Te tecnología ya xjuʼ ya yutsʼin te apensar
Spisil-ora ay bin yakotik ta snopel kʼalal ayotik ta escuela, ta kaʼteltik sok ta yan lugaretik. Te tecnología bayalniwan ya xtuun, melel maʼyuk bin-ora jich kʼoem ta pasel-a te ya jtatik bayal información manchukme ayotik ta jnatik.
Pero te ants winiketik te bayal ya stuuntesik te tecnología ya xjuʼ ya staik te wokoliletik ini:
-
Te ma xkʼot ta yoʼtanik te kʼalal ay bin ya skʼoponik.
-
Te wokol ya yaʼiyik te jun-nax te bin ya spasik.
-
Te kʼalal stukel ayik oranax ya xchʼajubik.
TE BIN YA SKʼAN YA ANAʼ
SKʼOPONEL JUN
Ay machʼatik sbanax ya skʼoponik te información sok ma stʼunik ta lek te bin-nix ya yakʼ ta nopel-ae.
Teme sbanax ya jkʼopontik jun jaʼniwan ya xtuun-a te kʼalal ay bin oranax ya jlebeytik sujtib. Pero ma skoltayotik kʼalal ay bin ya kilbeytik skʼoplal ta lek.
NOPA TA SWENTA INI: ¿Wokolbal ya awaʼiy teme ay bin najt ya akʼopone? ¿Bin yuʼun ya xpʼijubatxan teme lek ya akʼopone? (PROVERBIOS 18:15).
MAME SCHʼAY AWOʼTAN
Ay machʼatik ya skuyik te ya xjuʼ ay bin chaʼchajp ya spasik ta skaj te ay te tecnología, jich bitʼil te ya stsʼibaybeyik bael mensaje te yamigotak kʼalal yakik ta snopel jun. Pero teme ma jaʼuk baem ta koʼtantik spasel ta bin mukʼ skʼoplale, maʼyuk bin lek ya xlokʼ ta pasel kuʼuntik.
Ya skʼan ya jnaʼtik skomel jbatik yuʼun ma xkakʼtik te ay bin ya schʼaytes koʼtantik. Pero ay bin lek ya xlokʼ kuʼuntik-a teme ya jpastik tulan. Jtul achʼix te Grace sbiil, jich ya yal: «Lek ya xlokʼ awuʼun te bin ya apas sok ma stsakat estrés. Jtaoj ta ilel te jaʼ lek te jun-nax te bin ya jpas, ma jaʼuk te bayal bin ya jpas ta jun-nax buelta».
NOPA TA SWENTA INI: Teme bayal bin ya apas ta jun-nax buelta, ¿wokolbal ya xkʼot ta awoʼtan te bin ya anop? (PROVERBIOS 17:24).
MEL-OʼTAN
Ay machʼatik ma smulanik te stukel ayik sok te maʼyuk bin ya spasik, jaʼ yuʼun ya stuuntesik te tecnología. Jtul ants te Olivia sbiil, jich ya yal: «Ni 15 minuto ya xjuʼ kuʼun te ma xkil te jcelular, te jtablet o ma jtsum te televisión, melel ya xchʼajubon teme maʼyuk bin ya jpase».
Manchukme jchʼielotik o ayix kaʼbilaltik, jpisiltik ya jkʼantik te ay baeltik te jtukel ayotik, sok jich ya jnopilan ta koʼtantik-a te bin ya jnoptik. Mukʼ skʼoplal te jichuk ya jpastike.
NOPA TA SWENTA INI: Teme atukel ayat, ¿yabal apas tulan te ay bin ya anop ta awoʼtane? (1 TIMOTEO 4:15).
TE BIN YA XJUʼ YA APAS
STSAJTAYA ABA TE KʼALAL YA ATUUNTES TE TECNOLOGÍA
¿Bin-utʼil ya skoltayat te tecnología yuʼun ya xpʼijubat? Sok ¿bin-utʼil ya schʼaytesbat awoʼtan te kʼalal ay bin yakat ta snopel?
TOJOBTESEL TE YA YAKʼ TE BIBLIA: «Canantaya te pʼijil-oʼtanil soc te stsahtayel» (PROVERBIOS 3:21).
