Mukʼ skʼoplal te sujtibe
¿Bin yuʼun mukʼ skʼoplal te yakuk jnaʼtik te ay jtul Jpaswanej? Teme ya xkʼot ta awoʼtan te ay jtul Dios te kʼax bayal yuʼel, yaniwan akʼan awil teme talem ta stojol Dios te Bibliae. Teme ya smukʼulin awoʼtan te Biblia, yame ata te lekilaletik ini.
Ya amulanxan te kuxlejalil
TE BIBLIA JICH YA YAL: Te Dios «lec bin ya spas, ha te ya yaʼbotic tal haʼal ta chʼulchan soc ya yacʼ sitinuc awal-tsʼunubiletic ta yorahil, hich ya yaʼbotic jweʼeltic soc stseʼelil coʼtantic» (Hechos 14:17).
¿BIN YA SKʼAN YA YAL? Spisil te bintik pastiklanbil jaʼ majtanil yuʼun te Diose. Ya amulanxan te majtaniletik ini kʼalal ya awil ta Biblia te ay akʼoplal ta yoʼtan te Diose.
Yame ata lekil tsitseletik
TE BIBLIA JICH YA YAL: «Yac anaʼ te bin toj, te stojil chahpanel, soc te spisil pajal ya xʼichʼot ta cuenta, soc spisil lequil behetic» (Proverbios 2:9).
¿BIN YA SKʼAN YA YAL? Te bitʼil jaʼ Jpaswanej awuʼun te Diose, ya snaʼ te bin ya akʼan yuʼun ay stseʼelil awoʼtan. Teme ya awil te bin ya yal te Biblia, ya ata tsitseletik te ya skoltayate.
Ya yakʼbey sujtib te jojkʼoyeletik awuʼune
TE BIBLIA JICH YA YAL: «Hich me yac anaʼbe sba a te Diose» (Proverbios 2:5).
¿BIN YA SKʼAN YA YAL? Snaʼel te ay jtul Jpaswanej yame skoltayat ta stabeyel sujtib te jojkʼoyeletik te mukʼ skʼoplale, jich bitʼil ¿bin swentail te kuxlejalile?, ¿bin yuʼun ay bayal wokolil? o ¿bin ya xkʼot ta stojolik te machʼatik ya xlajike? Yame atabey sujtib ta Biblia.
Yame sta smukʼul awoʼtan ta pajel chaʼbej
TE BIBLIA JICH YA YAL: «Como ya jnaʼ te bin jnopoj ta acuentahic, xchi te Jehová, ha jnopoj te lec ya xcʼohex, ma haʼuc te ya xcʼax awocolic, ya caʼbeyex te bin yaquex ta smahliyele» (Jeremías 29:11).
¿BIN YA SKʼAN YA YAL? Te Dios ya yal te ya xbajt slajin te bintik ma lek, te wokolil sok te lajel. Teme ya smukʼulin awoʼtan te bin ya yal te Dios, yame xjuʼ ya asitintay te wokoliletik te ya xkʼax ta jujun kʼajkʼal.
