5 ¿Aybal bin-ora ya xlaj skʼoplal te jwokoltike?
¿Bin yuʼun mukʼ skʼoplal te ya jnaʼbeytik te sujtibe?
Teme ya kakʼ ta koʼtantik te ya xlaj skʼoplal te wokolile, ya skoltayotik yuʼun ma jaʼuk ya xbajt ta koʼtantik te jwokoltik sok te ma jaʼuk ya kakʼbeytik smulin Dios te bin ya xkʼax ta jtojoltike.
Nopa awaʼiy ta swenta ini
Bayal ants winiketik ya skʼan ya slajinbeyik skʼoplal te wokoliletik, pero maʼyuk bin ya xjuʼ ya spasik. Ilawil te bintik kʼoem ta pasel:
Manchukme ayix bayal te poxiletik...,
-
... te chamel ta swenta te ya xtejkʼaj te oʼtanil bayal ants winiketik lajem yuʼun.
-
... ta jujun jaʼbil bayal miyon ta tul ants winiketik lajem yuʼun te kansere.
-
... «te ants winiketik bayal chamel staojik te maʼyuk spoxile. Jaʼnix jich ay chamel te chiknajelto te bayal wokolil ya yakʼe o chiknaj tal yan buelta te la skuyik te lajemix skʼoplal-ae», jich la stsʼibay te economista y demógrafo David Bloom ta jun rebista ta swenta te inmunología (Frontiers in Immunology).
Manchukme ay nasionetik te ay stakʼinike...,
-
... bayal miyon ta tul alaletik ya xlajik ta jujun jaʼbil, kʼaxemtoxan-a te banti ay pobreile.
-
... bayal ta mil miyon ta tul ants winiketik nainemik te banti maʼyuk ban ya schʼoj te skʼaʼpalike.
-
... bayal ta sien miyon ants winiketik maʼyuk yaʼalik.
Manchukme ya snaʼbeyikix skʼoplal te derechos humanos...,
-
... bayal ta jpam lumetik ta swolol balumilal ayto te ban ya yelkʼanik sok ya schonik te ants winiketik. Jun informe yuʼun te Naciones Unidas la yal te ay nasionetik te maba yakʼojbeyik schajpajibal te wokoliletik ini, jich kʼoem «te bitʼil ma skʼan ya yilik te wokolil o te ma xjuʼ yuʼunik schajpanele».
TEME YA AKʼAN YA ANAʼBEYXAN SKʼOPLAL
Ochan ta www.pr418.com/tzh sok ilawil te bideo, ¿Bin-a te Ajwalinel yuʼun te Diose?
Te bin ya yal te Biblia
Ay jkʼoplaltik ta yoʼtan te Diose
Kʼux ya yaʼiy te Dios te kʼalal ya xkʼax jwokoltike.
Te Dios «ma ba la spʼaj soc ma ba la yihlaybe swocol te machʼa ay swocol; ma ba la snacʼ sba ta stojol, ha la yaʼiy te cʼalal awtayot yuʼune» (SALMO 22:24).
«Aʼbeya ta stojol spisil te bintic yac amel awoʼtanic yuʼun, como ayex ta canantayel yuʼun» (1 PEDRO 5:7).
Ma spisiluk-ora ay jwokoltik
Te Biblia ya yal te ya slajin wokoliletik te Diose.
«Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux» (APOCALIPSIS 21:3, 4).
Te Diose yame slajin spisil te bin ya yakʼ jwokoltike
Te Wentainel yuʼun jaʼ ya xbajt slajin spisil-abi, melel te Biblia ya yal te jaʼ smelelil ajwalil.
«Te Dios ta chʼulchan ya me shach jchahp ban cʼalal ya scuentahin jtuhl ajwalil te mayuc bin ora ya xlaj, soc ma ba ya xʼacʼot hilel ta scʼab yan nación; [...] pero sbahtel qʼuinal ya xhil stuquel» (DANIEL 2:44).
