Akʼaba ta slugar te yantike
Te problema
Teme jaʼ ya xbajt koʼtantik ta yilel te banti maba pajalotik sok te yantike, chopolniwan ya xjajch kiltik, yaniwan jkuytik te jaʼ pekʼel skʼoplalik te machʼatik ma pajalotik soke, teme jiche wokolniwan te ya kaʼiybeytik skʼuxul swokol te yantike. Te kʼalal jich ya xkʼot ta pasel, ya skʼan ya yal te ya xpʼajawanotike.
Tojobtesel te ya yakʼ te Biblia
«Tseʼeluc me awoʼtanic soc te machʼatic tseʼel yoʼtanic; ocʼanic me soc te machʼatic ya xʼoqʼuic» (ROMANOS 12:15).
¿Bin ya skʼan ya yal? Te teksto ini ya yakʼ jnaʼtik te ya skʼan ya jpastik tulan ta yaʼiyel te skʼuxul swokol te yantike. Swenta ya xjuʼ kuʼuntik ya skʼan te jaʼ jwokoltik ya kaʼiytik te swokolike.
¿Bin-utʼil ya skoltayotik?
Te kʼalal ya jnaʼbeytik yoʼbolil sba te yantike, ya jtatik ta ilel te ay bayal te banti pajalotike, ya kiltik te ay pajal te bitʼil ya kaʼiy jbatik sok te bin ya jpastik yuʼune. Te kʼalal ya jnaʼbeytik yoʼbolil sba te yantike, ya jtatik ta ilel te jfamilia jbatik ta jpisiltik. Te kʼalal ya jpastik tulan ta yilel spisil te banti pajalotik sok te yantike, jich ma chopoluk bin ya x-och jnoptik ta stojolik ta oranax.
Jaʼnix jich te kʼalal ya jnaʼbeytik yoʼbolil sba te yantik, ya skoltayotik ta yichʼel ta mukʼ. Te Anne-Marie te talem ta Senegal jich stalel-a te ya spʼaj te machʼatik pʼajbilik ta slumale, ya schol kaʼiytik bin-utʼil koltayot te kʼalal kaj snaʼbey yoʼbolil sbaik, jich la yal: «Te kʼalal la kil te bayal swokolike, och jnop bin-utʼil ya kaʼiy jba te joʼukon te jich ay jwokole, jich la jta ta ilel te maba toyolxan jkʼoplale, sok te maʼyuk bin jpasoj te lekonxan yuʼune». Teme ya jpastik tulan ta yilel te swokol te ants winiketike, jich ya xkʼotxan ta koʼtantik bin ya snopik sok maba ya x-och jnoptik bin chopol ta stojolik.
Te bin ya xjuʼ ya apase
Mame jaʼuk xa awil te banti ma pajalat sok te yantike, jaʼuk ya xbajt ta awoʼtan yilel te banti pajalat sok te machʼatik ma mero lek ya awile. Nopa awaʼiy bin-utʼil ya yaʼiy sbaik te kʼalal jich ya spasik ini:
Teme ya jpastik tulan ta snaʼel bin-utʼil ya yaʼiy sba te yantik, ya jtatik ta ilel te jfamilia jbatik ta jpisiltik.
Te kʼalal ya xweʼ uchʼik sok sfamiliaik.
Te kʼalal tulan aʼtejike.
Te kʼalal ya sjokin sbaik sok yamigotakik.
Te kʼalal ya yaʼiyik te musika te mero ya smulanik.
Ta ora ini pasa tulan te ya awakʼ aba ta slugar. Jojkʼoybey aba:
¿Bin ya jpas teme ay machʼa jkʼaxel maʼyuk jkʼoplal ya yilone?
¿Bin yaʼiyel ya kaʼiy jba teme ay bin chopol ya snopik ta jtojol te kʼalal mato ya snaʼbonik jbae?
Te teyuk ayon ta yolilik, ¿bin-utʼil ya jkʼan te ya yilonik?
Yaniwan amulan-euk sk'oponel ini
TE J-ILKʼINAL TA TOYOL
¿Jichbal ya yaʼiy sba Dios te bitʼil ya awaʼiy abae?
Te Biblia ya yalbotik ta jamal te ya snaʼ ta lek Dios te bintik ya xkʼax ta jtojoltike, te bintik ya jnoptike sok te bin yaʼiyel ya kaʼiy jbatike soknix jich ya yaʼiy sba-euk te bitʼil ya kaʼiy jbatike.
¡WIKʼAME ASIT!
Lekubtesa te akuxlejal: Te jfamiliatik sok te kamigotaktik
Yuʼun lek ya kil jbatik sok-a te yantike ya skʼan te ayuk bin ya jnaʼtik yakʼel, ma jaʼuknax te ay bin ya kichʼtike.
