Ma stojiluk te ya xkʼax swokolik te machʼatik lek yoʼtanike. Te kʼalal ya kiltik te ya xkʼax swokolike, ay machʼatik ya xjuʼ ya snop te maʼyuk bin ya xlokʼ-a te ya jpastik tulan ta spasel te bin leke.

Ay machʼatik ya schʼuunik te ya xchaʼayinik sok ya xlajik bayal buelta. Ya snopik teme leklaj te bin ya spasik ta skuxlejalik ya staikxan lekil kuxlejalil te kʼalal ya xchaʼayinike, yan teme chopol te bin la spasike ya staik bayal swokolik. Ta swenta te bin ya schʼuunike, teme ay jtul lekil ants winik ay bin ma lek la spas ta nailtoe ya xwoklaj ta patil. Jaʼ yuʼun jojkʼoybeya aba:

• ¿Bin ya xlokʼ kuʼuntik-a teme ya xkʼax jwokoltik ta ora ini ta skaj te bin la jpastik ta namey tal sok te ma xjulix ta koʼtantike?

• Teme albilix skʼoplal te bin ya xkʼot ta jtojoltik ta skaj te bin la jpastik ta yan kuxlejalil, ¿bin yuʼun-nix-a te yato jkanantay jbatik yuʼun ma stsakotik chamel sok te manchuk ya jtatik jun aksidente?

  TEME YA AKʼAN YA ANAʼBEYXAN SKʼOPLAL

  Ochan ta www.pr418.com/tzh sok ilawil te bideo, ¿Bin yuʼun maba slajinoj Dios te wokolile?

Te jwokoltike ma jaʼuk kastigo yuʼun Dios

Ay ya xkʼax jwokoltik ta swenta te ay bin ya xkʼot ta pasel te ma naʼbiluk kuʼuntik sok te ayotik ta jun lugar o ta yorail te ma skʼan ya kakʼ jbatik tey-ae.

«Ma jaʼuc te machʼa ya xjuʼ yuʼun animal te ya stsalawan ta animale, soc ni jaʼuc te machʼatic ma snaʼic xiwel te ya stsalawanic ta guerra. Ma jaʼuc spisil ora ay sweʼel yuʼun te machʼatic ay spʼijilique, ni jaʼuc jcʼulejetic te machʼatic ay snopjibal yuʼunique, soc ni jaʼuquic te machʼatic pʼijubtesbilic te buen maliybilique. Ta spisilic ta chʼin ajcʼ nax te jich ya xcʼot ta swentaique» (ECLESIASTÉS 9:11, TZOXCH).

Ya xkʼax jwokoltik ta skaj te jmulawil ayinotike

Te ants winiketik ya stuuntesik te kʼopil mulil ta yalbeyel skʼoplal te machʼatik ay bin chopol ya spasike, pero te Biblia ya stuuntes ta yalbeyel skʼoplal te maba tojotik ta jpisiltike. Chikan teme lek o chopol jtaleltik, jaʼ la skʼasesbotik jilel te Adán sok te Eva.

«Chopolonix a cʼalal ayinon, jmulawilon a cʼalal hahchon ta schʼuht jnan» (SALMO 51:5).

Bayal wokolil staoj te ants winiketik ta skaj te mulil

Ma jaʼuknax yutsʼinoj te bitʼil lek kiloj jbatik sok te Jpaswanej kuʼuntike, jaʼnix jich yutsʼinoj te bitʼil lek kiloj jbatik sok spisil te bintik spasoj jich bitʼil te yantik ants winiketik sok te bintik sjoytayejotike. Ta spisil-abi bayal wokolil yakʼojbotik.

«Ha yuʼun, aunque coʼtanuc ya jpas te bin lec, [...] ay ta jtojol te bin chopole» (ROMANOS 7:21).

«Jnaʼojtic stojol te ay ta ajcʼan spisil te bitic pasbile, jaʼ to ta ora to» (ROMANOS 8:22, TZOXCH).