KOMBEYA YIP TE ESTRÉS
Yame xlaj skʼoplal te estrés
Te pʼijilal ya jtatik ta Biblia ya xjuʼ ya skoltayotik yuʼun maba ya stsakotik bayal estrés. Ma xjuʼ kuʼuntik slajinel ta jkʼaxel te estrés, pero te Jpaswanej kuʼuntike ya xjuʼ yuʼun stukel. Jaʼ yuʼun stsaojix te machʼa ya xjuʼ ya skoltayotike: jaʼ te Jesucristo. Te Jesús nopol ay bin tʼujbil ya xbajt spas liʼ ta Balumilal kʼaxemto jich-a te bitʼil la spas te kʼalal xtaluk ta Balumilale. Kiltik chaʼoxchajpuk:
TE JESÚS YA XBAJT SLEKUBTES TE JCHAMELETIK
«La yikʼik tal ta stojol spisil te machʼatik ayik ta chamel [...] la slekubteslan» (MATEO 4:24).
TE JESÚS YA XBAJT YAKʼBOTIK JNATIK SOK JWEʼELTIK
«Ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit. Ma ba ya spasic nahetic te yan machʼatic ya xnahinic tey a, soc ma ba ya yaʼiy tsʼumbajel te yan machʼa ya sweʼ» (ISAÍAS 65:21, 22).
TE JESÚS YA XBAJT YAKʼ LAMALKʼINAL SOK MAʼYUKIX MACHʼA YA X-UTSʼINWAN
«Ta yorahil te ajwalil ya me xnichin te bin stojil ta pasel soc ay bayel lamal qʼuinal ha to cʼalal mayuquix a te uhe. Ya me scuentahin cʼalal ta stiʼil mar cʼalal ta yan stiʼil, soc ta mucʼul-haʼ cʼalal ta stiʼil bahlumilal [...] soc ya me sleqʼuic tsʼuʼlum te scontratac» (SALMO 72:7-9).
TE JESÚS YA XBAJT SLAJIN TE BINTIK MA STOJILUK
«Ya me snaʼbe yoʼbolil sbahic te pobre soc te machʼa mayuc bin ay yuʼun; soc ya me scoltaybe scuxlejalic te pobrehetique. Ya me scoltaylan ta wocol soc ta utsʼinel» (SALMO 72:13, 14).
TE JESÚS YA XBAJT SLAJIN TE WOKOLIL SOK TE LAJELE
«Maʼyukix lajel, maʼyukix mel-oʼtan, okʼel sok te bin kʼux» (APOCALIPSIS 21:4).