Stuuntesel ta lek te jtakʼintike
Ay bayal ta tul ants winiketik snaʼojik stuuntesel ta lek te stakʼinik ta skaj te spasoj ta skuxlejalik te tojobtesel ya yakʼ te Bibliae.
CHAJPANBILUK TA LEK TE BIN YA APASE
TOJOBTESEL TE YA YAKʼ TE BIBLIA: «Te bintic chahpambil te nopbil ta lec, ya yacʼ te ay bintic ya yichʼ tahel a, pero spisil te bin ahnimal chahpambil ya yacʼ pobrehil» (Proverbios 21:5).
¿BIN YA SKʼAN YA YAL? Teme ya jkʼantik te lek ya xkʼootik ta lokʼel sok te jtakʼintike ya skʼan te chajpanbiluk ta lek kuʼuntik te bin-utʼil ya jtuuntestik sok akʼa jkʼotestik ta pasel te bin jchapojtikixe. Naʼame te ma spisiluk ya xjuʼ ya aman te bin ya skʼan te awoʼtane, jaʼ yuʼun naʼame stsajtayel te jayeb takʼin ya alajine.
¿BIN YA XJUʼ YA APAS?
-
Pasa te bin chapbil awuʼune. Tsʼibaya ta jun te bintik ya xtuun awuʼune sok xatiklana ta jujunchajp. Ta patil nopa awaʼiy jayeb takʼin ya xtuun awuʼun. Teme ay banti ma tikʼ lokʼat-a te atakʼin, tsaka te takʼin akʼejoj yuʼun te bin yan anopoj stuuntesel-ae. Jich bitʼil teme lajix te takʼin ta swenta te gasolinae, tsaka te takʼin akʼejoj yuʼun te bin ma mukʼuk skʼoplal, jich bitʼil te takʼin akʼejoj ta swenta paxial.
-
Ma tojoluknax xa awakʼ abet. Mame xa awakʼ abet teme ma yuʼunuknix ya xtuun awuʼun-ae, jaʼ lek tsobeya stojol nailuk te bin ya akʼan ya amane. Teme anopoj te ya abetan takʼine pasa tulan ta stojel ta oranax, jichme ma bayaluk ya xmo sjol-a te abete. Pero teme ayix abete chapa te bin-utʼil ya atoje sok pasa tulan te jichuk ya akʼotes ta pasele.
Te machʼa kʼayem ta bete yame xjuʼ bayalxan takʼin ya slajin. Jaʼ yuʼun nopa ta lek nailuk teme ya akʼan ya x-ochat ta betile.
AYUK AWUʼUN LEKIL TALELILETIK
TOJOBTESEL TE YA YAKʼ TE BIBLIA: «Te machʼa chʼaj ma schahpan sqʼuinal ta yorahil scomil cʼahcʼal; hich ta yorahil stsobel sit, ya sle, pero mayuc bin ya sta» (Proverbios 20:4).
¿BIN YA SKʼAN YA YAL? Te chʼajilale ya xjuʼ ya yakʼotik ta pobreil. Jaʼ yuʼun pasa tulan yuʼun ya x-aʼtejat sok te yakuk anaʼ stuuntesel ta lek te atakʼine jichme maba ya amel awoʼtan yuʼun te pajel chaʼbeje.
¿BIN YA XJUʼ YA APAS?
-
Aʼtejan ta lek. Teme lek ya x-aʼtejate ayme smukʼul yoʼtanik ta atojol te yantik sok maba ya awichʼ nutsel lokʼel ta awaʼtel. Jaʼme ya smulanik te patronetik te machʼatik ya x-aʼtejik ta leke.
-
Mame x-elkʼajat. Yame xjuʼ xbolob akʼoplal teme ya awaʼiy elekʼ te banti ya x-aʼtejate, yame xjuʼ ya awichʼ nutsel lokʼel sok wokolme ya xjuʼ ya ataxan awaʼtel.
-
Manchuk ayuk sbikʼtal awoʼtan. Teme ma xa anaʼ stsajtayel aba ta lek ta swenta te takʼine, yame xjuʼ ya stsakat chamel sok ya xjuʼ ya yutsʼin te bitʼil lek awiloj aba sok te yantike. Naʼame te ma jaʼuk kʼax mukʼ skʼoplal te takʼin ta jkuxlejaltike.
YANTIK TOJOBTESEL TE YA YAKʼ TE BIBLIA
Kʼopona te Biblia ta pajina jw.org ta bayal ta chajp kʼopiletik.
SLAJINEL TIEMPO SOK TAKʼIN TA BISIOETIK
«Te jyacubeletic soc te machʼatic bayel ya xweʼic ya me xpobrehubic, soc bayel te wayele ya yacʼ ta lapel lohmen cʼuʼuletic». (PROVERBIOS 23:21).
MAME XA AMEL BAYAL AWOʼTAN
«Ma me haʼuc xbaht ta awoʼtanic snaʼel bin utʼil ya xcuxajex, bin yac aweʼic soc bin yac awuchʼic; o bin utʼil ay abaqʼuetalic, ha te bin yac alapique». (MATEO 6:25).
MANCHUK AYUK SBIKʼTAL AWOʼTAN
«Te machʼa jbicʼtal-oʼtan, ma xway yoʼtan yuʼun sleel scʼulejal, soc ma snaʼ te ya xtal ta stojol te meʼbaile». (PROVERBIOS 28:22, XCD).
Yaniwan amulan-euk sk'oponel ini
YANTIK TEMAETIK
Te bin ya xjuʼ ya apas teme maʼyuk bayal atakʼin
Te kʼalal maʼyuk jtakʼintik ya yakʼ estrés, pero te consejoetik ya yakʼ te Biblia ya skoltayotik o ya yakʼbotik kiltik bin ya xjuʼ ya jpastik teme maʼyuk bayal jtakʼintike.
