¿Labal spas Dios te bintik ay ta chʼulchan, ta Balumilal sok te kuxlejalil o jichnaxbal chiknajik talel? Te bin ya yalik te fisicoetik ta sjajchibal te artículo ini sok te bin ya yal te Biblia, ma pajaluk te bin ya yalike. Ay ants winiketik te jaʼ ya skoltaybeyik skʼoplal te bin ya yichʼ alel, sok ay yantik te jaʼ ya skoltayik te yane. Jaʼ yuʼun bayal ants winiketik ya skoltaybeyik skʼoplal te bin schʼuunejik ta swenta libroetik sok programaetik yuʼun televisión. Jich yuʼun, ay bayal machʼatik ma snaʼik te bin ya schʼuunike.

Laniwan yalbat te amaestro te jichnax chiknaj tal te bintik ay ta chʼulchan, ta Balumilal, te kuxlejalil sok te maʼyuk jtul Jpaswanej. Pero, ¿labal awichʼ akʼbeyel awil teme yuʼun-nix melel-ae? O ayniwan awaʼiyoj te ya yalik te jwolwanejetik yuʼun te religión te ay jtul Jpaswanej. Pero, ¿labal awichʼ akʼbeyel awil teme yuʼun-nix melel-ae? ¿O jaʼnaxbal la awichʼ albeyel te jich ya skʼan ya achʼuune?

Ayniwan bayalix buelta anopilanoj ta swenta te tema ini, sok jichniwan ya awaʼiy te ma xjuʼ ta naʼel teme ay jtul Jpaswaneje, soknix ayniwan ya ajojkʼoybey aba teme mukʼ skʼoplal te ya anaʼbey te sujtibe.

Ta revista ini yame ata ta ilel te bitʼil koltayot te yantik, yuʼun ya schʼuunik te ay jtul Jpaswanej. Jaʼnix jich yame xbajt awil te bin yuʼun mukʼ skʼoplal te yakuk anaʼ te bin-utʼil jajch tal te kuxlejalile.