¿Snaʼojbalix te ciencia te bin-utʼil chiknaj te chʼulchan sok te kuxlejalile? Maʼuk. Bayal ya yalik te cosmología jaʼ laj ya xjuʼ ya yal te banti chiknaj tale. Pero te Marcelo Gleiser, profesor yuʼun astronomía ta Universidad yuʼun Dartmouth sok te agnóstico, jich ya yal: «Ma jnaʼojtik ta lek banti chiknaj tal te chʼulchan sok te Balumilal».

¿Bin ya xjuʼ ya kaltik ta swenta te bin-utʼil jajch tal te kuxlejalil? Jun revista te Science News sbiil, jich ya yal: «Maniwan ya xjuʼ ya jnaʼtik ta jkʼaxel te bin-utʼil jajch tal te kuxlejalil liʼ ta Balumilal. Bayalix tiempo chʼay te registroetik te ya yalbotik te bin-nix kʼot ta pasel-ae». Te bin la yichʼ alele ya yakʼ ta ilel te ma snaʼbey sujtib te ciencia te bin-utʼil jajch tal te bintik pastiklanbil ta chʼulchan sok te kuxlejalile.

Ayniwan ya ajojkʼoybey aba: «Teme ay machʼa la spas te Balumilal, ¿machʼa la spas? Jaʼnix jich teme ay jtul Jpaswanej te kʼax lek yoʼtan sok te kʼax pʼij, ¿bin yuʼun ya yakʼ te ya xkʼax jwokoltike? ¿Bin yuʼun te bayal religionetik? ¿Bin yuʼun ya yakʼ te bayal bin ma lek ya spasik te machʼatik ay sreligionik?».

Te ciencia ma xjuʼ ya yakʼbey sujtib te jojkʼoyeletik ini, pero ma skʼan ya yal te maʼyuk sujtib, melel bayal ants winiketik staojbeyik te sujtib ta Biblia.

Ay chaʼoxtul cientificoetik slokʼesojik tiempo ta yilel te bin ya yal te Biblia. ¿Yabal akʼan ya anaʼ te bin yuʼun ya yalik te ay jtul Jpaswanej? Baan ta jw.org sok lea ta sleojibal «Te bintik ya yalik te bitʼil chiknaj te kuxlejalil».