Te spoxil
Bayal miyon ta jtul ants winiketik spasojikix te tojobteseletik ya yakʼ te Biblia jich bitʼil la kilbeytikix skʼoplal, sok juʼem yuʼunik slokʼesel ta yoʼtanik te pʼajawe. Pero ta smelelil, ta jtukeltik ma xjuʼ kuʼuntik slokʼesel ta koʼtantik te pʼajawe. ¿Jich yuʼun aybal spoxil?
Jun lekil gobierno
Te jayebix jaʼbil kʼaxeme, maʼyuk junuk gobierno te juʼem yuʼun slajinel te pʼajawe. ¿Yabal skʼan ya yal-abi te maʼyuk machʼa ya xjuʼ yuʼun slajinele?
Yuʼun ya xlaj skʼoplal te pʼajawe, te jun gobierno jaʼ ya skʼan ya spas ini:
-
1. Ya stijbey yoʼtan te ants winiketik yuʼun ya sjeltay te bin ya snopik sok te bin yilel ya yil te yantike.
-
2. Slokʼesbey ta yoʼtan te ants winiketik te bin ya yakʼ spʼaj te yantike.
-
3. Ya yakʼ jwolwanejetik te maba ya xpʼajawanike.
-
4. Te jun-nax ya yakʼ x-ayin te ants winiketik ta swolol Balumilal.
Te Biblia ya yal te Dios te schajpanoj jun gobierno te jich ya spase. Jaʼ te «Cuentahinel yuʼun Dios» (Lucas 4:43).
Ilawil te bin ya yakʼbotik te ajwalil ini.
1. Lekil pʼijubtesel
Te ants winiketik ta Balumilal ya snopik spasel te bin toje (ISAÍAS 26:9).
«Te bin ya yacʼ te bin stojil ta pasele, ha te lamal qʼuinal, soc te bin ya xlocʼ yuʼun te yaʼtel te bin stojil ta pasel, ha te cʼux-oʼtanil soc te jun yoʼtan spisil ora» (ISAÍAS 32:17).
¿Bin ya skʼan ya yal? Te Wentainel yuʼun Dios ya snojptes te ants winiketik ta spasel te bin stojil ta pasele. Ya xjelon te bin yilel ya kiltik te yantik teme ya jtatik ta ilel te bin lek o te bin ma leke, te bin toj sok te bin ma tojuke. Spisil ants winiketik ya xbajt snaʼik te jaʼ lek te kʼux ta koʼtantik te yantike.
2. Maʼyukix wokol
«Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux, como cʼaxix spisil te bintic ay ta nahil to» (APOCALIPSIS 21:4).
¿Bin ya skʼan ya yal? Te Wentainel yuʼun Dios ya slajin spisil te wokolil yakʼoj te bin ma stojiluk ta pasele. Te machʼatik yichʼojik utsʼinel ya xchʼay ta yoʼtanik te bin ma lek yichʼojik pasbeyel te ya x-akʼbot slab yoʼtanike.
3. Jtul lekil jwolwanej
«Ma haʼuc ya schahpan yuʼun te bin ya yil ta sit, ma haʼuc ya schahpan yuʼun te bin ya yaʼiy ta schiquin; ha toj ya schahpan te pobrehetic, stojil ya schahpan te machʼatic peqʼuel ayic ta bahlumil» (ISAÍAS 11:3, 4).
¿Bin ya skʼan ya yal? Te Jesucristo te jaʼ Ajwalil yuʼun te Wentainel yuʼun te Dios sokme stojil ya swentain te Balumilal kʼalalto ta chʼulchan sok maba ya xtsaawan. Te Jesús ma junuknax nasion lek ya yil sok ya xjuʼ yuʼun te ya xkʼot ta pasel te mantaliletik yuʼun ta swolol Balumilal.
4. Jun-nax ayik
Te Wentainel yuʼun Dios ya yakʼ te pajaluk yoʼtanik, pajaluk kʼux ya yaʼiy sbaik, junuknax ya x-ayinik sok junuknax snopojibal yuʼunik te ants winiketike (FILIPENSES 2:2).
¿Bin ya skʼan ya yal? Mame lotiluk te jun-nax ya x-ayinik te machʼatik wentainbilik yuʼun te Wentainel yuʼun te Diose. Jun-nax ya x-ayinik, melel kʼux ya yaʼiy sbaik ta smelelil.
