«Pasbeya abahic perdón teme ay ya xhahch cʼop awuʼun soc te yane» (COLOSENSES 3:13).

Ayniwan te bin ma lek ya kaltik o ay machʼa te bin ma lek ya yalbotik ta skaj te jpisiltik ya xchʼayotik. Jaʼ yuʼun jpisiltik ya skʼan ya jpastik perdón sok te yakuk kichʼtik pasbeyel perdone. Te kʼalal ya jpastik perdón, jich maba ya x-ilinotikix ta stojol te machʼa ay bin ma lek la spasbotike. Ma jtatikix ta alel te bin ma lek la kichʼtik pasbeyel sok ma chopoluk ya kiltik te machʼa ay bin ma lek la spasbotike (Romanos 12:17). Pero ¿jaxan teme kʼax kʼux la kaʼiytik te bin la kichʼtik pasbeyel te ma xjuʼ ya xchʼay ta koʼtantik? Te bin ya xjuʼ ya jpastike jaʼ te ya xjuʼ ya xkʼopojotik sok, pero sok slamalil koʼtantik. Te bin ya jkʼantike jaʼ te yakuk xchajpaj jilel te kʼope, ma jaʼuk te ya xbatsʼejxane (Romanos 12:18).

«Peqʼueluc xawacʼ abahic; hich me xapʼis te toyol xan ay te yantic te bin utʼil te haʼate» (FILIPENSES 2:3).

Yame smulan ya sjokinotik te ants winiketik teme ay spekʼelil koʼtantik sok teme ya kichʼtik ta mukʼ. Ya snaʼik te lek koʼtantik sok te maʼyuk bin-ora ya kutsʼintik sok spasemal koʼtantik. Pero teme ya  jnoptik te joʼotik mukʼxan jkʼoplaltik te bitʼil te yantik sok teme jaʼ ya jkʼan ya jpastik te bin ya skʼan koʼtantike, te bin ya xlokʼ kuʼuntik-a jaʼ te ya xjuʼ ya x-ilin yuʼun te yantike. Maʼyukix machʼa ya sjokinotik sok maʼyukix kamigotik ya xjilotik.

«Mayuc machʼa nax tsahbil yuʼun Dios, ta spisil nacionetic lec yoʼtan yuʼun te machʼa yichʼoj ta mucʼ soc te toj bin ya spas» (HECHOS 10:34, 35).

Te Dios spisil lek ya yil te ants winiketik chikan banti talemik, skʼopik, teme ay stakʼinik o teme maʼuk sok te bin yilel te sit yelawik, melel «ta jtuhl nax winic la schicnajtes spisil ta chahp nacionetic» (Hechos 17:26). Jaʼ ya skʼan ya yal-abi te jpisiltik te ants winikotik kermano jba ta jpisiltik. Te kʼalal leknax ya kiltik spisil te ants winiketik ya x-akʼbot stseʼelil yoʼtanik, tseʼel koʼtantik-euk soknix ya x-akʼbot stseʼelil yoʼtan-euk te Jpaswanej kuʼuntik.

«Manso me xawacʼ abaic» (COLOSENSES 3:12, TZOXCH).

Te kʼalal manso ya kakʼ jbatik sok te ma x-ilinotik ta ora, leknax ya yaʼiy sbaik sok joʼotik te yantik, biluknax ya xjuʼ ya scholbotik sok ya xjuʼ ya stojobtesotik, melel snaʼojik te ma x-ilinotike. Te kʼalal ay machʼa ya x-ilin pero teme leknax ya jsutbeytik te skʼope, ya xjuʼ ya xlamaj yoʼtan yuʼun. Te Proverbios 15:1 jich ya yal: «Te tʼujbil suhtib cʼop ya slahmajtes ilimba, yan te tulan suhtib cʼop ya yacʼ tohyuc xan te ilimba».

«Ha bayel xan yutsil te machʼa ay bin ya yacʼ te bin utʼil ay bin ya yichʼ» (HECHOS 20:35).

Bayal ants winiketik jaʼnax ya yichʼ sbaik ta mukʼ sok te ayuk bayal sbilukik. Pero teme ya kakʼtik te bin ay kuʼuntik, jich ya xjuʼ ya jtatik te stseʼelil koʼtantik ta smelelil (Lucas 6:38). Te machʼatik ya snaʼik yakʼel te sbilukik jaʼ bayalxan stseʼelil yoʼtanik, melel ya yakʼik ta ilel te jaʼ kʼux ta yoʼtan te ants winiketik te bitʼil te sbilukike, jich ya yalik wokol sok ya yakʼik ta ilel te kʼalal ay bin ya x-akʼbotik yuʼun te yantike (Colosenses 3:15). Jojkʼoybey aba: «¿Machʼa ya jmulan ya jokin? ¿Jaʼbal te machʼa ay stʼutʼil sok te ma snaʼ yalel wokol o jaʼbal te machʼa ay bin ya snaʼ yakʼel sok te ya snaʼ yalel wokole?». Te bin ya jkʼantike, jaʼ te jichuk jtaleltik te bin-utʼil ya jkʼantik te jichuk stalel-euk te yantike (Mateo 7:12).