Teme ma jkʼan ya jkʼopontik te ants winiketik te ma lek ya kiltike, ya xjuʼ ya xchʼi te bin ma lek jnopojtik ta stojolike. Jaxan teme te kamigotaktik jich pajalik bitʼil te joʼotike, yaniwan xjuʼ jnoptik te toj te bin ya jnoptik, te bin ya kaʼiytik sok te bin ya jpastik ta jkuxlejaltik.

«Jama awoʼtanic» (2 CORINTIOS 6:13).

¿Bin ya skʼan ya yal? Te kʼopil oʼtanil ya xjuʼ ya yalbey skʼoplal, te bin-utʼil ya kaʼiy jbatik sok te bin ya yal te koʼtantike. Teme jaʼnax lek ya kiltik te machʼatik pajalotik sok, ayotikme ta smakel te koʼtantike. Jich yuʼun, teme ma jkʼantik te jich ya xkʼot ta jtojoltike, ya skʼan ya jletik kamigotaktik te yanyantik stalelik.

Kʼalal ay machʼa ya jnaʼbeytik sba ta lek, ya xkʼot ta koʼtantik bin yuʼun te jich stalele. Kʼalal ya jokin jbatik sok, ya xkaj kiltik bitʼil kamigotik. Ayxan skʼoplal ta koʼtantik, sok te bin ya x-akʼbot stseʼelil yoʼtan o smel yoʼtan jaʼnix jich ya kaʼiytik ta koʼtantik-euk.

Kiltik te ejemplo yuʼun te Nazaré, te la spas tulan yuʼun ya sjel te bin snopoj ta stojol te ants winiketik te yan slumalik. Jich ya yal te antse: «La jokinlan te ants winiketik ini sok pajal aʼtejon sok, la jnaʼtiklanbey sba ants winiketik te ma jichuk stalelik te bitʼil yalbeyejonike. Kʼalal ya awamigoin ants winiketik te yan skostumbreik, jich maʼyuk bin chopol ya anop ta stojolik kʼux ya awaʼiyxan ta awoʼtan sok ay skʼoplal ta awoʼtan».

Pasa tulan yuʼun ya xkʼopojat sok ants winiketik te yanyantik slumalik, stsʼumbalik sok skʼopik. ¿Bin yuʼun maba ya apas ini?

• Akʼa scholbat awaʼiy te bin yilel skuxlejalik.

• Ikʼtiklana ta weʼel.

• Chʼama awaʼiy te bin kʼaxem ta skuxlejalik sok ilawil bin mukʼ skʼoplal ta yoʼtanik.

Teme ya apas tulan yuʼun ya xkʼot ta awoʼtan te bin kʼaxem ta stojolik, jichme ya anaʼbeyxan sba sok yame xlekub te snopojibal awuʼun ta swenta te ants winiketik-abi.