¿Bin yuʼun te ay jwokoltik, te ya xmeʼel mamalubotik sok te ya xlajotike?
Te Jpaswanej kuʼuntik jich ya yilotik bitʼil yal snichʼnabotik, jaʼ yuʼun ma smulan te ya xkʼax jwokoltik. Pero, ¿bin yuʼun-nix-a te ay bayal wokolile?
Jaʼ ta smul te sbabial ants winik
«Och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic» (ROMANOS 5:12).
Te Dios la spas te sbabial ants winik, te Adán sok te Eva sok tojil ants winiketik-a. Sok akʼbotik te ya x-ayinik liʼ ta Balumilal, ta tsʼunbil kʼinal Edén. Jaʼnix jich albotik te ya xjuʼ ya sweʼik spisil te sit awaltsʼunubil pero ay jpejt teʼ te ma xjuʼ ya sloʼike. Manchukme jich-abi, te Adán sok te Eva jaʼ la sloʼik te awal tsʼunubil te albot te ma sloʼike, jich yalik ta mulil (Génesis 2:15-17; 3:1-19). Te bitʼil la skʼaxuntayik kʼop te Adán sok te Eva, lokʼesotik ta tsʼunbil kʼinal Edén yuʼun te Dios. Teyto-abi kʼax swokolik, ta patil la sta yal snichʼnabik sok la yil swokolik-euk, meʼel mamalubik sok lajik (Génesis 3:23; 5:5). Jaʼ yuʼun te joʼotik ya stsakotik chamel, ya xmeʼel mamalubotik sok ya xlajotik, melel jpisiltik talemotik ta stsʼumbal te Adán sok te Eva sok jaʼ yal snichʼnabotik.
Jaʼ ta smul te chopol espirituetik
«Ay ta scʼab pucuj swohlol te bahlumilale» (1 JUAN 5:19).
Te «pucuj» jaʼme te Satanás, te chʼul-abat te la stoy sba ta stojol te Dios (Juan 8:44; Apocalipsis 12:9). Ta patil yantik chʼul-abatetik la stʼunik te Satanás, jich kʼatpʼujik ta pukujetik. Te chopol espirituetik ini ya stuuntes te yuʼelik yuʼun ya sloʼloy te ants winiketik sok te yakuk xnamajik ta stojol te Dios sok ya stuuntesik bayal ants winiketik yuʼun ya spasik te bin chopole (Salmo 106:35-38; 1 Timoteo 4:1). Te Satanás sok te pukujetik ya x-akʼbot bayal stseʼelil yoʼtanik te kʼalal ya xkʼax jwokoltik.
Jaʼ ta skaj te ay bin ma lek ya jpastik
«Spisil te bin ya stsʼun te winique, ha nix sit ya stsob» (GÁLATAS 6:7).
Ay ya xkʼax jwokoltik ta skaj te jmulawilotik sok te jaʼ swentainoj te balumilal te Satanase. Pero ay joʼotiknix ya jle te jwokoltike, jich bitʼil te kʼalal ay bin lek ya jpastik lek te bin ya xlokʼ kuʼuntik-a, pero teme ya jpastik te bin ma lek ya jta jwokoltik yuʼun. Jich bitʼil te jtul meʼil tatil te lek te bin ya spas, te ya x-aʼtej ta lek sok te kʼux ta yoʼtan te machʼatik ay yuʼun, jich ya yakʼ te ay stseʼelil yoʼtan ta sfamilia. Pero teme ya yaʼiy tajimal sok te takʼin, bayal ya yuchʼ o ma skʼan ya x-aʼtej, ya yakʼ te ya xjil ta pobreil te sfamilia. Jaʼ yuʼun jaʼ lek te ya jpastik te bin ya yalbotik te Jpaswanej kuʼuntik, melel jaʼ ya skʼan te yakuk jpastik te bin lek yuʼun jich «ay bayel lamal qʼuinal» (Salmo 119:165).
Jaʼ yuʼun te ayotikix «ta slajibal cʼahcʼal»
«Ta slajibal cʼahcʼal [...]. Ay machʼatic te ha nix cʼux ya yaʼiy sbahic, xbiqʼuet ta yoʼtanic taqʼuin [...], ya scʼaxuntaybeyic smandar smeʼstatic, ma scom sbahic, jʼutsʼinwanejetic, ihlaybil yuʼunic te bintic lec» (2 TIMOTEO 3:1-5).
Ta ora ini bayal ants winiketik jich stalelik te bitʼil la yal te texto ini sok jich ya yakʼ ta ilel te ayotikix «ta slajibal cʼahcʼal» yuʼun te balumilal ini. Te Biblia jaʼnix jich ya yal te ta jkʼajkʼaleltik ya xkʼax guerraetik, wiʼnal, nijkel sok chameletik (Mateo 24:3, 7, 8; Lucas 21:10, 11). Bayal ants winiketik ya xkʼax swokolik sok ya xlajik ta skaj spisil ini.
