Te bin ya yal te Dios ya yakʼ smukʼul koʼtantik
Te Dios ya yal te ya xtal lekilaletik ta pajel chaʼbej. Ya xbajt slajin te wokoliletik sok ya smulan skuxlejalik te ants winiketik (Salmo 37:11). ¿Bin yuʼun te ya xjuʼ ya smukʼulin koʼtantik? Melel «te Dios ma hichuc te bin utʼil winic te ya yaʼiy lot» (Números 23:19). Kiltik te bin ya xbajt spas te Diose.
Te Dios ya slajin te machʼatik chopol
«Te cʼalal ya xchʼihyic te machʼatic chopolic hich te bin utʼil haʼmal, soc te ya xnichinic spisil machʼatic ya spasic bin chopol, ya me xlajic sbahtel qʼuinal» (SALMO 92:7).
Jich bitʼil la kiltik ta yan artículo, te ants winiketik ma lekix stalelik. Ma skʼan te chamnax koʼtantik yuʼun, melel te Biblia jich la yal te ya xkʼot ta pasel ta 2 Timoteo 3:1-5 te «ta slajibal cʼahcʼal» ya xjelon stalel te ants winiketik. Pero ¿bin-a te ya xlaj skʼoplale? Jaʼ te chopol ants winiketik te ma xyichʼik ta mukʼ te Dios. Te Dios nopol ya slajinix te machʼatik ma skʼan ya sjeltay te stalelik. Jaʼ yuʼun jaʼxanix ya xjil ta Balumilal te machʼatik ya schʼuunbot te skʼope. Te Salmo 37:29, jich ya yal: «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a».
Te Dios ya slajin te Satanás
«Te Dios yuʼun lamal qʼuinal nopolix ya [stsʼoʼ] ta teqʼuel te Satanás» (ROMANOS 16:20).
Ya x-ayin lamalkʼinal liʼ ta Balumilal te kʼalal ya yichʼ lajinel te Satanás, te pukujetik sok te chopol ants winiketik. Te Dios ya yal te maʼyuk «machʼa ya xiwtesotic» (Miqueas 4:4).
Te Dios ya slajin te chamel sok te lajel
«Ya xnahinix Dios ta yohlil te ants-winiquetic [...]. Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux» (APOCALIPSIS 21:3, 4).
Te Dios ya xbajt slajinbey skʼoplal spisil te wokoliletik yakʼojbotik te Satanás, te Adán, te Eva soknix te bitʼil ma tojotik. Jaʼ yuʼun ya xbajt slajinbey skʼoplal te wokolil, te chamel sok «mayuquix lajel». Te ants winiketik te kʼux ta yoʼtanik sok te ya schʼuunbeyik skʼop te Dios, ya xkuxinik ta sbajtelkʼinal. ¿Pero bantiwan?
Te Dios ya skʼatpʼun ta nichimal kʼinal te Balumilal
«Ay yutsil qʼuinal ya yaʼiyic te jochol taquin qʼuinal soc te taquin lum; tseʼel yoʼtan te jochol taquin qʼuinal, hich ya xnichin te bin utʼil te tsajal nichime» (ISAÍAS 35:1).
Te Balumilal ya xkʼatpʼuj ta jun nichimal kʼinal kʼalal te Dios ya slajin te bintik chopol. Ya xkol tʼujbil nichimetik ta bayuk sok ya yakʼ bayal weʼelil (Salmo 72:16). Te mukʼul jaʼetik maʼyukix yabakul sok ma xbajt kaltikix te kʼopil contaminación. Te ants winiketik ya spas snaik sok ya xnainik tey-a. Maʼyukix machʼa pobre, te ya xkʼax ta wiʼnal o te ya xnain ta calle (Isaías 65:21,22).
Te Dios ya schaʼkuxajtes te machʼatik chamenik
«Ay chaʼcuxajel yuʼun te machʼatic chamenic» (HECHOS 24:15).
¿Yabal amulan te yakuk awil yan buelta te machʼatik lajem awuʼune? Te Dios te spisil ya xjuʼ yuʼun ya schaʼkuxajtes ta jun nichimal kʼinal liʼ ta Balumilal. ¡Nopanax awaʼiy te ya yakʼbat bayal stseʼelil awoʼtan te kʼalal ya achaʼil abaik! Te Biblia ya yal te ay chaʼkuxaj alaletik sok ants winiketik te patil la stsob sba sok te sfamiliaik. Te Jesucristo la schaʼkuxajtes chaʼoxtul ants winiketik sok bayal machʼatik la yilik (Lucas 8:49-56; Juan 11:11-14, 38-44).
Yaniwan amulan-euk sk'oponel ini
¡WIKʼAME ASIT!
Te bin-utʼil ta sitintayel te wokolil: Mame xchʼay smukʼul awoʼtan
Te Biblia ya skoltayotik ta sitintayel wokoliletik sok ya yakʼ smukʼul koʼtantik.
JOJKʼOYELETIK TA SWENTA TE BIBLIA
¿Bin-a te chaʼkuxajel?
Ilawil te machʼatik ya yichʼik chaʼkuxajtesele.
JOJKʼOYELETIK TA SWENTA TE BIBLIA
¿Bin-utʼil ya x-ayin lamalkʼinal ta Balumilal?
Te Biblia ya yal te wentainel yuʼun Dios ya yakʼ lamalkʼinal ta Balumilal.
