Te machʼatik ayik ta relijion-abi, ya skuyik te ya xkʼax swokolik ta skaj te ay bin la spas ta skuxlejalik ta ora ini o ta yan kuxlejalil. Jtul ants winik yalaj xlaj te swokol kʼalal ya xkʼax ta yan kuxlejalil. Swenta jich ya xkʼot ta stojolik, yalaj skʼan te ya slokʼes ta spensarik te wokolil ay ta Balumilal ta ora ini.

Te machʼatik ayik ta relijion-abi, ya schʼuunik te kʼalal ya xkʼaxik ta wokole jalaj jun kastigo ta skaj te ya yichʼ pasel mulile sok te jalaj jun prueba ta swenta te schʼuunel yoʼtanike. Te Sayyid Syeed, te jaʼ presidente yuʼun te Sociedad Islámica ta América del Norte jich la yal: Te wokoliletik ya sjultes ta koʼtantik te «spisil-ora ya skʼan ya kalbeytik wokol te Dios ta swenta te bendisionetik ya yakʼbotik sok te ya skʼan ya jkoltaytik te machʼatik ya skʼanik koltayel».

Te machʼatik ayik ta relijion-abi, te judioetik ya skuyik te jaʼlaj ya xkʼax swokolik yuʼun te bin ya spas ta skuxlejalike. Ay chaʼoxtul judioetik ya schʼuunik te ay chaʼkuxajele sok te patil ya yichʼik chajpanel ta stojil te machʼatik kʼax swokolik te ma jaʼuk smulike. Jaʼukmeto, te judaísmo místico ya yakʼ ta nopel te yalaj schaʼayinik ta yan bakʼetalil, jich-abi te ants winiketik ya xjuʼ ya sujtes yoʼtanik yuʼun te smulike.

Te machʼatik ayik ta relijion-abi, ya schʼuunik te yalaj x-ayinik bayal buelta sok te yalaj xkʼax swokolik ta jujun kuxlejalil jaʼto te kʼalal ya xkʼot ta pasel te bin ya smulanike, jich bitʼil te bintik ya spasik sok te bintik ya snopik te ma lekuke. Ta swenta pʼijil oʼtanil, lekil aʼtelil sok te stsajtayel te bintik ya spasik pensar, jtul ants winik ya xjuʼ ya xchʼay bael te swokole.

Te Diccionario de religiones comparadas, ya yal: te machʼatik ayik ta relijion-abi ya schʼuunik te «jaʼlaj ta skaj te ay bin ma lek ya spas te ants winiketik te ay swokolike». Manchukme kʼoem ta yoʼtanik te ya xjuʼ ya xpejkʼaj te swokolik teme «lek stalelike», pero jteb ma spisiluk schʼuunejik te jaʼlaj ta skaj te ay espirituetik te bayal yipik te ma xjuʼ yuʼunik skomel te ants winiketike. Ta spisil-abi, ya schʼuunik te jaʼ ta swenta te jich albilix tal skʼoplalik sok te maʼyuk bin ya xjuʼ ya spasikix ta swenta-abi.

Ay relijionetik ya yalik te jaʼlaj ta smul te j-akʼchameletik te ay wokolile. Ay chaʼoxtul ants winiketik schʼuunejik te yalaj xjuʼ ya x-akʼbot lekil suerte yuʼun te j-akʼchameletik o te ya xjuʼ ya x-akʼbot swokolik yuʼune sok te jaʼnax ya xjuʼ ya skombeyik yip teme ay bintik ya spasik ta stojole. Jaʼ yuʼun te kʼalal ya xtaotik ta chamel te ants winiketik ya xbajtik ta stojol j-akʼchameletik yuʼun ya x-akʼbot spoxilik o yantikxan te bintik ya spas ta stojolik yuʼunlaj jich ya skombeyik yip-a te bintik ya spasik te j-akʼchameletike.

Te machʼatik schʼuunejik ta skʼopik te Cristo ya snitbeyik skʼoplal te wokolil sok te mulil la spasik te sbabial ants winik ta nameye, jich bitʼil ya yal ta libro yuʼun Génesis. Jaʼukmeto, ay bayal relijionetik yotsesojik te snopojibal yuʼunike, jun ejemplo, ay chaʼoxtul katolikoetik schʼuunejik te ya xjuʼ ya yakʼbeyik ta stojol Dios te swokolik yuʼunlaj jich ya yichʼik bendision-a te iglesia yuʼunike o jich ya xjuʼ ya xkolik-a te yantik ants winiketike.