaat ta tsoblejetik kuʼuntik. Maba tojbil te ochibale sok maʼyuk machʼa ya skʼanbat takʼin tey-a.
YANTIK TOJOBTESEL TE YA YAKʼ TE BIBLIA
Ochan ta jw.org yuʼun ya awil te bideo ¿Bin yuʼun ya skʼan ya jnoptik te Bibliae?, te kʼaxem ta 880 ta chajp kʼopil.
YANANIXME JKʼANTIK KOLTAYEL YUʼUN-A TE DIOSE
«Tseʼelnaxme yoʼtanik te machʼatik ya snaʼik te ya skʼan ya snopik te skʼop Diose». (MATEO 5:3, TNM).
SNAʼBEYEL SBA TA LEK TE DIOSE
«Nohpojanic ta stojol Dios, hich ya xnohpoj ta atojolic». (SANTIAGO 4:8).
SKʼOPONEL SOK SNOPILANEL TA KOʼTANTIK TE BIBLIAE
«Bayel me yutsil te machʼa [...] ha ya smulan te ley yuʼun Jehová, * soc ya snaʼulan ta cʼahcʼal ahcʼabal. [...] Soc lec ya xcʼoht spisil bintic ya spas». (SALMO 1:1-3).
^ parr. 23 Te Biblia ya yal te jaʼ Jehová sbiil te Diose.